1 Dutun he timpu, is menge pengulu te menge etew ziyà te Israel ziyè ed-ubpà te Jerusalem, he iyan kes segradu he inged. Dutun midripa is menge etew he ziyè med-ubpà te gawas te Jerusalem su egkeusatan dan he kada sepulù he pemilya ne zuen senge pemilya he ziyà ebpekeubpà te Jerusalem, ne sikan is egkesamà ne kenè en mulà ed-awà diyà te menge inged dan. 2 Midalig te menge etew is langun he mibuluntaryu he ed-ubpà diyà te Jerusalem.

3-4 Is duma he menge Israilihanen, ragkes is menge memumuhat, menge Levihanen, menge suluǥuen diyà te valey te Nengazen, wey is menge kevuwazan te menge suluǥuen ni Solomon, mibpedayun dan med-ubpà diyà te keugelingen dan he menge tanà diyà te nekedseselekawà he menge inged diyà te Juda. Is duma he menge etew ziyà te Juda wey Benjamin, diyà med-ubpà te Jerusalem.

Iyan heini menge pengulu ziyà te prubinsya he Juda wey Benjamin he ziyà med-ubpà te Jerusalem.

Is ebpuun diyà te tribu ni Juda:

Si Ataya he anak ni Uzia. (Si Uzia anak ni Zacarias. Si Zacarias anak ni Amaria. Si Amaria anak ni Shefatia. Ne si Shefatia anak ni Mahalalel he ebpuun diyà te kevuwazan ni Perez.)

5 Si Maasea he anak ni Baruc (si Baruc anak ni Col Hose; si Col Hose anak ni Hazaya; si Hazaya anak ni Adaya; si Adaya anak ni Joyarib; ne si Joyarib anak ni Zacarias he ebpuun diyà te kevuwazan ni Shela). 6 (Is menge kevuwazan ni Perez, duen kandan 468 he egkeseriǥan he menge maama he ziyè en med-ubpà te Jerusalem.)

7 Is ebpuun diyà te tribu ni Benjamin:

Si Salu he anak ni Meshulam (si Meshulam anak ni Joed; si Joed anak ni Pedaya; si Pedaya anak ni Kolaya; si Kolaya anak ni Maasea; si Maasea anak ni Itiel; ne si Itiel anak ni Jeshaya); 8 is sunud ki Salu iyan si Gabai wey si Salai.

Is kezakel te menge Benjaminhen 928 langun. 9 Si Joel he anak ni Zicri iyan lavew he pengulu zan ne is ebpeketinundug kandin iyan si Juda he anak ni Hasenua.

10 Is ebpuun diyà te menge memumuhat:

si Jedaya he anak ni Joyarib, si Jakin, 11 wey si Seraya he anak ni Hilkia (si Hilkia anak ni Meshulam; si Meshulam anak ni Zadok; si Zadok anak ni Merayot; ne si Merayot anak ni Ahitub he edumala te valey te Megbevayà);

12 is duma zan he edterebahu ziyà te valey te Nengazen 822 he menge maama;

si Adaya he anak ni Jeroham (si Jeroham anak ni Pelalia; si Pelalia anak ni Amzi; si Amzi anak ni Zacarias; si Zacarias anak ni Pashur; ne si Pashur anak ni Malkia);

13 is menge zuma ni Adaya 242 he menge maama he menge pengulu te menge pemilya;

si Amashsai he anak ni Azarel (si Azarel anak ni Azai; si Azai anak ni Meshilemot; ne si Meshilemot anak ni Imer);

14 is menge zuma ni Amashsai 128 he egkeseriǥan he menge maama.

Is lavew he pengulu zan iyan si Zabdiel he anak ni Hagedolim.

15 Is ebpuun diyà te menge Levihanen:

si Shemaya he anak ni Hashub (si Hashub anak ni Azrikam; si Azrikam anak ni Hashabia; ne si Hashabia anak ni Buni);

16 si Shabetai wey si Jozabad, he iyan kes dezuwa he midseriǥan te kedumala te menge vuluhaten te menge Levihanen diyà te ǥawas te valey te Nengazen;

17 si Matania he anak ni Mica (si Mica anak ni Zabdi, ne si Zabdi anak ni Asaf). Si Matania iyan nengegalen te menge perekanta te kegkanta te ampù he para te kebpeselamat;

si Bakbukia he zuma ni Matania;

si Abda he anak ni Shamua (si Shamua anak ni Galal, ne si Galal anak ni Jedutun).

18 Is kezakel te menge Levihanen he mid-ubpà diyà te Jerusalem, he iyan kes segradu he inged, 248 langun.

19 Is ebpuun diyà te menge vantey te menge ǥemawan te valey te Nengazen:

si Akub wey si Talmon, wey is menge zuma zan he ebantey ziyà te menge ǥemawan te valey te Nengazen he 172 he menge maama.

20 Is duma he menge Israilihanen, ragkes is menge memumuhat wey menge Levihanen, diyà med-ubpà te nepengevilin dan he menge tanà he ziyà te nekedseselekawà he menge inged diyà te Juda. 21 Piru is menge suluǥuen diyà te valey te Nengazen he ebpenguluwan ni Ziha wey ni Gishpa, diyè dan med-ubpà te mibuntud-buntud he Ofel.

22 Is lavew he pengulu te menge Levihanen diyà te Jerusalem iyan si Uzi he anak ni Bani. (Si Bani anak ni Hashabia. Si Hashabia anak ni Matania. Ne si Matania anak ni Mica.) Si Uzi sevaha te menge kevuwazan ni Asaf, he iyan menge perekanta ziyà te valey te Megbevayà. 23 Iyan is hadì ebmandù te menge perekanta vahin te vuluhaten dan kada andew.

24 Si Petahia he anak ni Meshezabel, he sevaha te menge kevuwazan ni Zera te anak ni Juda, iyan beǥelawa te menge Israilihanen te ked-etuvang te hadì te Persia.

25 Is duma he menge etew ziyà te Juda, ziyè med-ubpà te menge inged he uvey te menge vevesukà dan. Is duma kandan, diyè med-ubpà te Kiriat Arba, Dibon, Jekabzeel, wey ziyà te zezeisey he menge inged he nekeliǥuy kayi he menge inged. 26 Ne is duma pa, ziyè med-ubpà te Jeshua, Molada, Bet Pelet, 27 Hazar Shual, Beersheba, wey ziyà te menge inged he nekeliǥuy kayi. 28 Duen kandan diyà med-ubpà te Ziklag, Mecona wey ziyà te menge inged he nekeliǥuy kayi he menge inged, 29 te En Rimon, Zora, Jarmut, 30 Zanoa, Adulam, wey ziyà te menge inged he nekeliǥuy kayi he menge inged. Is duma pa kandan diyè med-ubpà te Lakish wey ziyà te uvey he menge vevesukà, wey ziyà te Azeka, wey ziyà te menge inged peliǥuy kayi. Umbe is neperenrenakan te neubpaan te menge etew ziyà te Juda ne puun te Beersheba taman te Suǥud-suǥud te Hinom.

31 Is duma he menge etew ziyà te Benjamin, diyè med-ubpà te Geba, Micmash, Aya, Betel, wey te menge inged he nekeelingkus kayi. 32 Is duma pa kandan diyè med-ubpà te Anatot, Nob, Anania, 33 Hazor, Rama, Gitaim, 34 Hadid, Zeboim, Nebalat, 35 Lod, Ono, wey ziyà te Suǥud-suǥud te menge Meturiǥes. 36 Is duma he menge Levihanen he menge meǥinged diyà te Juda impeubpà duma te menge etew te Benjamin.

<- Nehemias 10Nehemias 12 ->