1-7 Iyan heini listahan te menge memumuhat wey menge Levihanen he mid-ulì puun te kegkevihaǥa kandan duma ki Zerubabel he anak ni Shealtiel wey ki Jeshua he lavew he memumuhat. Is menge memumuhat kandan iyan ensi Seraya, Jeremias, Ezra, Amaria, Maluc, Hatush, Shecania, Rehum, Meremot, Iddo, Ginetoi, Abia, Miamin, Moadia, Bilga, Shemaya, Joyarib, Jedaya, Salu, Amok, Hilkia, wey si Jedaya. Iyan sikandan menge pengulu te iring dan he menge memumuhat wey te menge zuma zan hein timpu ni Jeshua.

8 Is menge Levihanen iyan ensi Jeshua, Binui, Kadmiel, Sherebia, Juda, wey si Matania. Si Matania wey is menge zuma zin iyan midseriǥan te kegkanta te menge kentahan he para te kebpeselamat. 9 Ne si Bakbukia, Uni, wey is menge zuma zan iyan midseriǥan te kedtavak dutun he menge kanta.

10 Si Jeshua amey ni Joyakim. Si Joyakim amey ni Eliashib. Si Eliashib amey ni Joyada. 11 Si Joyada amey ni Jonatan. Ne si Jonatan amey ni Jadua.

12 Hein si Joyakim is lavew he memumuhat iyan heini menge pengulu te menge pemilya te menge memumuhat:

Si Meraya is pengulu te pemilya ni Seraya.

Si Hanania is pengulu te pemilya ni Jeremias.

13 Si Meshulam is pengulu te pemilya ni Ezra.

Si Jehohanan is pengulu te pemilya ni Amaria.

14 Si Jonatan is pengulu te pemilya ni Maluc.

Si Jose is pengulu te pemilya ni Shebania.

15 Si Adna is pengulu te pemilya ni Harim.

Si Helkai is pengulu te pemilya ni Merayot.

16 Si Zacarias is pengulu te pemilya ni Iddo.

Si Meshulam is pengulu te pemilya ni Gineton.

17 Si Zicri is pengulu te pemilya ni Abia.

Si Piltai is pengulu te pemilya ni Miniamin wey ni Moadia.

18 Si Shamua is pengulu te pemilya ni Bilga.

Si Jehonatan is pengulu te pemilya ni Shemaya.

19 Si Matenai is pengulu te pemilya ni Joyarib.

Si Uzi is pengulu te pemilya ni Jedaya.

20 Si Kalai is pengulu te pemilya ni Salu.

Si Eber is pengulu te pemilya ni Amok.

21 Si Hashabia is pengulu te pemilya ni Hilkia.

Si Netanel is pengulu te pemilya ni Jedaya.

22 Hein timpu te kedhadì ni Darius ziyà te Persia, inlista is menge ngazan te menge pengulu te menge pemilya te menge memumuhat wey menge Levihanen, dutun te timpu te lavew he menge memumuhat he ensi Eliashib, Joyada, Johanan, wey si Jadua. 23 Is menge pengulu te menge pemilya te menge Levihanen inlista ziyà te Libru te Keguǥuza taman te timpu ni Johanan te apù ni Eliashib.

24 Iyan heini menge pengulu te menge pemilya te menge Levihanen: Si Hashabia, Sherebia, wey si Jeshua he anak ni Kadmiel, wey zuma pa he menge zuma zan he ebpemenhitindeg diyà te atbang dan emun timpu te kegkanta ziyà te valey te Nengazen te menge kedalig wey kebpeselamat te Megbevayà. Iyan heini sikandan edtavak te kanta te zivaluy he grupu, sumalà te insuǥù ni David he suluǥuen te Megbevayà. 25 Ragkes en kandan si Matania, si Bakbukia, wey si Obadias.

Is menge vantey te menge ǥemawan te valey te Nengazen he ebantey te budiga he zurug te ǥemawan iyan si Meshulam, si Talmon, wey si Akub. 26 Nenilbi heini sikandan hein timpu ni Joyakim he anak ni Jeshua wey apù ni Jozadak, wey te timpu ni Nehemias he gubirnedur wey ni Ezra he memumuhat wey menunudlù te Kesuǥuan.

27 Hein timpu te kebpehinunguza te verengbeng te Jerusalem, impetawag is menge Levihanen diyà te ed-ubpaan dan. Impehendiyà sikandan te Jerusalem su wey zan meketampu te melipayen he kedsilibra te kebpehinunguza zuen te verengbeng pinaaǥi te kegkanta te menge kentahan te kebpeselamat wey kedtukar te menge simbal, alpa, wey lira. 28 Impehendiyà daan is menge perekanta he ebpemuun diyà te dezeisey he menge inged he nekeelingkus te Jerusalem wey te menge inged he Netopa. 29 Duen kandan diyà ebpuun te inged diyà te Bet Gilgal, wey ziyà te lugar he ziyà te Geba wey Azmavet. Su is menge perekanta mibangun te keugelingen dan he menge inged diyà te nekeelingkus te Jerusalem. 30 Midhimu te menge memumuhat wey menge Levihanen is tulumanen te kebpenlumpiyu su wey sikandan melumpiyuwi, ne iyan daan haazà mibeelan dan wey melumpiyuwi is menge etew, is menge pultahan te inged wey is berengbeng kayi.

31 Miduma ku is menge pengulu te Juda pehendiyà te zivavew te verengbeng, ne impetiǥum ku is dezuwa he dezekelà he grupu te menge perekanta su wey mepeselemati is Megbevayà pinaaǥi te menge kanta. Is sengegrupu mibmartsa ziyà te zivavew te verengbeng pehendiyà te Pultahan te Timbaǥà te Besura. 32 Midtinundug kandan si Hoshaya wey is ketengà te menge pengulu te Juda, 33 miduma zaan ensi Azaria Ezra, Meshulam, 34 Juda, Benjamin, Shemaya, Jeremias, 35 wey nepipira he menge memumuhat he ebpezaǥing te trumpita. Midtinundug daan si Zacarias he anak ni Jonatan. (Si Jonatan anak ni Shemaya. Si Shemaya anak ni Matania. Si Matania anak ni Micaya. Ne si Micaya anak ni Zacur te kevuwazan ni Asaf.) 36 Midtinundug daan ki Zacarias is menge zuma zin he ensi Shemaya, Azarel, Milalai, Gilalai, Maai, Netanel, Juda wey Hanani. Mid-uwit dan te instrumintu he iring te midtukar zengan ni Hadì David he suluǥuen te Megbevayà. Heini he grupu ebpenguluwan ni Ezra he menunudlù te Kesuǥuan. 37 Hein nekeuma zan diyà te Pultahan Pehendiyà te Serebseb, midtekezeg dan diyà te mid-iring te heǥezan he ibpehendiyà te Inged ni David. Midseǥazan dan is turuǥan ni David taman te nekeuma zan diyà te Pultahan Pehendiyà te Wahig, diyà te zapit te edsilaan he kilid dutun te inged.

38 Is ikezuwa he grupu mibmartsa ziyà te egkeǥivang he vahin duen te zivavew te verengbeng. Midtinundug a kayi he grupu duma te ketengà te menge etew. Mibayè key ziyà te kilid te Turi he zuen Duen menge Hepuyan he ibpehendiyà te Meluag he Berengbeng. 39 Ne puun dutun midlaus key ne mibayè key ziyà te Pultahan ni Efraim, diyà te Zaan he Pultahan, diyà te Pultahan te menge Isdà, diyà te Turi ni Hananel, wey ziyà te Turi te Nenggatus. Ne zutun mibayè key ziyà te Pultahan te menge Kerehidu ne mibpundu key ziyà te Pultahan te Bantey.

40 Is dezuwa he grupu he mibpeselamat te Megbevayà dutun te ebmartsa zan, midiritsu zan diyà te valey te Megbevayà. Midiritsu e zaan wey is ketengà te menge upisyal he zuma ku. 41 Dutun daan is menge memumuhat he ebpezaǥing te trumpita he iyan ensi Eliakim, Maasea, Miniamin, Micaya, Elioenai, Zacarias, wey si Hanania, 42 wey is menge perekanta he ensi Maasea, Shemaya, Eleazar, Uzi, Jehohanan, Malkia, Elam, wey si Ezer. Heini he menge perekanta ebpenguluwan ni Jezrahia. 43 Dutun he andew, nemuhat sikandan te mezakel he menge pemuhat wey midlipeylipey zan, su utew sikandan midlipey te Megbevayà. Ragkes he midlipey is menge vahi wey menge vatà. Umbe is keǥurub te kedlipey zan ne egkezineg pa ziyà te meziyù.

44 Dutun daan he andew, duen menge maama he impezumala te menge budiga he teleǥuey te menge gasa, egkehuna he egkeraǥun, wey ikepulù. Iyan sikandan egkulikta te menge halad he ebpuun diyà te menge vevesukà diyà te nekeelingkus he menge inged ne para haazà te menge memumuhat wey menge Levihanen, sumalà te insuǥù diyà te Kesuǥuan. Su nelipey is menge etew ziyà te Juda te vuluhaten te menge memumuhat wey menge Levihanen. 45 Midhimu zan is tulumanen he kebpenlumpiyu wey zuma pa he menge vuluhaten he ibpetuman kandan te Megbevayè dan. Mibeelan daan te menge perekanta wey menge vantey te menge ǥemawan te valey te Nengazen is kandan he vuluhaten he iyan insuǥù ni Hadì David wey te anak din he si Solomon. 46 Puun pa te timpu ni Hadì David wey ni Asaf, duen en nengulu te menge perekanta te kedalig wey kebpeselamat te Megbevayà. 47 Umbe, hein timpu ni Zerubabel wey ni Nehemias, is langun he menge Israilihanen mibeǥey te menge halad he para te menge perekanta wey te menge vantey te menge ǥemawan te valey te Nengazen, wey ragkes is para te menge Levihanen. Ne is nezawat te menge Levihanen, mibehinan dan dutun is menge memumuhat he menge kevuwazan ni Aaron.

<- Nehemias 11Nehemias 13 ->