Micas

Migkaǥi si Micas te, 2 “Purung kew pemineg, is langun he menge etew kayi te kelibutan! Su edtistiǥus kuntra keniyu is Nengazen he MEGBEVAYÀ puun te segradu he valey zin.”

3 Pemineg kew! Egawas is Nengazen puun te mid-ubpaan din. Ebulus sikandin ne egiek diyà te metikang he menge lugar kayi te kelibutan. 4 Egketunew is menge vuntud he egkeǥiekan din iring te kendilà he egketunew te hapuy, ne egkeǥadgad is menge suǥud he egkeǥiekan din iring te ebeyaan te wahig he edtudà diyà te kelendiǥan. 5 Egkehitavù heini is langun tenged te mibaal te salà is menge etew te Israel wey Juda. Is menge tig-Samaria, iyan midtukù te zuma he menge meǥinged diyà te Israel te kebaal te salà. Is menge tig-Jerusalem, iyan midtukù te zuma he menge meǥinged diyà te Juda te ked-azap te zuma he menge ed-ezapen. 6 Umbe, migkaǥi is Nengazen te, “Edezeetan ku is Samaria ne kenè en heini egkeubpaan, kekenà, ebpemulaan dà te paras. Edlilizen ku is menge vatu kayi pehendiyà te suǥud taman te ebpekelepew is menge pundasyun kayi. 7 Egkengerupet is langun he menge ledawan te menge ed-ezapen diyà te Samaria, ne egketutung is langun he imbayad te menge maama te kebpekidhilavet dan te menge vahi he ebelegyà te zengeg dan diyà te simbahan. Neketiǥum is menge tig-Samaria te menge ledawan pinaaǥi te kebeyazi te menge vahi he ebelegyà te zengeg dan diyà te simbahan. Umbe ǥuntaan, is menge kuntada zan, egkuwaan dan is menge pelata wey menge vulawan he impekaplà diyà te menge ledawan dutun su ibayad dan daan wey zan mekepekidhilavet te menge vahi ziyà te simbahan para te zuma he menge ed-ezapen diyà te kandan.”

8 Migkaǥi si Micas te, “Tenged te kegkezeeti te Samaria, ne edisineǥew a wey ebpenhulùhulù a. Edhipanew a he wazà apid te paa ku wey kenà a egkukumbalà su ibpeehè ku is kedlalew ku. Edtaul a iring te leew he asu wey ed-iringan ku is kegkaǥi te ekang. 9 Su is kegkezeeti te Samaria ne iring te palì he kenè en egkeulian, ne egkeulaula zaan heini ziyà te Juda. Ne ebpekeuma heini ziyà te Jerusalem kes kepital he inged te menge zuma ku he menge meǥinged.

10 “Sikiyu is menge tig-Juda, kenè niw tudtuli is menge kuntada tew he menge tig-Gat bahin te kezeetan he ebpekeuma ziyà te kenitew. Kenè niw ipaahà kandan he edsineǥew kew. Ne ipeehè niw mulà is kegkeseeng niw ziyà te Bet Leafra pinaaǥi te kedtelilid niw ziyà te tanà.

11 “Sikiyu is menge meǥinged diyà te Shafir, ebihaǥen kew ne edumahan he menge lelevas, umbe egkepeel-elezan kew. Is menge meǥinged diyà te Zaanan egkahandek en he egawas diyà te lugar zan te kedtavang keniyu. Is menge tig-Bet Ezel he edsineǥew tenged te kegkezeeti zan ne kenè daan ebpekelavan keniyu. 12 Benar iyan, is menge meǥinged diyà te Marot ebperateng te kegkeengked te tebek. Piru intuǥut pa ganì te Nengazen he mekeuvey is menge kuntada ziyà te pultahan te Jerusalem.

13 “Sikiyu is menge meǥinged diyà te Lakish, senggari niw te menge kerwahi is menge kudè niw ne pelaǥuy kew. Mid-iringan niw is salà te menge tig-Israel, ne tenged keniyu mibaal zaan te salà is menge tig-Zion.

14 “Ne ǥuntaan sikiyu is menge tig-Juda, pemazè kew en diyà te inged he Moreshet Gat su ebihaǥen en is menge etew kayi te menge kuntada. Ebihaǥen daan is menge meǥinged diyà te inged he Aczib, umbe wazà tavang he egkekuwa te menge hadì niw he ebperateng te tavang puun keniyan he inged.

15 “Sikiyu is menge meǥinged diyà te Maresha, edsuǥuen te Nengazen is menge kuntada niw pehendiyà te keniyu he ed-aǥew te inged niw.

“Sikiyu is menge tig-Juda, is menge pengulu niw ed-eles diyà te surung he Adulam. 16 Is pelanggè niw he menge anak, egkuwaan diyà te keniyu ne ed-uwiten diyà te zuma he lugar, umbe idlalew niw is menge anak niw ne ibpeehè niw heini pinaaǥi te kegkiskisi niw te ulu niw iring te ulu te vanug.”

Micas 2 ->