1 Is tanà he imbeǥey ziyà te menge kevuwazan ni Jose ne puun te Wahig he Jordan uvey te Jerico, diyà te edsilaan he vahin te menge serebseb diyà te Jerico pehendiyà te sibsivayan pelaus diyà te menge vuvungan taman te Betel. 2 Puun te Betel (he iyan is Luz), ne ebpekevayà diyà te Atarot he mid-ubpaan te menge Arkanhen. 3 Ne petupang heini ziyà te edsenlepan pehendiyà te lugar te menge Jafletnen, pelaus en diyà te zulunà te Bet Horon, pelaus te Gezer taman te Daǥat he Mediteraneo. 4 Iyan heini kevahin te tanà he naangken te tribu ni Manase wey ni Efraim te menge kevuwazan ni Jose.

5 Iyan heini vahin te tribu ni Efraim he impemeǥey ziyà te kada pemilya zan: is dulunà kayi, ne ziyà te edsilaan puun te Atarot Adar pehendiyà te ebpekehinugnew te Bet Horon 6 pelaus diyà te Daǥat he Mediteraneo. Is dulunè dan diyà te zizaya ne puun te Micmetat. Ne mibulegkù heini pehendiyà te edsilaan he ebpekevayà te Taanat Shilo pehendiyà te edsilaan he vahin te Janoa. 7 Puun te Janoa impetupang heini ziyà te Atarot wey Naara, he ebpekevayà te Jerico pehendiyà te Wahig he Jordan. 8 Puun te Tapua, is dulunà impehendiyà te edsenlepan, nekeikul te zal-ug he Kana pelaus diyà te Daǥat he Mediteraneo. Iyan heini tanà he imbeǥey ziyà te tribu ni Efraim he mibahin diyà te kada pemilya zan. 9 Ragkes kayi is malù dezekelà wey dezeisek he menge inged he nesakup te tanà te menge kevuwazan ni Manase. 10 Wazè dan segseǥa is menge Canaanhen he ebpemen-ubpà diyà te Gezer; umbe zuen menge Canaanhen he nengungubpaan duma te menge Efraimnen taman en guntaan, piru mid-uripen dan sikandan.

<- Josue 15Josue 17 ->