1 Ne migkaǥi si Job te, 2 “Taman en guntaan utew meveǥat is riklamu ku. Impaantus a utew te Megbevayà ne utew ad ebpekezag-es. 3 Angin pezem ke netuenan ku ke hendei ku sikandin ebpen-ahaa; angin ke ebpekehendiyà a te ed-ubpaan din, 4 su egkeǥiyen ku ziyà te kandin is kasu ku wey is ketezengan ku. 5 Egkesuat a he metueni ku is idtavak din kedì, wey egkesuat a ke mesavut ku is egkeǥiyen din. 6 Ebpekiberawè be sikandin kedì pinaaǥi te ǥehem din? Simpri kenà! Su ebpemineǥen din is egkeǥiyen ku. 7 Is metazeng he etew iring kedì, ne ebpekepengetezengan diyà te etuvangan te Megbevayà he Meghuhukum ku ne edlibriyen e zin taman te taman.

8-9 “Mibpen-ehè ku is Megbevayà diyà te peliǥuy: edsilaan, edsenlepan, dizaya, wey zivavà, piru wazè ku sikandin maahà. 10 Piru netuenan din is menge vaal ku. Emun egkeǥezaman e zin en, egkeǥiyen din he lumpiyu a iring te lunsey he vulawan. 11 Mid-ikul ku is menge paaǥi zin ne wazà a medsuwey kayi. 12 Layun ku edtumana is suǥù din, wey edtipiǥan ku heini kayi te ǥehinawa ku. 13 Piru ebayàbayà is Megbevayà ke hengkey is ebeelan din; wazà ebpekevelavag kandin. Ebeelan din is egkesuatan din te ebaal. 14 Umbe, edhimuwen din is pelanu zin he iyan ebeelan din kayi te kedì, ne mahabet is pelanu zin mehitenged kedì. 15 Umbe, egkahandek a kandin. Emun ed-isipen ku heini, ne utew subra is kegkahandek ku. 16 Midhimu te Megbevayà he Mekeǥeǥehem he luyahi a wey mahandek a. 17 Piru wazà a med-engked he ebpengetezengan minsan henduen be te netembunan ad te kerusireman.

<- Job 22Job 24 ->