1 Is langun he menge Israilihanen puun te Dan pehendiyà te Beersheba, wey puun te Gilead, midtiǥum diyà te Mizpa, diyà te etuvangan te Nengazen. 2 Dutun is menge pengulu te kada tribu te Israel te kedtiǥum te menge etew te Megbevayà. 400,000 sikandan is langun he menge sundaru he neǥumeenan te ispada. 3 Nezineg te menge kevuwazan ni Benjamin he is menge Israilihanen midtiǥum diyà te Mizpa.

Migkaǥi is menge Israilihanen te, “Nemenumenu is kegkeul-ulaha kayi te utew mezaat?” 4 Ne midtudtul zuen te Levihanen is neulaula: “Nekehendiyè key te esawa ku te Gibea, he sakup te Benjamin su zutun key edhizeǥà. 5 Ne hein mezukilem en, is baley he nepemenehikan dey midliǥuyan te menge maama he tig-Gibea. Egkesuatan dan he mekuwa e zan su edhimetayan e zan pezem; piru iyan, midsinembeyaanan dan te edlayug is esawa ku taman te minatey. 6 Umbe, mid-uwit ku te ked-ulì ku is lawa zin ne mibpenamped ku te 12 he vahin ne impeuwit ku ziyà te 12 he tribu te Israel, su utew mezaat wey mekeeled-eled heini is mibeelan dan kayi te Israel. 7 Ne sikitew is langun he menge Israilihanen hengkey is ed-ul-ulahan tew?”

8 Nesevaha is menge etew zutun te kegkaǥi te, “Wazà med-ulì kenitew minsan sevaha. 9 Iyan ebeelan tew is edripa kiw ke hentei kenitew is edsurung diyà te Gibea. 10 Is ikesepulù he vahin te langun he menge maama te kada tribu iyan ed-atur te egkekaan te menge sundaru, ne is egkesamà iyan ebales te menge tig-Gibea tenged kayi te utew mezaat he mibeelan dan kayi te Israel.” 11 Umbe, midsevaha is menge maama te Israel te kedsurung diyà te Gibea.

12 Duen menge menunudtulà he midsuǥù te menge tribu te Israel ziyà te tivuuk he tribu ni Benjamin he ibpekaǥi te, “Hengkey heini is utew mezaat he nehitavù kayi te keniyu? 13 Guntaan, ipalad niw ziyà te kenami heeyan is lalung he menge tig-Gibea he mibaal kayi su edhimetayan dey su wey mepalis kayi te Israel haazà is utew mezaat he salà.” Piru wazà pemineǥa te menge kevuwazan ni Benjamin sikan is duma zan he menge Israilihanen, 14 kekenà, nenggawas sikandan puun te menge inged dan ne midtiǥum dan diyà te Gibea su ebpekidtebek dan te zuma zan he menge Israilihanen. 15 Dutun mismu he andew, neketiǥum is menge Benjaminhen te 26,000 he menge sundaru he ebpuun te menge inged dan, wazà lavet te 700 he pinilì he menge sundaru he menge tig-Gibea. 16 Heini is 700 he mibpilì dan, puun te tivuuk he menge sundaru zan, pudu ǥivang. Ne is kada sevaha kandan memetau he edlabyug te vatu he ebpekeigù minsan iring kezeisey te sengeleǥas he vulvul. 17 Ne gawas te tribu ni Benjamin, neketiǥum daan is menge Israilihanen te 400,000 he menge sundaru he memahagtì he ebpekidtebek.

18 Midhendiyà te Betel is menge Israilihanen ne mid-insè dan diyà te Megbevayà ke hentei ki tribu is edhuna edsurung te menge Benjaminhen. Ne midtavak is Nengazen te, iyan is tribu ni Juda. 19 Umbe, hein mid-ilis he andew, meselem pa migkampu en is menge Israilihanen diyà te uvey te inged he Gibea. 20 Ne nengandam dan wey mibpelastar is menge sundaru zan su ebpekidtebek te menge Benjaminhen. 21 Ne migawas is menge Benjaminhen puun te Gibea te kebpekidtebek kandan. Ne zutun dà he andew, 22,000 he menge Israilihanen is nepatey te menge Benjaminhen.

22-23 Umbe, mid-uman medtekezeg diyà te Betel is menge Israilihanen ne midsineǥew zan dutun taman te mezukilem. Mid-insaan dan is Nengazen te, “Ed-uman key pe be ebpekidtebek te menge kezumahan dey he menge Benjaminhen?” Midtavak is Nengazen te, “Uya.” Umbe midinesiǥà sikandan ne mid-uman dan mebpelastar zuen te mibpelastaran dan.

24 Ne sunud he andew midsurung dan en maan is menge Benjaminhen. 25 Iyan, mid-uman en maan megawas is menge Benjaminhen diyà te Gibea ne midsinuǥung dan heini is duma zan he menge Israilihanen. Ne kayi he timpu, nepatey zan is 18,000 he menge Israilihanen he memetau he eǥamit te menge ispada.

26 Umbe, mid-uman en maan medtekezeg diyà te Betel is langun he menge Israilihanen ne midsineǥew zan. Neminuu zan, ne mibpuasa zan diyà te etuvangan te Nengazen dutun he andew taman te kebmezukilem. Nemuhat dan te menge pemuhat he edtutungen wey menge pemuhat he para te meupiya he kedepità. 27 (Dutun he timpu, ziyà te Betel sikan is Kavan te Kebpekid-uyun te Megbevayà kandan. 28 Ne is edumala zutun, iyan si Finehas he anak ni Eleazar wey apù ni Aaron.) Mid-umanan insai te menge Israilihanen is Nengazen te, “Ed-uman key pe be ebpekidtebek te kezumahan dey he menge Benjaminhen etawa kenè en?” Midtavak is Nengazen te, “Uman kew pekidtebek su keeselem ebpengelinteuwan ku en he mezaag niw sikandan.”

29 Umbe, mibpeeyanan te menge Israilihanen te menge sundaru is peliǥuy te Gibea. 30 Dutun te iketelu he andew, mibpelastar zan su ebpekidtebek dan te menge Benjaminhen iring te mibeelan dan te nehuna he menge andew. 31 Ne iring te neulaula zuen te nengehuna he kebpekidtebek dan, midsinuǥung sikandan te menge Benjaminhen he nenggawas puun dutun te inged. Nekepatey is menge Benjaminhen te 30 he menge Israilihanen diyà te menge pemuleey wey ziyà te menge zalan pehendiyà te Betel wey Gibea. 32 Ne ǥeina te mibpelaǥuy is menge Israilihanen, kunaan te menge Benjaminhen ke egkezaag dan en maan is menge Israilihanen. Wazè dan meteuni he mibpezal-as is menge Israilihanen su para meuwit dan diyà te meziyù te inged heini is menge Benjaminhen.

33 Ne hein nekeuma is menge Israilihanen diyà te Baal-Tamar, ne mibpelastar zan dutun ne sikan mulà is nemen-eles he mid-ayan nemenggawas dan ne mibpelastar zan diyà te zapit te edsenlepan he vahin te Gibea. 34 Ne is 10,000 he pudu menge pinilì he menge sundaru te Israel, midsurung dan is Gibea. Nehitavù is dekelà he tebek, ne wazà metueni te menge Benjaminhen he hapit dan en egkepurung egkezeeti. 35 Mibpengelinteuwan te Nengazen he mekezaag is menge Israilihanen. Dutun he andew, nekepatey sikandan te 25,100 he menge Benjaminhen he mahagtì he menge sundaru. 36 Ne nesavut te menge Benjaminhen he nezaag en sikandan te menge Israilihanen.

Mibpelaǥuy is dekelà he grupu te menge sundaru te Israel su midsarig sikandan duen te grupu he impeayan dan diyà te inged te Gibea. 37 Ne hein edal-as en kandan is menge Benjaminhen, midsurung en daan duen te nemen-ayan he menge sundaru is Gibea ne migerè dan is langun he menge etew zutun. 38 Iyan, te wazè pa heini meulaula, daan sikandan he mid-uyun he emun ebpekaahà te mekepal he evel ziyà te Gibea sikan is nemelaǥuy he menge Israilihanen, tuus haazà he 39 edlikù dan en te kebpekidtebek te menge Benjaminhen. Is menge Benjaminhen dutun, nekepatey en te 30 he menge Israilihanen, umbe kunaan dan ke egkezaag dan en maan is menge Israilihanen iring te nehuna he nengehitavù. 40 Ne midlipuwak is mekepal he evel ziyà te Gibea. Ne hein midlilingey is menge Benjaminhen, neehè dan is mekepal he evel he ebpuun diyà te inged dan. 41 Ne miberiyung is menge Israilihanen, ne mid-etaki zan is menge Benjaminhen. Nengeheratan is menge Benjaminhen su nesavut dan he hapit en sikandan egkepurung egkezeeti. 42 Mibpemelaǥuy sikandan pehendiyà te sibsivayan, piru midal-as dan te menge Israilihanen he migawas puun te inged. 43 Wazè dan en egkepelaǥuyan su midliǥuyan sikandan te menge Israilihanen, ne wazè dan engkezi te edal-as taman te zapit te edsilaan he vahin te Gibea. 44 Ne 18,000 he mevurut he menge sundaru te Benjaminhen is nepatey. 45 Is duma nekepelaǥuy ziyà te sibsivayan pehendiyà te Batu he Rimon. Piru 5,000 ǥihapun is nepatey kandan diyà te zalan. Midsiguduwan sikandan del-asa te menge Israilihanen taman te Gidom ne nekepatey en maan is menge Israilihanen te 2,000 kandan. 46 Is langun he nepatey zutun he andew, 25,000 he menge Benjaminhen he menge mevurut he menge sundaru he neǥumeenan te menge ispada. 47 Iyan, duen 600 he menge Benjaminhen he nekepelaǥuy ziyà te Batu he Rimon, ne zutun dan med-ubpà seled te heepat he vulan. 48 Midlikuan te menge Israilihanen is menge Benjaminhen ne mibpenhimetayan dan ragkes is menge uyaǥen wey is minsan hengkey he egkeehè dan. Mibinsulan dan is langun he menge inged te menge Benjaminhen he egkeseǥazan dan.

<- Menge Zatù 19Menge Zatù 21 ->