1 Migkaǥi en maan is Nengazen diyà te ki Jeremias te, 2 “Petentenuzi nu te menge tig-Juda wey menge tig-Jerusalem is menge sulunuzen dutun te kebpekid-uyun dey. 3 Kegiyi nu sikandan he iyan a, is Nengazen he Megbevayà te Israel, migkaǥi a he edrewakan ku is etew he kenà edtuman te tulumanen kayi te kebpekid-uyun ku. 4 Heini he menge sulunuzen impetuman ku te menge kepuun niw hein impeǥawas ku sikandan diyà te Ehipto, he iyan kes lugar he iring keinit te rapug. Migkeǥiyan ku sikandan te, ‘Emun ebpezumdumahan a keniyu wey edtumanen niw is langun he menge suǥù ku, egkehimu kew he menge etew ku, ne egkehimu a he Megbevayè niw. 5 Ne zutun, edtumanen ku is impenaad ku ziyà te menge kepuun niw he ebeǥayan ku sikandan te meupiya wey selebpeten he tanà. Ne haazà is tanà, iyan is tanè niw ǥuntaan.’ ”

Midtavak a te, “Berakat he metuman, Nengazen.”

6 Migkaǥi en maan is Nengazen kayi te kedì te, “Kegiya nu heini he menge lalag diyà te menge inged diyà te Juda wey ziyà te menge zalan diyà te Jerusalem: Tentenuzi niw wey tumana niw is menge sulunuzen dutun te kebpekid-uyun ku keniyu. 7 Puun pa te timpu te kebpeǥewasa ku te menge kepuun niw ziyà te Ehipto ne taman en guntaan, edsiguduwan ku en sikandan ebpetizeeni he pezumdumahi e zan. 8 Piru wazà sikandan mebpemineg wey medtuu. Iyan dan nasì mibpezumdumahan is kesinupaken te mezaat he gehinawa zan. Midsuǥù ku sikandan he tumana zan is kebpekid-uyun ku kandan, piru wazè dan heini tumana. Umbe mibpeseǥazan ku kandan is langun he rawak he ingkesurat kayi te kebpekid-uyun ku.”

9 Migkaǥi pa is Nengazen kayi te kedì te, “Duen menge tig-Juda wey menge tig-Jerusalem he mibpelanu te ebpekesuǥat kayi te kedì. 10 Midsunud dan is menge salà te menge kepuun dan he wazà mebpemineg te menge lalag ku. Mid-azap daan sikandan te zuma he menge ed-ezapen. Is menge tig-Israel wey menge tig-Juda neked-iring su pudu zan midrapas te kebpekid-uyun ku he midhimu ku ziyà te menge kepuun dan. 11 Umbe siak, is Nengazen, migkaǥi a te ibpaaǥi ku ziyà te kandan is kezeetan he kenè dan egkelikayan. Ne minsan ebuyù pa sikandan te tavang kayi te kediey ne kenè ku sikandan ebpemineǥen. 12 Ne ziyà sikandan ebuyù te tavang te menge ed-ezapen he ebpemuhaten dan te edtutungen he veyewà, piru kenà heini ebpeketavang kandan emun egkeumahan dan en te kezeetan.

13 “He menge tig-Juda, utew mezakel is menge ed-ezapen niw, iring kezakel te menge inged niw. Ke sengemenu kahabet is menge zalan diyà te Jerusalem ne iyan daan kahabet te menge pemuhatà he para edtutungan niw te veyewà he para te utew mezaat he ed-ezapen he si Baal.

14 “Umbe sikew Jeremias, kenè ka pengemuyù para kayi he menge etew. Kenè ka pehizuhizu kedì para kandan, su kenè ku sikandan ebpemineǥen emun ed-umawen e zan dutun te timpu te kedlised dan. 15 Is menge etew he mibmahal ku mibaal te mahabet he mezaat he menge vaal. Guntaan, wazè dan ketenged te kedhendiyà te valey ku he ed-ezapan. Is menge pemuhat dan kenà ebpekeeǥen te kezeetan he ebpekeuma ziyà te kandan. Emun ebaal zan te mezaat igkelipey zan pa heini!”

16 Dengan impetug-iring sikandan te Nengazen te merapung he kayu he ulibu he zuen din mahabet he meupiya he menge veǥas. Piru ǥuntaan kesevaha zà sikandan egkeremaǥa te vagyu ne egkengezeetan dan en, he iring te nengetamped he menge subpang he inrapug. 17 Is Nengazen he Mekeǥeǥehem iyan midtukud te Juda wey Israel, iyan, guntaan midsuǥù sikandin he zezeeti heini tenged te mezaat he menge vaal te menge etew kayi. Midhimu zan he mepauk sikandin tenged te kebpemuhata zan ki Baal pinaaǥi te kedtutung te veyewà.

18 Migkeǥiyan a te Nengazen mehitenged te kebpelenuwi kedì te menge kuntada. 19 Iring a te kerehidu he wazè din hanew he ed-uwiten en bes diyà te lepeey. Wazè ku metueni he zuen bes pelanu zan he edhimetayan e zan. Ke sikandan te, “Edhimetayan tew sikandin iring te kebpiley te kayu he zuen din beǥas, su para maawà sikandin kayi te kelibutan su wey kenè en metenuzi.”

20 Piru mid-ampù a, ke siak te, “He Nengazen he Mekeǥeǥehem, metazeng is kedhukum nu wey nesayud ka te isip wey gehinawa te etew. Ipeehè nu kedì is kebelesi nu kandan, su insarig ku kenikew is kasu ku.”

21-22 Egkesuatan te menge etew ziyà te Anatot he himetayi a emun kenà a ed-engked te kebpenudtul te menge lalag te Nengazen. Umbe iyan heini migkaǥi te Nengazen he Mekeǥeǥehem, “Edsilutan ku sikandan. Ebpematey te tebek is menge vetan-en he menge maama kandan, ne ebpematey te vitil is menge vatà kandan. 23 Wazà egkesamà he uuyag te menge tig-Anatot, su ebpeeǥiyan ku sikandan te kezeetan dutun te timpu te kedsiluti ku kandan.”

<- Jeremias 10Jeremias 12 ->