1 Ipezaǥing niw is budyung su wey mekepengandam is menge etew ziyà te Zion, he iyan kes segradu he vuntud te Nengazen. Sikiyu is langun he meǥinged diyà te Juda, egkerkeren kew tenged te kegkahandek, su egkeuvayan en is andew te kedsilut te Nengazen. 2 Merusirem wey ebpenggapun dutun he andew. Is mekahandekhandek he menge terapan he utew subra is kahabet dan ne ebpekeeneb diyà te menge vuvungan iring te kebpekeeneb te silà te andew emun egkepawè en. Wazè pa nehitavù he iring keniyan puun pa zengan, ne kenè en egkeuman egkehitavù is iring keniyan taman te taman.

3 Ebpekedtitinundug is ked-ataki te menge terapan he henduen be te hapuy. Hein wazè pa sikandan med-etaki, is tanà henduen be te iring te pemuleey he Eden, piru hein mid-etaki zan en heini, ne neiring heini te disirtu. Wazè en pinemula he wazè dan mezèdeeti. 4 Henduen sikandan te zagwey te kudà, ne ebpelelaǥuy sikandan iring te kudà he para te tebek. 5 Is keǥurub te kedlinglingketew zan diyà te menge vuvungan iring te keǥurub te ebpelelaǥuy he kerwahi wey iring te kerekatak te ebinsulan he reǥami. Iring sikandan te mekeǥeǥehem he menge sundaru he andam en he ebpekidtebek. 6 Is menge etew he ebpekaahà kandan egkahandek ne ebmemeluntak. 7-8 Ed-etaki sikandan he ebpemenahik diyà te menge verengbeng iring te menge sundaru. Edtandang sikandan is edhipanew ne kenè dan en ebpenuweysuwey ziyà te ibayà. Kenà sikandan ebpelislisiǥà; ne kenè dan idtetepi-an is menge ǥumaan he idsinuǥung kandan. 9 Edsurung dan diyà te inged he ebpemenahik diyà te verengbeng kayi. Ebpemenehikan dan is menge valey ne ziyè dan ebayà te menge sulawà he iring te menge tekawen. 10 Egkehuyung is kelibutan wey is langit dutun te kebpekeuma zan. Ebmerusirem is andew wey is bulan ne kenè en edsiǥa is menge vituen.

11 Ebmenduan te Nengazen heini is menge terapan he menge sundaru zin, ne edtumanen dan is menge suǥù din. Mekahandekhandek heini he menge terapan ne utew subra is kahabet dan. Mekehandekhandek utew haazà is andew te kedsilut te Nengazen; ne wazà ebpekeeguwanta kayi.

12 Migkaǥi is Nengazen he timpu en heini te kedlikù niw ziyà te kandin te kedlikù he meheǥet diyà te gehinawa niw, he egkezumahan te kebpuasa wey kedlalew duma is kedsineǥew. 13 Iniyuǥi niw is kelelalung te ked-iniyug he ebpuun diyà te gehinawa niw, ne kenà bà dà ibpaahà pinaaǥi te kebindasa niw te visti niw. Likù kew ziyà te Nengazen he Megbevayè niw, su hihizuwen sikandin wey iipengen. Mepinelenggaan sikandin wey kenà pepeuken. Andam sikandin he edhalin te isip din, ne kenè din en edleusen is kebpaaǥi zin te kezeetan. 14 Ne kela ke mahalin is isip te Nengazen he Megbevayè niw ne edtuvazan din is menge sebpet niw, su wey kew mekepemuhat en diyà te kandin te menge trigu wey vinu.

15 Ipezaǥing niw is budyung diyà te Zion he paaǥi te kebpetueni te menge etew he kinahanglan sikandan he edtiǥum para te kebpuasa. 16 Himuwa niw is tulumanen te kedlumpiyu ne tiǥum kew is langun, batà etawa meǥurang. Minsan is menge peririǥè pa ne uwita niw, ne medtampu zaan is beǥu he neked-esawa. 17 Is menge memumuhat he ebpenilbi te Nengazen, medsineǥew sikandan diyà te pid-elangan te pemuhatà wey varkun duen te valey te Nengazen, ne med-ampù dan te iring kayi: “Nengazen, kehizuwi nu is menge etew he ǥaked nu. Kenè nu ituǥut he ebpeel-elezan sikandan wey edsudien te menge etew ziyà te zuma he menge nasyun pinaaǥi te kegkaǥi te, ‘Hendei en be is Megbevayè niw?’ ”

18 Ingkeipeng te Nengazen is tanè din, wey nehizuwan din is menge etew zin. 19 Ne midtavak din is ampù dan he ke sikandin diyà te kandan te, “Ebeǥayan ku sikiyu te menge trigu, beǥu he vinu, wey lana; ne egkeperahan kew. Ne kenè ku en idtuǥut he peel-elezi kew te menge etew ziyà te zuma he menge nasyun. 20 Ibpaawè ku is menge edsurung keniyu he ebpuun diyà te zizaya, ne edsegseǥen ku sikandan pehendiyà te disirtu. Is nehuna he grupu zan ne edsegseǥen ku pehendiyà te Daǥat he Minatey ne is egkehuziyan he grupu zan ne edsegseǥen ku pehendiyà te Zaǥat he Mediteraneo. Ne egkengemahù sikandan.”

Utew egkein-inuwi is menge mibeelan te Nengazen. 21 Kenà ereg he egkahandek is menge meǥinged diyà te tanà he Juda, kekenà, ereg he egkelipey sikandan su utew egkein-inuwi is menge mibeelan te Nengazen. 22 Ne kenà daan ereg he egkahandek is menge langgam, su mibmeilem en is menge penebtavà wey nemeǥas en is menge kayu ragkes en is higus. Nemeǥas en daan is menge paras.

23 Sikiyu is menge etew ziyà te Zion, lipey kew tenged te mibeelan te Nengazen he Megbevayè niw. Su mibeǥayan kew zin te nehuna he uzan te kebpaahaa zin he metazeng sikandin. Mibeǥayan kew zin te nehuna he uzan wey te ebpekesunud he uzan iring ded duen te nehuna. 24 Egkepenù te menge trigu is menge gunasà wey edrepey is beǥu he vinu wey lana ziyà te menge teleǥuey kayi. 25 Su migkaǥi is Nengazen te, “Idlikù ku is nelaga ziyà te keniyu zutun te menge tuig he mid-etaki is menge pinemula niw te nekedtutundug he grupu te menge terapan. Iyan a midsuǥù dutun te mahabet he menge terapan he menge sundaru ku. 26 Ne ǥuntaan edekelè en is keenen niw ne egkengehantey kew. Ne tenged kayi, edeliǥen a keniyu is Megbevayè niw, he mibaal te egkein-inuwan he menge vaal diyà te keniyu. Ne kenè kew en egkepeel-elezan is menge etew ku minsan keenu. 27 Ne egketuenan niw he ziyà a te keniyu te menge tig-Israel, ne iyan e zà Nengazen he Megbevayè niw ne wazè en duma pa. Ne sikiyu is menge etew ku ne kenè kew en egkepeel-elezan minsan keenu.”

28 “Diyà te huziyan he timpu ibeǥey ku is Mulin-ulin ku ziyà te langun he kelasi te etew. Is menge anak niw he maama wey vahi ebpenudtulen dan is menge lalag ku. Is meǥurang keniyu he menge maama ibpeteǥeinep ku. Is menguhed keniyu he menge maama duen menge ibpelewasan ku kandan. 29 Dutun he menge andew, ibeǥey ku zaan is Mulin-ulin ku ziyà te menge suluǥuen he menge maama wey menge vahi. 30 Ebpaahà a te menge singyal diyà te langit wey tanà: duen egkaahà he lengesa, hapuy, wey mekepal he evel. 31 Ebmerusirem is andew, ne is bulan ebmeriǥà iring te lengesa. Kenà heini egkehitavù emun kenè pa egkeuma is mekahandekhandek he kedhukum te Nengazen.”

32 Piru is minsan hentei he edangep diyà te Nengazen ne egkelibri te silut he edtelinguma. Su sumalà is migkaǥi te Nengazen, duen menge Israilihanen he egkesamà diyà te Jerusalem he migngezanan he Buvungan he Zion. Heini sikandan mibpilì te Nengazen he egkengelibri.

<- Joel 1Joel 3 ->