1 Ne midtavak si Zofar is tig-Naama te, 2 “Ereg he edtevaken heini is ebpengeǥiyen nu. Kenà ebpekelepew he wazè nu salà pinaaǥi zà te kedtulung nu kegkaǥi. 3 Kenè key kenikew igkepepereremek pinaaǥi te ebpengeǥiyen nu he wazè din pulus. Egkeisip nu ve he kenè dey sikew edewayen te ked-undaunda nu? 4 Migkaǥi ka he hustu is kedtuu nu wey lumpiyu ka ziyà te etuvangan te Megbevayà. 5 Deyzey pezem ke edlelaǥan ka te Megbevayà 6 ne egkeǥiyen din kenikew is wazè nu pa mengetueni. Duen nengetuenan nu en ne zuen daan wazè nu pa mengetueni. Netuenan nu en be he is silut te Megbevayà kenikew kurang pa te ereg he idsilut kenikew? 7 Egketegkad nu ve is langun he mehitenged te Megbevayà? 8-9 Metikang pa te langit is mehitenged kandin wey mezalem pa te iveyaan. Dekelà pa heini te kelibutan wey meluag pa te zaǥat. Ne egkeǥawhat be heeyan te ked-isip-isip nu?

10 “Penenglitan, edekepen ka te Megbevayà ne ed-uwiten ke zin diyà te hukmanan wey ebpirisuwen ke zin, hentei man is ebpekeeǥen kandin? 11 Netuenan din ke hentei is limbungan he menge etew wey neehè din is kegkezaat dan. 12 Henduen be te kenè en egkehimu he ed-uluwanen is tulebung iring te kenà egkehimu he ed-anak te etew is asnu.

13 “Job, emun ed-iniyug ka te mezaat wey edangep ka ziyà te Megbevayà, 14 ne kenè ke en ebaal te salà wey kenè nu edtuǥutan is pemilya nu te kebaal te salà, 15 kenà duwazuwa he kenè ke en egkepeel-elezan; ebmelig-en ka wey wazè nu igkahandek. 16 Ne egkelipatan nu en is mesakit he neeǥiyan nu, ne egkeiring dà heini te wahig he midsaǥad. 17 Egkehimu is untung nu he merayag pa te silà te andew ke meudtu. Is merusirem diyà te untung nu ebmerayag iring te meselem. 18 Ebmeli g-en is kebpengungubpaan nu su zuen meupiya he egkeperateng nu. Ebpengelangan ka te Megbevayà ne edhimeley ka he wazè nu igkahandek. 19 Edhizeǥè ka he wazè ebpelihandek kenikew, wey mahabet is ebpetavang kenikew. 20 Piru egkepakyas mulà is menge lalung ne wazè dan en egkepeleǥuyan, ne kemetayen dà is egkeperateng dan.”

<- Job 10Job 12 ->