Menge Numero 24

1 Hein nepurung mesavut ni Balaam he egkesuat is Nengazen he penubtuvazi is Israel, wazè din en gemita is kebpeveveyilan din he iring te nehuna he vaal zin. Kekenà, midsinaru sikandin diyà te sibsivayan, 2 ne zutun neehè din is menge Israilihanen he mibpesibsivayà megkampu is kada tribu. Ne mibpurungan sikandin ulini te Mulin-ulin te Megbevayà, 3 ne migkaǥi sikandin te, “Iyan a si Balaam he anak ni Beor, ne zuen ku meupiya he kedsavut. 4 Nezineg ku is menge lalag te Megbevayà, wey zuen nelewasan ku he impelewasan kediey te Mekeǥeǥehem he Megbevayà. Mibpekevava a ziyà te etuvangan din, ne impesavut e zin. Ne iyan heini menge lalag ku:

5 Utew mekempet is menge tulda he ed-ubpaan te menge etew te Israel he menge kevuwazan ni Jacob.

6 Iring heini te nezalandalan he menge palma, wey menge pemuleey ziyà te kilid te wahig.

Iring daan heini te kayu he aloe he impemula te Nengazen, wey te menge kayu he sidru ziyà te kilid te menge wahig.

7 Edrepey is wahig diyà te teleǥuey zan, ne ebpemula zan te menge lisu ziyà te menge tanà he wehiǥen.

Is menge hadì dan egkehimu he edhuna pa he gehemanen kenà ki Agag he hadì te menge Amalikanhen. Ne egkevantug is ginhedian dan.

8 Impeǥawas sikandan te Megbevayà puun te Ehipto; iring sikandin te mezesen he tudu he vaka para kandan.

Ebpenaan dan wey edezeetan dan is menge kuntada zan he henduen be te ed-evelengen dan, wey henduen te edrupeten dan is menge tulan kayi.

9 Iring sikandan te menge erimaung he emun ebpekelipezeng en ne wazè en ebpeǥaruǥaru he ebpukew kandan.

Edtuvazan is ebpenuvadtuvad kandan ne edrewakan is ebpenrawak kandan.”

10 Tenged dutun utew nepeuki ni Balak si Balaam. Midsumbag din is divaluy he palad din ne migkeǥiyan din si Balaam te, “Mibpesuǥuan ku sikew su wey nu merewaki is menge kuntada ku, piru nasì nu sikandan penubtuvazi te ketetelu. 11 Ne ǥuntaan ulì ke en! Migkaǥi a he edsuhulan ku sikew te meupiya, piru kenà edtuǥut is Nengazen he maangken nu is suhul.” 12 Midtavak ni Balaam si Balak te, “Kenè be migkeǥiyan ku is menge menunudtulè nu, 13 he minsan iveǥey nu pa kediey is turuǥan nu he nepenù te pelata wey vulawan, ne kena a ebpekehimu he ebaal te keugelingen ku he suat, mezaat man heini etawa meupiya. Kekenà, iyan dà egkeǥiyen ku is egkeǥiyen te Nengazen kayi te kediey. 14 Guntaan, ed-ulì ad diyà te menge emurè ku te inged. Piru ebpetizeenan ku sikew he zaan ke hengkey is ebeelan kayi he menge etew ziyà te menge etew nu ziyà te huziyan he menge andew.”

Is Ikeepat he menge Lalag ni Balaam

15 Ne migkaǥi ni Balaam heini he menge lalag: “Iyan a si Balaam he anak ni Beor, ne zuen ku meupiya he kedsavut. 16 Nezineg ku is lalag te Utew Lavew he Megbevayà, ne mibeǥayen e zin te ketau. Duen mibpelewasan kedì te Mekeǥeǥehem he Megbevayà. Mibpekevavà a ziyà te etuvangan din, ne impesavut e zin. Ne iyan heini menge lalag ku:

17 “Duen neehè ku ziyà te nelewasan ku he wazè pa mehitavù. Diyà te ebpekeuma he timpu, duen egkehimu he hadì te Israel he ebpuun diyà te kevuwazan ni Jacob. Ne edezeetan din is menge Moabitanhen wey is langun he kevuwazan ni Shet. 18 Dutun te ebmelig-en is Israel, edsekupen din is Edom he kuntada zin, he egngezanan daan te Seir. 19 Edumala is sevaha he pengulu te Israel ne edezeetan din is egkesamà he menge uuyag diyà te inged he Moab.”

Is Ketepusan he menge Lalag ni Balaam

20 Naahà ni Balaam diyà te kebpekelawas din is menge etew ni Amalek ne migkaǥi sikandin te, “Dengan iyan lavew he nasyun is Amalek, piru te huziyan he timpu egkezeetan heini.”

21 Ne naahà daan ni Balaam diyà te kebpekelawas din is menge Kinhanen, ne migkaǥi sikandin te, “Melig-en is ubpeey niw su ziyà heini te vatu he vuvungan. 22 Piru egkezeetan kew emun ebihaǥen kew en te Asiria.”

23 Migkaǥi pa ni Balaam heini he menge lalag: “Hentei vuwa is egkesamà he uuyag emun ebeelan en heini te Megbevayà? 24 Ebpekeuma is menge varku he ebpuun diyà te Kitim ne edsekupen dan is menge etew ziyà te Asiria wey Eber. Piru egkezeetan daan is Kitim.”

25 Ne mid-ulì si Balaam wey si Balak.

<- Menge Numero 23 Menge Numero 25 ->