Is Nelewasan Mehitenged te Etew he zuen Din para te Idsukud
1 Ne neehè ku is sevaha he etew he zuen din migewezan he idsukud. 2 Ne mid-insà a te, “Hendei ka ebpevayà?” Midtavak e zin te, “Diyà a te Jerusalem su edsukuzen ku ke sengemenu is keluaǥan din wey keleyatan din.” 3 Ne migenat haazà is belinsuǥuen he nekidlalag kedì, ne midsinuǥung sikandin te selakew en he velinsuǥuen 4 he migkaǥi ziyà te kandin te, “Egpas ka. Pelelaǥuy ka, ne keǥiyi nu haazà is betan-en he ed-uwit te sukud, he is Jerusalem egkehimu he inged he wazè din berengbeng su utew mahabet is menge meǥinged wey menge uyaǥen kayi. 5 Su migkaǥi is Nengazen he iyan mismu sikandin egkehimu he verengbeng he hapuy he ebpekeliǥuy te inged he Jerusalem, ne iyan sikandin egkehimu he ǥehem kayi te inged.”
Impelikù te Nengazen is menge Keet-etawan Din diyà te Kandan he Lugar
6-7 Migkeǥiyan te Nengazen is menge Israilihanen te, “Impeyapat ku sikiyu ziyà te minsan hendei he vahin te kelibutan. Piru ǥuntaan pemelaǥuy kew, ragkes kew en is mibihag pehendiyà te Babilonia, ne likù kew ziyà te Jerusalem.”
8 Hein nepasad is kegkaahaa ku zuen te menge nelewasan ku, midsugù a te Nengazen he megkaǥi a te ebpekesuǥat diyà te menge nasyun he nenurung keniyu wey nenguwa te menge azen niw. Su is minsan hentei he ebpesipala keniyu, ebpesipelahan din is utew mahal te Nengazen. Ne iyan heini kes migkaǥi te Nengazen he Mekeǥeǥehem he ebpekesuǥat diyà te menge nasyun: 9 “Edsilutan ku iyan sikandan; edsurungen sikandan te menge uripen dan ne egkuwaan is menge azen dan.”
Emun egkehitavù en heini egketuenan niw he iyan is Nengazen he Mekeǥeǥehem midsuǥù kedì, migkaǥi si Zacarias.
10-11 Migkaǥi is Nengazen te, “Ugyab kew tenged te kegkelipey, sikiyu is menge tig-Jerusalem, su ebpekeuma a ne ed-ubpà a zuma keniyu. Ne zutun he timpu, mahabet he menge nasyun is ebpesakup kedì. Ne egkehimu sikandan he menge etew ku.”
Emun ekgehitavu en heini, egketuenan niw he iyan is Nengazen he Mekeǥeǥehem midsuǥù kedì pehendiyà te keniyu. 12 Ed-umanan ed-engkena te Nengazen is Juda he kandin he vahin te segradu he tanà te Israel. Ne ed-umanan din egkilelaa is Jerusalem he pinilì din he inged.
13 Ebmelinawen is langun he menge etew ziyà te etuvangan te Nengazen, su ebpekeuma sikandin puun te segradu he ubpeey zin.
