1 Ne zutun midtiǥum ni Josue is menge tribu ni Reuben, ni Gad, wey is ketengà he tribu ni Manase. 2 Ne migkeǥiyan sikandan ni Josue te, “Mibeelan niw is langun he insuǥù keniyu ni Moises he suluǥuen te Nengazen ne midtuman niw zaan is langun he insuǥù ku. 3 Ne taman en guntaan wazè niw vey-ani is menge zuma niw he menge Israilihanen. Ne mibpurungan niw tumana is langun he insuǥù keniyu te Nengazen he Megbevayè niw. 4 Ne ǥuntaan naangken en te zuma niw he menge Israilihanen is kelinew he insaad kandan te Nengazen. Umbe, ulì kew en diyà te keniyu he tanà he ziyè layun te Wahig he Jordan, duen te tanà he imbeǥey keniyu ni Moises he suluǥuen te Nengazen. 5 Piru kenè niw lipati is kedtuman te menge suǥù wey menge penurù he imbeǥey keniyu ni Moises te suluǥuen te Nengazen: Mahala niw is Nengazen he Megbevayè niw, pengungubpaan kew he ed-ikul te menge paaǥi zin, tumana niw is menge suǥù din, pezumazuma kew kandin, wey silbiyi niw sikandin te ebpuun te tivuuk he ǥehinawa niw wey kedsavut niw.” 6 Ne zutun mibpenubtuvazan sikandan ni Josue ne impeulì din. 7 (Is ketengà he tribu ni Manase ne mibeǥayan ni Moises te tanà diyà te Bashan, ne is ketengà pa ne mibeǥayan ni Josue te tanà diyà te zapit te edsenlepan te Jordan duma te zuma pa he menge tribu).

Hein ed-ulì en sikandan mibpenubtuvazan sikandan ni Josue 8 he ke sikandin te, “Ed-ulì kew he ed-uwit te mahabet he menge ketiǥeyunan–menge uyaǥen, pelata, bulawan, brunsi, putew wey menge visti. Behini niw is menge kezuzumahi niw he ziyà te keniyu te minsan hengkey he naaǥew niw ziyà te menge kuntada niw.” 9 Ne zutun nemen-ulì is tribu ni Reuben, ni Gad, wey is ketengà he tribu ni Manase. Mid-ewaan dan is menge zuma zan he menge Israilihanen diyà te Shilo, he tanà te Canaan ne nemen-ulì sikandan diyà te Gilead, sikan is tanà he nehimu he vahin dan he insuǥù te Nengazen ki Moises he iveǥey ziyà te kandan.

10 Kebpekeuma zan diyà te Gelilot, he uvey te Wahig he Jordan he nesakup pa te Canaan, mibaal sikandan dutun te zekelà he pemuhatà. 11-12 Ne hein netudtulan is duma he menge Israilihanen he mibaal te pemuhatà is tribu ni Reuben, ni Gad, wey is ketengà he tribu ni Manase ziyà te Gelilot, uvey te Wahig he Jordan he dulunà te Canaan, midtiǥum dan diyà te Shilo su ebpengandam dan te kebpekidtebek kandan. 13 Midsuǥù te menge Israilihanen si Finehas he anak ni Eleazar he memumuhat he medhendiyà te Gilead, diyà te tribu ni Reuben, ni Gad, wey te ketengà he tribu ni Manase. 14 Duen din duma he sepulù he menge pengulu he ebpuun diyà te kada tribu te Israel. Heini sikandan, menge pengulu zaan te menge pemilya te menge tribu zan. 15 Kebpekeuma zan diyà te Gilead, migkeǥiyan dan is tribu ni Reuben, ni Gad, wey is ketengà he tribu ni Manase te, 16 “Sikami is tivuuk he etew te Nengazen egkesuat key he metueni zey ke maan is midlimbungan niw is Megbevayà te Israel? Nekesupak kew te Nengazen pinaaǥi te kebaal niw te keugelingen niw he pemuhatà. Maan is mid-iniyuǥan niw sikandin? 17 Kenè pe be ereg is salà he neveelan tew ziyà te Peor? He tenged dutun mibpeeǥiyan kiw te Nengazen te vangkit, he minsan ganì guntaan kemulu tew pa ed-entusa is rimeǥas din. 18 Ne ǥuntaan nekehimu kew pa te ked-iniyug te Nengazen? Emun edsupak kew pa kandin guntaan he andew, ne keeselem egkepeukan din en is tivuuk he keet-etawan te Israel. 19 Umbe, emun egkinahanglan kew te pemuhatà su is tanà niw, kenè dait he zutun kew ed-azap, layun kew ziyà te kenami, diyà te tanà te Nengazen he zutun sikan is Tulda he ed-ezapan kandin, ne ziyè kew en ubpà te kenami. Piru kenè kew vaal te selakew en he pemuhatà gawas duen te pemuhatà he para te Nengazen he Megbevayè tew, su kedsupak heeyan kandin ne supak daan kenami. 20 Nelipatan niw en be is mibeelan ni Acan te anak ni Zera? Hein midsupak din is suǥù mehitenged te menge azen he para zà te Nengazen, midsilutan sikandin duma te tivuuk he keet-etawan te Israel. Kenà iyan dà sikandin minatey tenged te salè din.”

21 Ne midtavak te tribu ni Reuben, ni Gad, wey te ketengà he tribu ni Manase sikan is menge pengulu te menge pemilya te Israel te: 22 “Is Nengazen iyan sikan is Mekeǥeǥehem he Megbevayà! Netuenan din ke maan is mibeelan dey heini, ne ereg daan heini he egketuenan niw. Emun iyan imbeeli zey kayi is kebpekidsukulà etawa kedsupak te Nengazen, ne kenè kew en tuǥut he meuyag-uyag key pa ǥuntaan he andew. 23 Emun midsupak dey is Nengazen pinaaǥi te kebaal zey te keugelingen dey he pemuhatà he para te menge pemuhat he edtutungen, pemuhat he para gasa, etawa menge pemuhat he para te meupiya he kedepità, berakat he iyan en medsilut kenami is Nengazen.

24 “Umbe mibeelan dey heini su nahandek key he kela ke ziyà te huziyan he timpu megkaǥi is menge kevuwazan niw ziyà te menge kevuwazan dey te, ‘Hengkey is lavet niw te Nengazen he Megbevayà te Israel? 25 Midhimu te Nengazen he dulunà tew is Wahig he Jordan te kedsivaya zin keniyu puun diyà te kenami. Sikiyu is menge tribu ni Reuben wey ni Gad wazè niw lavet te Nengazen.’ Ne kela ke zewaya te menge kevuwazan niw is menge kevuwazan dey te ked-azap te Nengazen. 26 Is tutuu, mibeelan dey heini he pemuhatà, kenà para te menge pemuhat he edtutungen wey te zuma pa he menge pemuhat, 27 kekenà, para mehimu heini he tuus he ebpetanudtanud kenami, wey keniyu, wey te peleebuten he menge kevuwazan tew he ed-azap key zaan te Nengazen pinaaǥi te kebpemuhat te menge pemuhat he edtutungen, pemuhat he para te meupiya he kedepità, wey zuma pa he menge pemuhat diyà te Tulda he zutun sikandin ed-ezapa. Ne tenged kayi he pemuhatà kenà ebpekekaǥi is menge kevuwazan niw ziyà te menge kevuwazan dey he wazè dan lavet te Nengazen. 28 Su emun egkehitavù he egkeǥiyan is menge kevuwazan dey te iring dutun, ebpekekaǥi sikandan te, ‘Ahaa niw man! Mibaal is menge apù dey te pemuhatà he iring duen te pemuhatà he para te Nengazen, he kenà para te pemuhat he edtutungen wey te zuma pa he menge pemuhat, kekenà, para ebpetanudtanud kenami wey keniyu he sevaha zà he Megbevayà is ed-ezapen tew.’

29 “Kenà egkehimu he edsupaken dey wey ed-iniyuǥan dey is Nengazen pinaaǥi te kebaal te keugelingen dey he pemuhatà he para ebpemuhatan te menge pemuhat he edtutungen, menge pemuhat he para gasa, wey zuma pa he menge pemuhat. Iyan dà is pemuhatà para te Nengazen he Megbevayè tew ziyà te Tulda he zutun sikandin ed-ezapa ereg he ebpemuhatan.”

30 Nelipey si Finehas he memumuhat, wey sikan is menge pengulu te menge pemilya te keet-etawan te Israel hein nezineg dan haazà is migkaǥi te menge tribu ni Reuben, ni Gad, wey te ketengà he tribu ni Manase. 31 Umbe, migkaǥi si Finehas he anak te memumuhat he si Eleazar te, “Netuenan tew ǥuntaan he mibpekiduma kenitew is Nengazen su wazè kew medsupak kandin. Midlibri niw is Israel te silut te Nengazen.”

32 Ne zutun mid-ulì diyà te Canaan si Finehas wey sikan is menge pengulu, ne migkaǥi zan diyà te menge Israilihanen is rimeǥas te kebpekidlalag dan te tribu ni Reuben wey ni Gad diyà te Gilead. 33 Ingkelipey te menge Israilihanen haazà is nezineg dan ne midalig dan is Megbevayà. Ne wazè dan en meventeeni is bahin te kedsurung dan diyà te tanà he ed-ubpaan te menge tribu ni Reuben wey ki Gad. 34 Migngezanan haazà is pemuhatà te menge tribu ni Reuben wey ki Gad te “Tuus,” su ke sikandan te, “Tuus heini para kenitew te langun he is Nengazen Megbevayè tew.”

<- Josue 21Josue 23 ->