1 Migkaǥi is Nengazen diyà te ki Moises te, 2 “Mendui nu is menge Israilihanen he ibpeǥawas diyà te kampu is minsan hentei he zuen melimezang he zaru te lundis din, etawa zuen egawas diyà te sudiyè din tenged te zaru, etawa nehimu he meremerik su nekeǥawed te minatey. 3 Maama etawa vahi ne ipeǥawas niw sikandan su wey zan kenà meremeriki is kampu zan, he iyan ed-ubpaan ku duma keniyu.” 4 Umbe, impeǥawas te menge Israilihanen haazà he menge etew ziyà te kampu su iyan haazà insuǥù te Nengazen ki Moises.

5 Migkaǥi is Nengazen diyà te ki Moises te, 6 “Keǥiyi nu is menge Israilihanen he emun duen maama etawa vahi he nekesupak te egkesuatan te Nengazen pinaaǥi te kebaal te mezaat diyà te iring din he etew, heeyan he etew nekesalà. 7 Kinahanglan he idtug-an din is salà he neveelan din, ne veyazi zin te hustu he vayad is azen he migkuwa zin etawa midezeetan din, ne haazà is hustu he vayad din ne umani zin pa te 20 pursintu is bali zutun. Iveǥey zin heini is langun diyà te etew he neselaan din. 8 Piru ke minatey en haazà is etew he neveelan te mezaat, ne wazà daan megeget he kezuzumahi zin he iyan edawat kayi he vayad, ne haazà is bayad gaked en te Nengazen, ne kinahanglan he ibeǥey haazà diyà te memumuhat duma te kerehidu he ibpemuhat dutun te memumuhat su para mepesaylu is salà dutun he etew. 9 Is langun he segradu he menge gasa he ed-uwiten te menge Israilihanen diyà te memumuhat, gaked en te memumuhat. 10 Uya, gaked en te memumuhat haazà is segradu he menge pemuhat.”

11 Mid-uman pa megkaǥi is Nengazen te, 12 “Keǥiya nu heini ziyà te menge Israilihanen: Penenglitan ke zuen bahi he mibpekigkumpadi. 13 Mibpehilavet sikandin te kumpadi zin he wazà metueni te esawa zin. Wazà netau te meremerik he vaal zin, su wazà nekaahà kandin te aktu. 14-15 Emun edhaled is esawa zin he tutuu he zuen mibeelan din he mezaat, etawa ebpengelikud is maama piru wazà mezaat he mibeelan duen te vahi, kinahanglan he ed-uwiten sikandin duen te maama ziyà te memumuhat ne kinahanglan he ed-uwit haazà is maama te pemuhat he para te esawa zin he zezuwa he kilu he herina he barli, ne kinahanglan he kenè din heini edsehuǥan te lana etawa veyewà su pemuhat heini he gasa he ibpemuhat din tenged te kebpengelikuzi zin te esawa zin. Pemuhat heini para metueni ke nekesalè be is esawa zin etawa wazà.

16 “Edumahan dutun te memumuhat haazà is bahi ziyà te etuvangan ku. 17 Ne ed-itis te wahig he mid-isip he segradu ziyà te ziniyun haazà is memumuhat, ne edsevukan din haazà te eliyavuk he ebpuun diyà te saag duen te Tulda he Ed-ezapan. 18 Ibpehitindeg dutun te memumuhat haazà is bahi ziyà te etuvangan ku, ibpeperuvey te memumuhat haazà is bahi ne ibpetepayà kandin sikan is pemuhat he gasa he para metueni ke nekesalè be sikandin wey ke wazà. Pemuhat heini te esawa zin te kebpengelikuzi zin kandin. Ne kegkepasad dutun, egewazan dutun te memumuhat sikan is midteǥuan te wahig he mepait he ed-uwit te rawak. 19 Ne ibpepenangdù din haazà is bahi ke mibpekigkumpadi ve sikandin etawa wazà, ne egkaǥi sikandin te, ‘Emun wazè nu remeriki is keugelingen nu pinaaǥi te kebpehilavet te sengememaama, kenè ka ed-utengan te rawak he ed-uwiten kayi te mepait he wahig. 20 Iyan, emun midremerikan nu is keugelingen nu pinaaǥi te kebpehilavet te maama he kenè nu esawa, 21 ebpenangdù a he egkehimu ka he mezaat he petug-iringan tenged te rawak te Nengazen dutun te timpu he kenè ke en ebpekaanak. 22 Berakat he heini is wahig he ed-uwit te rawak, edreneb diyà te lawa nu su wey ka kenè en mekaanak.’ Ne edtavak haazà is bahi te, ‘Uya, uyun a keniyan.’

23 “Ne kegkekapasad dutun, idsurat duen te memumuhat heini he menge rawak diyà te para te edsuratan ne ebpenasen din pinaaǥi te kedtereva kayi zuen te wahig he mepait he intaǥù diyà te ziniyun. 24 Ne ibpeinum din dutun te vahi haazà is mepait he wahig he ed-uwit te rawak, su para mekaantus sikandin te utew merasey he egkeuwit dutun emun tutuu he nekesalà sikandin. 25 Ne egkuwaan duen te memumuhat puun te velad dutun te vahi sikan is pemuhat he para gasa he pemuhat para te kebpengelikud te esawa zin, ne ibayew heini zutun te memumuhat diyà te etuvangan ku, ne ed-uwiten din diyà te pemuhatà. 26 Egkuwa haazà is memumuhat te sengekemkem dutun te pemuhat he para metueni ke nekesalè be haazà is bahi etawa wazà, ne edtutungen din duen te pemuhatà. Ne kegkepasad dutun human din ibpeinum duen te vahi sikan is wahig. 27 Emun tutuu he midremerikan din is keugelingen din pinaaǥi te kedluivi zin te esawa zin, ne haazà is wahig he neinum din, ebpekeuwit diyà te kandin te rawak he utew zin igkerasey. Kenè en sikandin ebpekaanak, ne egkehimu sikandin he petug-iring te etew he edrewakan te Megbevayà. 28 Iyan, emun wazè din remeriki is keugelingen din, kenà sikandin ed-utengan kayi ne ebpekaanak sikandin.

29 “Iyan heini kesuǥuan bahin te maama he ebpengelikuzan din is esawa zin. Emun is bahi midremerikan din is keugelingen din pinaaǥi te kedluivi zin te esawa zin, 30 etawa edhaled is maama te esawa zin, ne tenged dutun kinahanglan he ibpehitindeg te memumuhat is bahi ziyà te etuvangan ku ne ebeelan diyà te kandin heini he menge kesuǥuan. 31 Is maama wazè din televaken, piru is bahi zuen din televaken emun nekesalà sikandin, ne egkerasey sikandin tenged te salè din.”

<- Menge Numero 4Menge Numero 6 ->