1 Dutun he timpu, midtiǥum is menge sundaru te Efraim para te kebpekidtebek, ne midlayun sikandan te Wahig he Jordan ne midhendiyè dan te Zafon su ed-etuvangen dan si Jefta. Migkaǥi sikandan diyà te kandin te, “Maan is wazè key kenikew ipetukew hein nekidtebek kew te menge Amunihanen? Tenged kayi te mibeelan nu ne ebinsulan dey is baley nu ne idragkes dey sikew.” 2 Piru migkaǥi si Jefta ziyà te kandan te, “Hein utew meinit is kebpekidtebek dey te menge Amunihanen, mibuyù a te tavang diyà te keniyu. Piru wazè kew medtavang. 3 Ne hein netuenan ku he kenè kew edtavang, impedserakan ku is untung ku te kebpekidtebek. Ne mibpengelinteuwan te Nengazen he mekezaag a. Ne ǥuntaan, maan is egkesuat kew he ebpekidtebek kedì?”

4 Ne midtavak is menge tig-Efraim te, “Sikiyu is menge tig-Gilead edluivan niw is menge zuma niw he menge kevuwazan ni Efraim wey ni Manase.” Umbe midtiǥum ni Jefta is menge maama te Gilead ne nekidtebek dan te menge tig-Efraim. Ne nezaag dan is menge tig-Efraim. 5 Mibentayan te menge tig-Gilead is menge leyunà diyà te Wahig he Jordan pehendiyà te Efraim. Emun duen ebpekepelaǥuy he tig-Efraim he edlayun, ed-insaan dan ke tig-Efraim be sikandin etawa kenà. Ne emun edtavak te “Kenà,” 6 ne ibpekaǥi zan sikandin te lalag he “Shibolit,” su is menge tig-Efraim, kenè dan metau he egkagi zuen. Ne zutun egketuusan ke hustu ve he kenà sikandin tig-Efraim. Ne emun kenà utew egkeuntul is kegkaǥi zin te “Shibolit,” edekepen dan ne edhimetayan dan dutun mismu te repasan diyà te Wahig he Jordan. Ne zutun he timpu 42,000 is nepatey he tig-Efraim.

7 Mibpenguluwan ni Jefta is Israel seled te heenem he tuig. Ne hein minatey en sikandin, inleveng sikandin diyà te sevaha he inged diyà te Gilead.

8 Hein minatey en si Jefta, iyan nekeilis kandin te kebpengulu te Israel si Ibzan he tig-Betlehem. 9 Si Ibzan duen din 60 he anak: 30 he menge maama wey 30 daan he menge vahi. Impepengesawa zin wey impemeesawa zin is menge anak din te kenà sakup te tribu zan. Mibpenguluwan din is Israel seled te pitu he tuig. 10 Ne hein minatey en sikandin, inleveng sikandin diyà te Betlehem.

11 Ne is nekeilis kandin te kebpengulu te Israel iyan si Elon he tig-Zebulun. Mibpenguluwan din is Israel seled te sepulù he tuig. 12 Ne hein minatey en sikandin, inleveng sikandin diyà te Ayalon he sakup te Zebulun.

13 Ne is nekeilis kandin te kebpengulu te Israel iyan si Abdon he anak ni Hilel he tig-Piraton. 14 Duen din 40 he anak he menge maama wey zuen din 30 he apù he menge maama, ne is kada sevaha kandan duen din untuzà he asnu. Mibpenguluwan din is Israel seled te walu he tuig. 15 Ne hein minatey en si Abdon, inleveng sikandin diyà te Piraton, diyà te vuvungan te Efraim, he tanà dengan te menge Amalikanhen.

<- Menge Zatù 11Menge Zatù 13 ->