Jonas

1 Ne zuen timpu he zutun, migkeǥiyan te Nengazen si Jonas he anak ni Amitai. Ke sikandin te, 2 “Segugunè ka hendiyà te zekelà he inged he Nineve, ne keǥiyi nu is menge etew zutun, he engkezi zan is mezaat he menge ulaula zan su sumalà is neehè ku, utew subra is kezaat te menge ulaula zan.” 3 Piru wazà mebpezumazuma si Jonas su mibpeleǥuyan din is Nengazen pehendiyà te Tarshish. Midhendiyà sikandin te Jopa, ne zutun duen barku he edhendiyà te Tarshish. Mibayad sikandin te piliti, ne hein nekevayad en, mid-untud dutun te varku he ebpehendiyà te Tarshish su wey zin mepeleǥuyi is Nengazen.

4 Ne hein dutun en te zaǥat, impepengeramag te Nengazen te utew mevandes, ne tenged te kevandes din henduen be te egkezeetan en haazà is barku. 5 Ne tenged te utew nengahandek is menge terebahanti, ne is kada sevaha kandan mid-ampù diyà te kandin he menge ed-ezapen. Ne impenimbag dan en is menge karga zutun te varku su wey mebmahagkap.

Ne si Jonas mulà, nehurep diyà te zizalem he vahin te varku. 6 Ne midhendiyà te kandin is kepitan dutun te varku. Ke sikandin te, “Maan is iyan nu zà is kedlipezeng nu? Enew ka, wey medhangyù diyà te kenikew he ed-ezapen. Su kela ke mehizuwi kiw zin ne kenè kiw zed egkeǥerà.”

7 Ne mibpelelelaǥà is menge terebahanti zutun te varku, ne iyan neuyunan dan he ibarè dan pinaaǥi te ripa ke hentei is edsilutan he iyan hinungdan he impepengeramag te utew mevandes. Ne zutun te kedripa zan iyan neripahan si Jonas. 8 Ne zutun migkeǥiyan dan si Jonas te, “Maan is nehitavù heini is bagyu? Maan is kayi ka? Hendei ka ebpuun? Hengkey is ngazan te nasyun nu? Hengkey ka he kelasi te etew?” 9 Ne ke si Jonas te, “Hebriyuhanen a ne iyan ed-ezapen ku is Nengazen, is Megbevayà diyà te langit he iyan midlimbag te zaǥat wey tanà.” 10 Ne midtudtulan sikandan ni Jonas mehitenged te kenè din kebpezumdumahi te suǥù te Nengazen kandin. Ne tenged dutun utew zan nengahandek, ne ke sikandan te, “Kenà meupiya haazà is mid-ulaula nu.”

11 Ne zutun mid-iseg en is kevandes te keramag, ne migkeǥiyan dan si Jonas te, “Hengkey is ed-ul-ulahan dey kenikew su wey meengked heini is utew zekelà he vaǥel su wey key kenà mekeizi?” 12 Ne ke si Jonas te, “Itimbag a keniyu ziyà te zaǥat, ne egkeengked heini is mevandes he keramag, su tenged te salè ku ne neuwit-uwit kew.” 13 Iyan, midhimu zan pa is taman te egkehimu zan. Midsigudu zan mebpemegsey su wey mekehendiyà te veyvey haazà is barku. Iyan, wazè dan nehimu su nasì en man medlavew is kevandes te keramag. 14 Umbe, midhangyù dan diyà te Nengazen he ke sikandan te, “He Nengazen, kenè nu himuwa he mebpatey key tenged te kebpatey kayi te etew pinaaǥi te kedtimbaǥa zey kandin diyà te zaǥat. Kenè key kenikew siluti tenged te kegkehimetayi zey kandin, su heini is nehitavù, Nengazen, kenikew he ulaula su midhimu nu is egkesuatan nu.” 15 Ne zutun mibitbit dan si Jonas ne intimbag dan diyà te zaǥat, ne segugunà mibmelinew is daǥat. 16 Ne tenged kayi he hitavù, dekelà is kedtahud te menge etew te Nengazen. Umbe mibpemuhat dan sikandin wey zuen menge penaad dan diyà te kandin.

17 Ne zuen utew zekelà he isdà he inteǥana te Nengazen su wey zin meeveleng si Jonas, ne ziyè si Jonas te ǥetek dutun te isdà seled te tetelu he andew wey tetelu he kezukileman.

Jonas 2 ->