1 Ne migkaǥi is Nengazen diyà te ki Josue te, “Kenè ka mahandek etawa luyahi. Tiguma nu is langun he menge sundaru nu ne umani niw surunga is Ai, su ebpeveyveyaan ku en kenikew is hadì te Ai, is menge etew zin, is inged din, wey is tanè din. 2 Beeli niw ziyà te Ai wey ziyà te hadì dutun is iring te mibeelan niw ziyà te Jerico wey zuen te hadì te Jerico; piru ǥuntaan egkehimu en human ke egkuwaan niw is menge azen dan wey is menge uyaǥen dan he para en keniyu. Pengandam kew ne eyani niw sikandan, ne ziyè kew vayà te egkeiniyuǥan te inged.”

3 Umbe, nengandam si Josue wey is langun he menge sundaru zin para te kedsurung dan diyà te Ai. Mibpilì si Josue te 30,000 he menge sundaru he metau he ebpekidtebek ne impelapus din sikandan. 4 Ne ke sikandin diyà te kandan te, “Eles kew ziyà te egkeiniyuǥan te inged, piru kenè kew utew mebpekeziyù dutun te inged. Pengandam kew te kedsurung niw te minsan hengkey he uras. 5 Ne siak wey is menge zuma ku ne ziyè key mulà ebayà te etuvangan te inged is edsurung. Ne emun egawas en is menge tig-Ai te kebpekidtebek kenami, ne ebpemelaǥuy key iring duen te nehuna he kedsurung tew. 6 Ne zutun, ebpekekaǥi sikandan te nengahandek key iring duen te nehuna he nehitavù, ne zutun edel-asen key zan ne ebpezal-as key taman te ebpekepekeziyù sikandan puun te inged. 7 Ne zutun seǥuǥunè kew ǥawas puun te mid-elesan niw ne eǥawa niw is inged. Ibeǥey heini keniyu te Nengazen he Megbevayè niw. 8 Ne emun egkaaǥew niw en heini binsuli niw su iyan heeyan suǥù te Nengazen. Sigureduwa niw he metuman niw heini.” 9 Ne impeǥenat sikandan ni Josue, ne mid-eles dan diyà te zapit te edsenlepan emun dutun ki te Ai, diyà te pid-elangan te Ai wey Betel. Ne zutun he kezukileman wazè pa si Josue med-awà diyà te kampu zan duma te menge etew.

10 Ne hein nepawà, midsayu med-enew si Josue ne midtiǥum din is menge etew zin. Ne iyan sikandin wey is menge pengulu te Israel nengegalen te menge etew te kedhendiyà te Ai. 11 Ne nekeuma zan diyà te sevaha he lugar he egkesineruwan te pultahan dutun te inged he Ai, ne mibangun sikandan te menge tulda ziyà te egkezivavà kayi. Ne zuen suǥud-suǥud diyà te pid-elangan kayi wey Ai. 12 Duen en impehuna ni Josue he 5,000 he menge sundaru te kedsurung dutun te inged. Diyè dan mebpelastar te zapit te edsenlepan dutun te inged, diyà te tengàtengà te Ai wey Betel. 13 Umbe, iyan heini kebpekepelastar te menge sundaru: is duma he menge sundaru, ne ziyà te zivavà dutun te inged, ne is duma pa, diyà dapit te edsenlepan kayi.

Ne zutun he kezukileman midhendutun ensì Josue te suǥud. 14 Ne hein naahà sikandan duen te hadì diyà te Ai, ne migaanggaan sikandin megawas dutun te inged duma te menge etew zin te utew pa meselem, ne midhendiyè dan te lugar he egkesineruwan te Suǥud te Jordan su ebpekidtebek dan te menge Israilihanen. Wazè dan metueni he zuen bes edsurung kandan he ebpuun diyà te egkeiniyuǥan dutun te inged. 15 Ne si Josue wey is menge etew zin ne uvag kun nezaag sikandan, ne mibpelaǥuy zan pehendiyà te sibsivayan. 16 Ne midal-as kandan is langun he menge maama ziyà te Ai taman te neziyuan dan en haazà is inged. 17 Is langun he menge maama ziyà te Ai wey ziyà te Betel midal-as dan is menge Israilihanen, umbe wazà nesamà he ebpekidtebek para kenà maaǥew haazà is inged.

18 Ne migkeǥiyan si Josue te Nengazen te, “Bentanga nu is bangkew nu ziyà te Ai su ibeǥey ku kenikew is Ai.” Umbe mibantang ni Josue is bangkew zin diyà te Ai. 19 Ne segugunà nenggawas sikan is menge etew zin puun te mid-elesan dan. Midseled dan dutun te inged ne migègaanan dan heini binsuli. 20 Ne kedlilingey te menge tig-Ai, neehè dan is evel he ebpuun dutun te inged. Wazè dan en egkepeleǥuyan su mid-etuvang en man sikandan duen te menge Israilihanen he edel-asen dan pehendiyà te sibsivayan. 21 Su hein naahà ni Josue wey te menge etew zin he nekeseled en duen te inged is menge zuma zan ne mibinsulan dan en heini, midlikù sikandan is ed-etaki te menge tig-Ai. 22 Ne mid-etaki zaan is menge Israilihanen he midseled dutun te inged, umbe nelingutan is menge tig-Ai. Mibpenhimetayan eni Josue sikandan is langun; wazà nekepelaǥuy kandan ne wazà neuyag kandan, 23 gawas duen te hadì dan. Mibihag dan heini ne mid-uwit dan diyà te ki Josue. 24 Hein naamin dan en te edhimatey is langun he menge tig-Ai he midal-as kandan diyà te menge pemuleey wey ziyà te sibsivayan, midlikuan dan sikan is inged ne mibpenhimetayan dan is langun he nesamà dutun. 25 Dutun he andew mibpatey is langun he meǥinged diyà te Ai–12,000 langun he menge maama wey menge vahi. 26 Wazà engkezi ni Josue is kebantang duen te vangkew zin diyà te Ai taman te naamin mebpatey is langun he meǥinged dutun. 27 Mibpenguwa te menge Israilihanen is menge uyaǥen wey menge azen dutun te inged, sumalà is migkaǥi te Nengazen diyà te ki Josue. 28 Ne kegkepasad dutun, mibpevinsulan ni Josue is tivuuk he Ai ne wazè en heini meuman mevangun. Ne taman en guntaan wazè en meǥinǥed kayi. 29 Impevitey zin sikan is hadì diyà te kayu ne mibey-anan heini zutun taman te mahapun. Ne kedsanlep te andew impekuwa ni Josue haazà is minatey he hadì ne impetimbag din diyà te ǥawas te pultahan dutun te inged. Ne midtembuan dan heini te menge vatu, ne taman en guntaan kemulu egkaahà haazà is menge vatu.

30 Ne zutun mibpevaal si Josue te pemuhatà diyà te Buntud he Ebal he para te Nengazen he Megbevayà te Israel. 31 Mibpeveelan din heini sumalà te suǥù te suluǥuen te Nengazen he si Moises diyà te menge Israilihanen. Heini he suǥù ingkesurat diyà te Libru te Kesuǥuan ni Moises, he edhenduen: “Beeli niw is pemuhatà he vatu he wazà mesepsapi wey wazà meǥemiti te putew.” Ne ziyà te zivavew zutun he pemuhatà, nemuhat dan diyà te Nengazen te menge pemuhat he edtutungen wey menge pemuhat he para te meupiya he kedepità. 32 Ne ziyà te etuvangan te menge Israilihanen, migkupya ni Josue ziyà te menge vatu sikan is kesuǥuan he insurat ni Moises. 33 Is langun he menge Israilihanen, duma te menge pengulu zan, menge upisyal, wey is menge zatù ragkes is kenà menge Israilihanen he zuma zan he meǥinged midhitindeg he ebpesinsineruwà. Ne ziyà medhitindeg te teliwazè dan is menge memumuhat (he menge kevuwazan ni Aaron) he mibinting duen te Kavan te Kebpekid-uyun kandan te Nengazen. Is ketengà kayi te menge etew, ne ed-iniyuǥan dan is Buntud he Gerizim ne is sevaha he ketengà, ne ed-iniyuǥan dan is Buntud he Ebal. Si Moises he suluǥuen te Nengazen is midsuǥù kandan te kebaal kayi emun egkeume en is timpu te kedewata zan te kebpenubtuvazi kandan.

34 Ne zutun mibasa ni Josue sikan is libru te kesuǥuan, ragkes en sikan is menge penuvadtuvad wey menge rawak he ingkesurat kayi. 35 Midtigseselimbaha vesaha ni Josue is menge suǥù ni Moises diyà te etuvangan te tivuuk he keet-etawan te Israel ragkes en is menge vahi, menge vatà, wey kenà menge Israilihanen he zuma zan he meǥinged.

<- Josue 7Josue 9 ->