1 He Megbevayè ku, kehizuwi a kenikew tenged te kebmahala nu kedì.

Iawè nu is menge salè ku tenged te zekelà he hizu nu kedì.

2 Lùlui nu is kegkezaat ku;

lumpiyuwi a te menge salè ku.

3 Su langun he timpu ed-isipen ku wey ed-engkenen ku is menge salè ku.

4 Diyè e zà te kenikew mekesalà.

Mibeelan ku is menge vaal he mid-isip nu he mezaat.

Umbe hustu is menge lalag nu he ebpekesuǥat kedì.

Utew hustu is kedhukumi nu kediey.

5 Lalung a wey mekesesalà a puun pa te kegkeetew ku.

6 Iyan egkesuatan nu is ebpuun te keputian te atey he meheǥet wey tinutuuwà he ked-ul-ulaha te hustu;

umbe penurua a su wey a mehimu he uluwanen.

7 Iawè nu is menge salè ku su wey a melumpiyuwi;

lùlui a su wey a mebmeputì.

8 Ipeǥezam nu kediey is kelipey wey keǥalew,

para zuen ku ǥihapun kelipey minsan pa te henduen te edrupeten nu is menge tulan ku.

9 Iawè nu is menge salè ku;

penasa nu is langun he kelelalung ku.

10 He Megbevayè ku, lumpiyuwi nu is gehinawa ku,

ne beǥayi a te veǥu wey mepezumdumahan he ǥehinawa.

11 Kena a kenikew segseǥa puun te etuvangan nu,

ne kenè nu iawà kayi te kediey is waǥas he Mulin-ulin nu.

12 Ilikù nu kayi te kediey sikan is kelipey he neseǥazan ku hein midlibri a kenikew.

Ne veǥayi a te metinumanen he ǥehinawa.

13 Ne zutun ibpenurù ku is menge paaǥi nu ziyà te menge mekesesalà su para mekelikù sikandan diyà te kenikew.

14 He Megbevayà he menluluwas ku, libriya a te salè ku he iyan is kedhimatey, *libriya ... kedhimatey: etawa, libriya a su wey a kenà ebpatey.

ne ebpekezaǥing a is edtudtul te kedlibriya nu kedì.

15 Nengazen, tevangi a kenikew su wey a mekekaǥi te menge lalag he idalig kenikew,

ne edeliǥen ku sikew.

16 Kenè nu igkesuat is menge pemuhat,

ne minsan pa ke ebpemuhat a ziyà te kenikew te pemuhat he edtutungen, ne kenè nu heini igkelipey.

17 Is pemuhat he ebpekeveǥey kenikew te kelipey, Megbevayè ku, iyan is kenà kebpelavew wey is ked-iniyuǥi te menge salà.

Ne iyan heini he kelasi te pemuhat edewaten nu.

18 He Megbevayè ku, tuvazi nu is Zion, he iyan is inged he Jerusalem su igkelipey nu is kebaal kayi.

Umana nu venguna sikan is menge verengbeng kayi.

19 Ne zutun igkelipey nu human is hustu he menge pemuhat, ragkes en is menge pemuhat he ed-eminen edtutunga.

Ne ibpemuhat en maan is tudu he menge vaka ziyà te pemuhatà he zutun ka ebpemuhata.

<- Menge Salmo 50Menge Salmo 52 ->