1 Utew ka iyan mekempet is pelanggè ku. Is menge mata nu he netembunan te lembung nu ne henduen be te menge mata te merepatik. Is bulvul nu henduen be te menge sengeleyuzan he kambing he edtupang puun te Buntud he Gilead. 2 Is menge ngipen nu iring keputì te kerehidu he veǥu he neelutan wey neziǥù. Wazà netarin kayi wey meupiya is kebpekesavuk dan. 3 Is bivig nu henduen be te kanggan he ribun. Utew iyan heini mekempet. Is enaping nu he netembunan te lembung nu ne henduen be te meriǥàriǥà he prutas he pumigranata. 4 Is lieg nu henduen be te turi ni David he utew mekempet is kebenguna zuen. Mibelieǥan heini te henduen be te utew mahabet he kelasag te menge sundaru. 5 Is dezuwa he susu nu henduen be te sereping he nati te kuleping he ebpenabtab diyà te zuen duen menge liryu. 6 Dutun te kenè pa egkeriwasriwas wey kenè pa egkaawà is merusirem, ne kenà a ed-awà diyà te kumeng nu he henduen be te menge vuntud he ebmeǥuymuyan te kehemut te mira wey veyewà. 7 Utew ka iyan mekempet is pelanggè ku. Wazà iyan igkesawey kenikew.
8 Duma ka kediey puun te Lebanon, minahal ku. Edtupang ki puun te puntur te menge vuntud te Amana, Senir, wey Hermon, he ed-ubpaan te menge erimaung wey menge liyupardu. 9 He pelanggè ku he minahal, sengepedsirap nu zà kedì ne nevihag nu en is gehinawa ku wey tenged te sevaha zà he zayandayan te belieg nu. 10 Utew iyan meemis is kebmahala nu kedì, pelanggè ku he minahal. Meemis pa heini kenà te vinu. Is pehemut nu, ne edhuna pa he mehemut te minsan hengkey he kelasi te pehemut. 11 Henduen be te teneb is keemis te menge hazek nu, minahal ku. Uya, is dilè nu henduen be te zuen duen teneb wey gatas. Is kehemut te kumbalè nu ne iring kehemut te kayu he sidru ziyà te Lebanon. 12 He pelanggè ku he minahal, henduen ka te pemuleey he midsireduwan he zuen duen edtudà he serebseb. 13 Ebpemeǥas heini te pumigranata wey zuma pa he utew meupiya he menge veǥas. Dekelà is egkekuwa kayi he pehemut he hina, nardu, 14 asapran, kalamu, sinamun, nekedseselekawà he kelasi te veyewà, mira, alus, wey zuma pa he utew mehemut he menge pehemut. 15 Uya, iring ka te pemuleey he edtudaan te serebseb he ebpuun diyà te menge vuvungan he Lebanon.
16 Sikiyu is keramag he ebpuun diyà te zizaya wey zivavà. Hiyupa niw is pemuleey ku su wey mekepeyapat is kehemut kayi. Ipehendiyà is minahal ku te pemuleey zin su wey mekekaan te kinemeupiyahan he menge veǥas te pinemula kayi.
<- Kentahan ni Solomon 3Kentahan ni Solomon 5 ->