1 Nengazen, impeehè nu is keupiya nu pinaaǥi te kebpekeveǥey te keupiyaanan te tanè nu he Israel;

impeuswag key en maan kenikew.

2 Mibpesaylu nu is menge salè dey;

ne in-awè nu en diyà te isip nu.

3 Wazè key en kenikew mepeuki.

4 He Megbevayà he menluluwas dey,

ilikù nu kayi te kenami is meupiya he kebpekesavuk dey.

Iawè nu en is pauk nu kenami.

5 Taman te taman en be is kegkepeuki nu kenami?

6 Kenè be egkehimu ke idlikù nu kayi te kenami is meupiya he kebpekesavuk dey su wey key melipey tenged kenikew?

7 Nengazen, ipeehè nu kenami is kebmahala nu kenami ne libriya key.

8 Ebpemineǥen ku is egkeǥiyen te Nengazen he Megbevayà,

su ibpenaad din diyà te kenitew te metinumanen he menge etew zin is meupiya he kebpekesavuk;

emun kenè tew edlikuan is tinulebung he menge vaal tew.

9 Tutuu iyan he edlibriyen din is menge etew he edtahud kandin su para metuusi he kemulu edterebahu is gehem din kayi te tanè tew.

10 Ebpekeduma is gaǥew wey kebmetinumanen,

ne ebpekeduma zaan is ketazeng wey is kelinew.

11 Is kebmetinumanen te etew kayi te tanà ne netuenan te Megbevayà diyà te langit.

Ne is ketazeng te Megbevayà diyà te langit egkezawat te etew kayi te tanà.

12 Siguradu he edtuvazan kiw te Nengazen,

ne edekelà is sebpet te tanè tew.

13 Is ketazeng iring te menunudtulà he edhuna te Nengazen su ed-endamen din is ibayà te Nengazen.

<- Menge Salmo 84Menge Salmo 86 ->