1 Midsuǥù te Nengazen si Moises he keǥiya zin heini ziyà te menge memumuhat he kevuwazan ni Aaron:

Kenè niw remeriki is keugelingen niw pinaaǥi te kedtampu te kedlevenga te iring niw he Israilihanen, 2 gawas ke is ebpatey utew niw en megeget iring te iney niw, amey niw, anak niw, suled niw he maama, 3 etawa etevey niw he wazè din pa esawa, ne midsarig pa keniyu. 4 Kenè niw zaan remeriki is keugelingen niw pinaaǥi te kedtampu te kedlevenga te kezuzumahi te esawa niw. 5 Emun edlalew kew tenged te minatey, ne kenè niw kiskisi is minsan hendei he vahin te ulu niw, kenè niw tempezi is sumpè niw, wey kenè niw pelii is lawa niw. 6 Kinahanglan he idhalad niw is keugelingen niw para kediey te Megbevayè niw, wey kenè niw pendezeisaya is ngazan ku. Beeli niw heini su iyan kew man ebpemuhat te menge pemuhat pinaaǥi te hapuy, he iyan keenen ku.

7 Kinahanglan he kenè kew mebpengesawa te vahi he meremerik su ebelegyà te zengeg din, etawa vahi he midsuwayan te esawa zin, su insivey kew para kediey. 8 Kinahanglan he segradu is ked-isipa keniyu te zuma niw he menge Israilihanen su iyan kew ebpemuhat te menge pemuhat kayi te kediey, te Nengazen, he waǥas, ne edhimuwen ku is menge etew ku he wazà igkesewayi.

9 Emun duen niw anak he vahi he ebpeelimungew keniyu tenged te kebelegyè din te zengeg din, ne tenged dutun ed-isipen sikandin he meremerik, kinahanglan he ebinsulan sikandin.

10 Emun egkeseeng is lavew he memumuhat tenged te minatey, kinahanglan he kenè din gusenga is bulvul zin wey kenè din bindasa is bisti zin. 11 Kinahanglan he edsenggilahan din is kebpekesamsam te minatey, minsan pa ke amey zin etawa iney zin. 12 Ne ǥeina te inhalad sikandin kayi te kedì he lavew he memumuhat pinaaǥi te kedlenahi kandin, kenà sikandin ereg he ed-awà diyà te Tulda he Edtelevukaayan te kedtampu te kedleveng, su emun ebeelan din heini ne egkeremerikan sikan is tulda. Iyan a kes Nengazen.

13-14 Is ed-esewaan te lavew he memumuhat kinahanglan he wazè pa mekeremaǥi wey iring din he Israilihanen. Kenà sikandin mebpengesawa te valu etawa vahi he midsuwayan te esawa zin, etawa vahi he meremerik su ebelegyà te zengeg din. 15 Pinaaǥi te kedtumana kayi te memumuhat kenà ed-isipen he meremerik is menge anak din. Iyan a is Nengazen midsivey kandin para mehimu he lavew he memumuhat.

16 Midsuǥù te Nengazen si Moises 17 he keǥiya zin heini ziyà te ki Aaron:

Wazà minsan hentei te menge kevuwazan nu he taman te huziyan he lapis te menge kevuwazan he ebpekepenilbi pinaaǥi te kegkememumuhat emun duen sazir te lawa zin. 18 Kenà egkehimu is lakap, pigket, duen sazir te kebuvuked din, duen sazir ziyà te lawa zin, 19 nelepuan is paa zin etawa velad, 20 bekut, inanu, duen din daru ziyà te mata etawa lundis, etawa kenà ebpekaanak. 21-23 Umbe, emun duen sazir te kevuwazan ni Aaron, ne kenà egkehimu he ebpemuhat kayi te kedì te menge pemuhat pinaaǥi te hapuy, he iyan keenen ku. Wey kenà daan egkehimu ke edseled sikandin diyà te Segradu he Lugar wey ed-uvey zuen te pemuhatà su egkeremerikan is Tulda ku. Piru egkehimu ke egkaan sikandin te menge keenen he vahin te menge memumuhat duen te segradu he pemuhat wey zuen te utew segradu he pemuhat. Iyan a is Nengazen midsivey keniyu para kedì.

24 Umbe, migkaǥi heini is langun ni Moises diyà te ki Aaron wey ziyà te menge kevuwazan din he menge maama, wey ziyà te langun he menge Israilihanen.

<- Leviticus 20Leviticus 22 ->