Eberew 8

Jesus ër ky n'aa rod wahë n'aa heh'äät do P'op Hagä Do wë ky n'aa hahỹỹh

1 Hahỹ ti bë ỹ maher'oot do mahang tak'ëp baad hadoo doo: Ti anyy däk né hẽ ër ky n'aa rod wahë n'aa heh'äät doo. Hỹ pong jé, P'op Hagä Doo, Sahõnh Ta Bahä̃nh Hadoo Do hub hẽnh, takaweh'ëëh doo bä tabaso däk. 2 P'op Hagä Do matym gó, Tak'ëp Hyb N'aa Jawyk Do mo haj'aa bä ër ky n'aa rod moo wät, badäk hahỹỹ bä sa hã P'op Hagä Do kahesé do tób n'aa ajyy ratamaa sooh doo bä nado.[a]

3 Sahõnh hẽ ji ky n'aa rod wahë n'aa heh'äät do[b] rasëm P'op Hagä Do matym n'aa P'op Hagä Do wë tamanaa hyb n'aa, sa masããh wób P'op Hagä Do hã tama ejuu hyb n'aa na-ããj hẽ. Ti hyb n'aa taw'ããts hẽ Jesus Kristo na-ããj hẽ manaa P'op Hagä Do matym n'aa. 4 Badäk hahỹỹ bä Jesus awäd nä bä paawä, dooh sa ky n'aa rod P'op Hagä Do wë tado bä paawä, anyy däk do hyb n'aa Rewi panaa P'op Hagä Do hã rama ejuu doo, Mosees ky n'aa jaw'yyk do mejũũ doo da. 5 Sa hã P'op Hagä Do kahesé do tób n'aa, hỹ pong jé hanäng do hãd hadoo do katamaa sooh do yt hã ti ramoo heb'ook. Dooh P'op Hagä Do bawät do heh'äät do tado bä ta ti tób ta yt hã ramoo bok do ër wén hapäh, hahỹỹ da Mosees P'op Hagä Do maher'oot do paa hyb n'aa: “Mamoo wäd ta tii, hahỹ waëë hã a hã ỹ metëëh do hadoo da, mahapäh do hadoo né hẽ.”[c] Heh'äät doo, hỹ pong jé tii. 6 Baad ub né paawä sa ky n'aa rod Rewi häd näng do panaa ramoo bok doo, tak'ëp baad ub ti bahä̃nh Jesus ër ky n'aa rod moo wät doo. Tii d' tawén hadoo, ta tyw n'aa papuuj ta hyb n'aa P'op Hagä Do wë ër kajaa Jesus anoo doo, p'ooj ub Mosees sa sii P'op Hagä Do kaner'oot do bahä̃nh do hyb n'aa.[d] Tak'ëp baad ub ti bahä̃nh na-ããj hẽ ër hã taky n'aa enooh doo.

7 Pooj jé Mosees sa sii P'op Hagä Do kaner'ood wät do an'oo bä paawä, baad ub sahõnh hẽ tabahadoo hyb n'aa, tii d' tado bä paawä, dooh hyb n'aa pé paawä ta tyw n'aa papuuj P'op Hagä Do ky n'aa enooh péh. 8 Tii bä, P'op Hagä Do bahapäh bä, dooh né hẽ raky dahé bä Mosees sa sii takaner'ood wät doo, hahỹỹ da ta kyyh:

“Ti awät bë pooj jé papuuj Isaraéw buuj sii ỹ kaner'oot doo,

Judah buuj sa sii na-ããj hẽ.

Ta tyw n'aa papuuj ỹ anoo da sa hã.

9 Sa wahë makũ sa sii ỹ her'ood wät do paa nahado da tii,

ỹ man'yyh noo gó Esit bä naa.

Raky nadaheeh do hyb n'aa paa sa sii ỹ ber'ood wät doo,

ỹ eréd hõm paa sa wahë makũũh”, näng mä Tak'ëp Hyb N'aa Jawyk Doo.

10 “Hahỹỹ da ta tyw n'aa papuuj

ta jawén Isaraéw buuj sa hã ỹ metëëh doo:

Sa h'yyb gó da ỹ banoo ỹ ky n'aa jaw'yyk doo.

Sa h'yyb tym gó da ỹ berih hadoo da ta tii.

Ỹ da P'op Hagä Do rah'yy kaha'eeh doo.

Karapé haa d' tii.

11 Ti noo gó da,

dooh hyb n'aa da rama met'ëëg wät sa da hadoo do këh ỹ n'aa hã.

Dooh hyb n'aa da sa wakããn rama met'ëëg wät pé ỹ rabahapäh hyb n'aa.

Sahõnh hẽ da ỹ rabahapäh.

Hyb n'aa sakog is doo, hyb n'aa jewyk do sii hẽ ỹ da rahapäh.

12 Tii d' tawén hadoo,

ỹ mabaan hõm da baad nadoo do ramoo bok do paah.

Dooh da ỹ hyb n'aa es'ee wäd bä nesaa do ramoo bok do paa.”[e] Näng mä Tak'ëp Hyb N'aa Jawyk Doo.

13 Sa sii takaner'oot do papuuj P'op Hagä Do ky däng do hyb n'aa, tado hõm pooj jé sa sii takaner'ood wät do paah. Ta säg däg tii. Edah tagawatsik. Ta tyw n'aa papuuj tan'oo däk.

<- Eberew 7 Eberew 9 ->