Malakias 3

1 Pemineg kew te migkaǥi te Nengazen he Mekeǥeǥehem, “Edsuǥuen ku is menunudtulè ku te ked-andam te ibayè ku. Ne is Nengazen he ebperetengen niw segugunè dà he ebpekeuma zutun te valey zin. Ebpekeuma is ebpengenduyen niw he menunudtulà te kebpekid-uyun ku.”

2 Piru hentei vuwa is ebpekaantus dutun te andew te kebpekeuma zin? Hentei vuwa is ebpekehimu he ed-etuvang kandin emun ebpekelepew en? Su iring sikandin te hapuy he idlunsey te vulawan wey sabun he utew ebpekeimu te vuring. 3 Edhukum sikandin he iring te hapuy he edlunsey te pelata; edlunsayen din is menge Levihanen wey edlunsayen te pelata wey vulawan. Ne zutun ebpemuhaten dan en human is Nengazen te hustu he menge pemuhat. 4 Ne zutun, is menge pemuhat te menge etew ziyà te Juda wey Jerusalem, ne ebpekepenunuat en human te Nengazen, iring duen te nehuna he menge andew wey menge tuig.

5 Migkaǥi is Nengazen he Mekeǥeǥehem te, “Edhendiyà a te keniyu su edhukum a. Segugunè ku ibpetueni is menge salà te menge veyilan, menge mengungumpadi, menge ebpenistiǥus te tarù, menge egalen he ebpenlimbung, menge ebpemintahà te menge valu he vahi wey menge ilu, wey menge lumelengyawà, wey is menge wazè dan kedtahud kedì.”

Is Kebpenekawi te Megbevayà

6 Migkaǥi pa is Nengazen he Mekeǥeǥehem, “Siak, is Nengazen, kenà a egkahalin. Umbe wazè kew mepuew is menge kevuwazan ni Jacob. 7 Sikiyu is menge Israilihanen, ne puun pa te menge kepuun niw, midsuwayan niw en is menge suǥù ku ne wazè niw tumana. Guntaan, likù kew kayi te kediey, te Nengazen he Mekeǥeǥehem, ne edlikù a ziyà te keniyu. Piru ed-insè kew te, ‘Wazè dey man sikew ewai; ebmenumenu key te kedlikù diyan?’ 8 Ed-insè kew zaan te, ‘Egkepenekawan be te etew is Megbevayà?’ Piru mibpenekawan a keniyu. Ne ed-insè kew te, ‘Hengkey is paaǥi te kebpenekawi zey kenikew?’ Pinaaǥi te kenè niw kebeǥaya te menge ikepulù niw wey menge halad niw. 9 Nesuǥat kew te rawak, is menge etew kayi te tivuuk he Israel su mibpenekawan a keniyu. 10 Guntaan, egkeǥiyan ku sikiyu he ǥezami a keniyu, is Nengazen he Mekeǥeǥehem. Uwita niw is tivuuk he ikepulù niw ziyà te budiga ziyà te valey ku su para zuen egkekaan dutun te valey ku. Emun ebeelan niw heini, ebpeuwitan ku sikiyu te uzan ne ebeǥayan ku sikiyu te ebpenubra he tuvad. 11 Kenè ku idtuǥut he dezeeti te ebpekezezaat te pinemula is menge pinemula niw, is menge paras niw ziyà te menge pemuleey niw ne kenà egkengerapi is beǥas dan, migkaǥi is Nengazen he Mekeǥeǥehem. 12 Ne is menge etew ziyà te langun he menge nasyun egngezanan kew zan te utew zeyzey su is tanè niw egkehimu man he dezeyaan is ked-ubpà duen, migkaǥi is Nengazen he Mekeǥeǥehem.”

13 Migkaǥi pa is Nengazen te, “Mezaat is menge lalag niw mehitenged kedì. Piru ed-insè kew te, ‘Hengkey is migkaǥi zey he mezaat mehitenged kenikew?’ 14 Migkaǥi kew te, ‘Wazà pulus te kebpenilbi te Megbevayà. Hengkey is egkekuwa tew zutun te kedtuman tew te menge ibpeveelan din wey kebpaahà diyà te Nengazen he Mekeǥeǥehem he ingkeseeng tew is menge salè tew?’ 15 Ke sikiyu zaan te, ‘Sumalà te neehè tew, iyan is menge mepelevawen nengezeyzey. Utew mid-uswag is mezaat is menge vaal zan, ne minsan sikan is midhinggat dan is Megbevayà he mepauk kandan pinaaǥi te mezaat he menge vaal zan ne wazà memenu.’ ”

16 Duen menge etew zutun he zuen dan kegkehandek te Nengazen. Hein nezineg dan heini is menge lalag, mibpelelelaǥè dan ne nemineg kandan is Nengazen, ne nezineg din sikandan. Ne ziyà te etuvangan din duen belesahan he midsuratan te mehitenged duen te zuen dan kegkehandek wey kedtahud te Nengazen.

17 Migkaǥi is Nengazen he Mekeǥeǥehem te, “Egkehimu sikandan he menge etew ku. Dutun te andew te kedhukum ku ne egkaangken ku en sikandan. Egkehizuwan ku sikandan, iring a te amey he egkehizu te anak din he nenilbi kandin. 18 Ne egkeuman niw en maan egkaahà is mibizahayan te metazeng wey lalung, is mibizahayan te ebpenilbi te Megbevayà wey kenà ebpenilbi kandin.”

<- Malakias 2 Malakias 4 ->