1 He Megbevayà, ereg ka he edeliǥen dey ziyà te Zion!

Ne edtumanen dey is penangdù dey kenikew.

2 Is langun he menge etew ed-uvey ziyà te kenikew su edtevaken nu is menge kebpengemuyù dan.

3 Minsan mahabet is menge salè dey, ebpeseyluwen key ǥihapun kenikew.

4 Deyzey is etew he mibpilì nu wey midhinggat nu he ziyà med-ubpà te valey nu.

Diyà te valey nu he iyan kes segradu he ubpeey nu egkeveyangan key te meupiya he menge vutang.

5 He Megbevayà he menluluwas dey,

edtevaken key kenikew pinaaǥi te egkein-inuwan he menge vaal he mibeelan nu te kedlibriya nu kenami.

Iyan ka ebpekeveǥey te keupiyaanan te menge etew kayi te tivuuk he kelibutan.

6 Mekeǥeǥehem ka, ne pinaaǥi te kegkemekeǥeǥehem nu insavuk nu is menge vuntud.

7 Ibpeengked nu is rekabù te menge vaǥel wey keǥurub te menge etew.

8 Minsan sikan is diyà ebpemen-ubpà te meziyù ne nengahandek kenikew,

tenged te egkein-inuwan he menge vaal nu.

Ebpekeugyab te kegkelipey is menge etew kayi te tivuuk he kelibutan tenged kenikew.

9 Ed-etimanen nu is tanà wey ebpeuzanan nu,

ne midhimu nu he mekeveǥey te sebpet.

He Megbevayà, is menge wahig nu kenà egkemezahan,

ne ebeǥayan nu te sebpet is menge etew.

Id-andam nu is tanà he uuzaran.

10 Ebpeuzanan nu is ineradu he tanà taman te ebmeyunek heini,

ne edtuvazan nu is nenuvù he menge pinemula.

11 Edhimuwen nu he zekelà is menge abut emun tiraǥun.

Is langun he menge lugar he egkepeveyaan nu ne ebpekaangken te zekelà he uzar.

12 Is menge penebtavà diyà te sibsivayan ne zekelà is memeilem he sagbet duen;

is menge vuvungan henduen be te menge etew he egkengelipey.

13 Is menge penebtavà neeneb te menge ebpemenabtab;

is menge suǥud neeneb te menge trigu.

Heini he menge lugar henduen be te menge etew he ebpemen-ugyab wey ebpemenganta te kegkelipey.

<- Menge Salmo 64Menge Salmo 66 ->