1 Migkaǥi is Nengazen diyà te ki Moises te, 2 “Keǥiyi nu is menge Israilihanen he mebeǥey te tuked diyà te kenikew is kada pengulu te tribu. Ne pesurati heini te kada ngazan dan. 12 langun he tuked. 3 Diyà te tuked te tribu ni Levi, ne idsurat dutun is ngazan ni Aaron su kinahanglan he zuen sevaha he tuked te kada pengulu te tribu. 4 Ne ziyà heini idsavuk is langun te Tulda he Edtelevukaayan, diyà te egkesineruwan duen te Kavan te Kebpekid-uyun he zutun a ebpekidhinguma keniyu ki Aaron. 5 Ne zutun ebpeneringsing is tuked te etew he ebpilien ku he ebpenilbi kedì pinaaǥi te kegkememumuhat ne pinaaǥi kayi egkeengked en is kedriklamu te menge Israilihanen ki Aaron wey kenikew.”

6 Umbe, migkeǥiyan ni Moises is menge Israilihanen, ne is kada pengulu mibeǥey kandin te tuked. 12 langun he tuked, ne in-amut dutun is ki Aaron. 7 Insavuk ni Moises haazà is langun he tuked diyà te etuvangan te Nengazen diyà te Tulda he midsevukan te Kesuǥuan.

8 Ne hein nepawà, midseled si Moises duen te Tulda he midsevukan te Kesuǥuan. Ne neehè din is tuked ni Aaron he midriprisintar te tribu ni Levi, ne kenè dà te neneringsing heini, kekena, midtuvù, nengevukad, wey nemeǥas te almindru. 9 Ne inggawas ni Moises is langun he tuked ne impeehè din te langun he menge Israilihanen. Mid-ehè dan heini, ne migkuwa te kada pengulu te tribu is kandin he tuked.

10 Ne migkaǥi is Nengazen diyà te ki Moises te, “Ilikù nu heeyan is tuked ni Aaron diyà te etuvangan duen te Kavan te Kebpekid-uyun ku su para mehimu heini he petizaan diyà te menge mesinupaken he ebpematey sikandan emun kenè dan ed-engked he edriklamu kayi te kedì.” 11 Midtuman ni Moises is insuǥù kandin te Nengazen.

12 Migkaǥi is menge Israilihanen diyà te ki Moises te, “Emun iyan heeyan ne ebpematey key en bes is langun! 13 Su ebpatey man is minsan ed-uvey zà diyà te Tulda te Nengazen. Ne ebpatey key ves is langun pinaaǥi kayi!”

<- Menge Numero 16Menge Numero 18 ->