9-11 Emun diyè kew en te tanà he ibeǥey te Nengazen keniyu, ipemuhat niw ziyà te kandin is egkehuna he vinagkes niw he menge pungu te kada kedraǥun niw. Uwita niw heini ziyà te memumuhat dutun te sunud he andew te Andew te Kedhimeley, ne ibayew heini te memumuhat diyà te etuvangan te Nengazen su wey kew zewata te Nengazen pinaaǥi kayi. 12 Dutun daan he andew, pemuhat kew ziyà te Nengazen te kerehidu he senge-tuig is keǥurang din he wazè din sazir he pemuhat he edtutungen. 13 Lepiki niw heini te pemuhat he para gasa he heepat he kilu he meupiya he kelasi te herina he midsehuǥan te lana, wey senge litru he vinu he pemuhat he inumen. Pemuhat heini he pinaaǥi te hapuy, is kehemut kayi ebpekepenunuat te Nengazen. 14 Emun wazè niw pa heini ikepemuhat, ne kenè kew pa megkaan te minsan hengkey he kelasi te keenen he zuma te beǥu he midraǥun niw, mehilew man heini etawa sinandag etawa midlutù he supas. Heini he sulunuzen, kinahanglan he tumana niw taman te huziyan he lapis te menge kevuwazan niw, minsan hendei kew ed-ubpà.

15-17 Kedlavey zutun te pitu he simana he iyan kebpuun te andew zutun te kedhelaza niw zuen te menge vinagkes he pungu, tiǥum kew ne pemuhat kew uman te pemuhat he para gasa puun dutun te menge pungu he veǥu pa he ineǥani niw. Ul-ulaha niw heini zutun te ike-50 he andew, he iyan kes andew te kegkeiwas te ikepitu he Andew te Kedhimeley. Is idhalad niw, ne zezuwa he supas he mibeelan he ziyà ebpuun te heepat he kilu te meupiya he kelasi te herina, he zuen din tapey. Ipemuhat niw heini he pemuhat he ibayew he ebpuun te nehuna he neraǥun niw. 18 Perisi niw heini te pitu he meemahan he kerehidu, he tig senge-tuig is keǥurang, sevaha he turiti he vaka, wey zezuwa he meemahan he kerehidu, he wazè dan menge sazir. Ipemuhat niw heini he pemuhat he edtutungen duma te pemuhat he para gasa duma zuen te pemuhat he inumen. Is kehemut kayi he pemuhat te pinaaǥi te hapuy ne ebpekepenunuat te Nengazen. 19 Ne pemuhat kew zaan te sevaha he meemahan he kambing he pemuhat he para idlumpiyu, wey zezuwa he kerehidu he tig senge-tuig is keǥurang dan he para te meupiya he kebpekidepità diyà te Nengazen. 20 Ne ibayew te memumuhat diyà te etuvangan te Nengazen sikan is dezuwa he kerehidu wey is pemuhat he zuma te nehuna he neraǥun. Segradu heini he menge pemuhat diyà te Nengazen ne vahin heini te menge memumuhat. 21 Dutun he andew kenè kew medterebahu, kekenà, tiǥum kew te ked-azap te Nengazen. Heini he sulunuzen, ne kinahanglan he tumana niw taman te huziyan he lapis te menge kevuwazan niw, minsan hendei kew ed-ubpà.

22 Emun edraǥun kew ne kenè niw emina te edraǥun is diyà te kilid te pemuleey niw, ne kenè niw en likui wey pekirerawa. Teǥaka niw en heeyan he para te menge pubri wey menge langyew he kenà menge Israilihanen. Iyan heini suǥù te Nengazen he Megbevayè niw.

23-24 Dutun te egkehuna he andew te ikepitu he vulan te tuig, himeley kew para te kedtentenuzi niw te Nengazen. Emun egkezineg niw is kebpezaǥing te menge trumpita, ne tiǥum kew te ked-azap kandin. 25 Kenè kew terebahu zutun he andew, kekenà, pemuhata niw is Nengazen te pemuhat pinaaǥi te hapuy.

26-28 Dutun te ikesepulù he andew kayi te ikepitu he vulan, iyan kes Andew te Kebelukas. Kenè kew terebahu keniyan he andew, kekenà, tiǥum kew te ked-azap te Nengazen. Puasa kew wey pemuhata niw sikandin te pemuhat pinaaǥi te hapuy. Su keniyan he andew ebeelan is tulumanen te kebelukasi keniyu tenged te menge salè niw diyà te etuvangan te Nengazen he Megbevayè niw. 29 Is kenà ebpuasa zutun he andew ne kenè niw en isipa he zuma niw. 30 Edhimetayan te Nengazen is minsan hentei he edterebahu keniyan he andew. 31-32 Umbe, himeley kew wey puasa kew puun te kedsanlep te andew te ikesiyew he andew te haazà he vulan taman te sunud he kedsanlep te andew. Kinahanglan he tumana niw heini he sulunuzen taman te huziyan he lapis te peleebuten he menge kevuwazan niw, minsan hendei kew ed-ubpà.

33-34 Dutun te ike-15 he andew te ikepitu he vulan ebpuunan is Pista te Kebaal te menge Lawig, ne silibraha niw heini seled te pitu he andew. 35 Dutun te egkehuna he andew kenè kew terebahu, kekenà, tiǥum kew te ked-azap te Nengazen. 36 Seled te pitu he andew ebpemuhat kew ziyà te Nengazen te pemuhat pinaaǥi te hapuy. Ne ikewalu he andew kenè kew en maan terebahu, kekenà, tiǥum kew en maan te ked-azap te Nengazen, ne pemuhata niw sikandin. Ketepusan heini he andew te kedtiǥum niw.

37 Iyan heini ispisyal he menge timpu he zutun edtiǥum kew te ked-azap te Nengazen wey kebpemuhat te menge pemuhat pinaaǥi te hapuy. Kinahanglan he uwit kew te menge pemuhat he edtutungen, pemuhat he para gasa, pemuhat he para te meupiya he kedepità, wey menge pemuhat he inumen, he kinahanglan he ibpemuhat niw zutun te netendek he timpu te kebpemuhata kayi. 38 Silibraha niw heini is ispisyal he menge timpu he ebpekeuman te Andew te Kedhimeley he ebeelan niw kada simana. Wey ipemuhat niw heini he menge pemuhat he ebpekeuman te menge gasa niw, menge pemuhat he para te kedtuman te menge penaad niw, wey menge pemuhat he kineugelingen he suat he ibpemuhat niw ziyà te Nengazen. 39 Emun mehitenged te Pista te Kebaal te menge Lawig, ne silibraha niw heini he para te kebeǥey te zengeg diyà te Nengazen puun te ike-15 he andew te ikepitu he vulan, dutun te tevas. Silibraha niw heini seled te pitu he andew; kenè kew medterebahu zutun te egkehuna he andew wey ikewalu he andew. 40 Dutun te egkehuna he andew kuwa kew te kineupiyahan he menge veǥas te menge kayu, menge zahun te palma, menge subpang te merapung he menge kayu, wey dezeisey he kayu ziyà te pangpang, ne medlipey kew ziyà te etuvangan te Nengazen he Megbevayè niw seled te pitu he andew. 41-43 Silibraha niw heini he pista ziyà te ikepitu he vulan kada tuig para te kebeǥey te zengeg diyà te Nengazen. Seled te pitu he andew, ubpè kew ziyà te menge lawig su wey metueni te menge kevuwazan niw he impeubpà te Nengazen he Megbevayè niw is menge kepuun niw ziyà te menge lawig hein impeǥawas din sikandan puun te Ehipto. Heini he sulunuzen, ne kinahanglan he tumana niw taman te huziyan he lapis te menge kevuwazan niw.

44 Iyan haazà sikan is ispisyal he menge timpu te ked-ezap te Nengazen he impetuenan ni Moises te menge Israilihanen.