1 Hein minatey en si Abimelec, si Tola he anak ni Pua wey apù ni Dodo iyan nengulu te kedlibri te Israel. Ebpuun sikandin diyà te tribu ni Isacar, piru ziyà sikandin ed-ubpà te Shamir he diyà te vuvungan te Efraim. 2 Mibpenguluwan din is Israel seled te 23 he tuig. Ne hein minatey en sikandin, inleveng sikandin diyà te Shamir.

3 Is neketundug ki Tola ne iyan si Jair he tig-Gilead. Mibpenguluwan din is Israel seled te 22 he tuig. 4 Duen din 30 he menge anak, is kada sevaha kandan duen din asnu he ed-untuzan. Heini sikandan iyan midumala te 30 he inged diyà te Gilead he egngezanan guntaan te menge inged ni Jair. 5 Hein minatey en si Jair, inleveng sikandin diyà te Kamon.

6 Mid-uman en maan mebaal is menge Israilihanen te mezaat he igkepauk te Nengazen. Mid-iniyuǥan dan is Nengazen su iyan dan mid-azap is menge ledawan te ed-ezapen he si Baal wey si Ashtoret, wey is menge ed-ezapen diyà te Aram, Sidon, Moab, Ammon, wey Filistia. 7 Tenged kayi nepeukan sikandan te Nengazen ne mibey-anan din sikandan he mesakup te menge Amunihanen wey te menge Filistihanen. 8 Seled te 18 he tuig is kebpeentusa zan te langun he menge Israilihanen he ziyà te lugar te menge Amorihanen diyà te Gilead, he ziyà dapit te edsilaan te Wahig he Jordan. 9 Midlayun is menge Amunihanen diyà te zapit te edsenlepan te Wahig he Jordan ne mibpekidtebek dan te menge tribu ni Juda, ni Benjamin, wey ni Efraim. Tenged kayi, utew nerasey is menge Israilihanen.

10 Umbe, mibuyù te tavang is menge Israilihanen diyà te Nengazen. Ke sikandan te, “Nekesalè key ziyà te kenikew, su mid-iniyuǥan dey sikew is Megbevayè dey su iyan dey mid-azap is menge ledawan te ed-ezapen he si Baal.” 11-12 Midtavak is Nengazen te, “Hein impaantus kew te menge Ehiptohanen, menge Amorihanen, menge Amunihanen, menge Filistihanen, menge Sidunhanen, menge Amalikanhen, wey menge Maonhen, mibuyù kew te tavang kayi te kediey ne midlibri ku sikiyu. 13 Piru mid-iniyuǥan a ǥihapun keniyu su iyan niw mid-azap is duma he menge ed-ezapen. Umbe kenè ku en sikiyu edlibriyen guntaan. 14 Maan is kenè kew ziyà ebuyù te tavang te menge ed-ezapen he mibpilì niw he iyan ed-ezapen niw? Iyan niw sikandan ipelibri keniyu emun edlised kew.”

15 Piru migkeǥiyan dan is Nengazen te, “Nekesalè key ziyà te kenikew umbe veeli nu kayi te kenami is egkesuatan nu. Piru kehizuwi key, ne libriya key ǥuntaan.” 16 Ne zutun mid-iniyuǥan dan is menge ed-ezapen dan ne iyan dan mid-azap is Nengazen. Ne hein neuǥet kenè en egkaantus te Nengazen is kegkaahaa zin kandan te egkengerasey ne nehizuwan din sikandan.

17 Dutun he timpu ebpetebekà is menge Amunihanen wey is menge Israilihanen. Migkampu is menge Amunihanen diyà te Gilead, ne ziyà mulà te Mizpa is menge Israilihanen. 18 Ebpelelelaǥà is menge pengulu ziyà te Gilead, ke sikandan te, “Ke hentei is ebpengulu kenitew te kebpekidtebek te menge Amunihanen ne iyan edhimuwen tew he pengulu te langun he meǥinged kayi te Gilead.”

<- Menge Zatù 9Menge Zatù 11 ->