1 Duen impelewasan kedì te Nengazen hein mibihag en ni Hadì Nebucadnezar he hadì te Babilonia si Hadì Jehoyakin he hadì te Juda, he anak ni Jehoyakim. Mid-uwit si Jehoyakin diyà te Babilonia ragkes is menge upisyal zin wey is memetau he menge pandey wey menge terebahanti. Hein neipus heini he hitavù ne zuen impelewasan te Nengazen kedì. Dutun te nelewasan ku neehè ku is dezuwa he vaskit he veǥas te higus he ziyà te egkesineruwan duen te valey te Nengazen. 2 Is menge higus diyà te sevaha he vaskit utew memeupiya wey nengelutuan. Piru is menge higus duen te sevaha pa he vaskit ne memezaat ne kenà egkekaan.

3 Ne zutun mid-insà is Nengazen kayi te kedì te, “Jeremias, hengkey is neehè nu?” Midtavak a te, “Menge higus. Is duma utew memeupiya, ne is duma utew memezaat ne kenà egkekaan.”

4 Ne zutun migkaǥi is Nengazen kayi te kedì te, 5 “Siak is Nengazen he Megbevayà te Israel, egkaǥi a te ed-isipen ku he iring te meupiya he menge higus is menge Israilihanen he impevihag ku ziyà te Babilonia. 6 Ebentayan ku sikandan wey ed-eturen ku, ne idlikù ku sikandan kayi he tanà. Ibpeuswag ku sikandan ne kenè ku en edezeetan. Edlig-enan ku sikandan ne kenè ku ebpilayen. 7 Idsavuk ku ziyà te ǥehinawa zan is tinguhà te kegkilala kediey te Nengazen dan. Egkehimu sikandan he menge etew ku ne egkehimu a he Megbevayè dan, su edlikù sikandan kayi te kediey te kedlikù he ebpuun diyà te gehinawa zan.

8 “Piru ed-isipen ku he iring te mezaat he menge higus he kenà egkekaan si Hadì Zedekia he hadì te Juda wey is menge upisyal zin, wey is menge Israilihanen he egkesamà he uuyag keniyan te Jerusalem wey sikan is diyà te Ehipto. 9 Edhimuwen ku he ebpendemisan sikandan diyà te langun he ginhedian kayi te kelibutan. Edsudien sikandan wey ed-un-undahan wey ebpenrewakan diyà te langun he lugar he edsegseǥan ku kandan. 10 Ibpaaǥi ku ziyà te kandan is tebek, bitil, wey menge zaru taman te egkaamin ebpematey sikandan keniyan te tanà he imbeǥey ku kandan wey te menge kepuun dan.”

<- Jeremias 23Jeremias 25 ->