1 Pemineg kew! Kunaan niw vuwa ke meluya wey vengel is Nengazen, ne tenged dutun kenè kew zin egkehimu te edlibri wey kenà sikandin ebpekezineg ke ed-umawen niw. 2 Iyan nekepesuwey keniyu puun te Megbevayà is menge salè niw ne iyan daan heini hinungdan he mid-iniyuǥan kew zin wey kenè en ebpemineg te menge kebpengemuyù niw. 3 Su ebpenhimatey kew te etew, wey ebaal kew te zuma pa he mezaat. Midtarùtarù kew wey migkaǥi kew te mezaat he menge lalag. 4 Wazà diyà te keniyu is hustu he kukuman; ne tarù is menge sumbung niw mehitenged te iring niw he etew. Ebpelanu kew te mezaat, ne ebeelen niw heini. 5-6 Is mezaat he menge pelanu niw, iring te impis te edhereg he uled, he ebpatey is egkaan duen. Iring daan heini te valey te kelelawà he kenà egkehimu he ebeelan he visti, umbe wazà pulus te mezaat he menge pelanu niw. Mezaat is menge vaal niw wey mesipala kew. 7 Elistu kew he ebaal te salà ne abtik kew he edhimatey te wazà mekesalà. Mezaat is menge ed-is-isipen niw, ne minsan hendei kew ebpevayà ne ebpendezaat kew. 8 Wazè niw netuenan mehitenged te melinew he kebpekesavuk. Wazè niw veliya is hustu he kukuman, kekenà, edtuisen niw heini. Is ed-iring kayi te menge vaal niw, ne kenè daan ebpekesaǥad te melinew he kebpekesavuk. 9 Tenged kayi wazè pa siluti te Megbevayà is menge kuntada tew, ne wazè kiw zin pa veǥayi te kezeeǥan duma is ketazeng. Edtaǥad kiw te kerayag piru kerusireman is nekeuma. Umbe midhipanew kiw ziyà te kerusireman. 10 Iring kiw te lakap he ebpekepenamsam diyà te elavat, ne ebpemekeurambak kiw minsan meudtu, henduen be te edhipanew kiw ziyà te merusirem. Minsan pa te mezesen is menge lawa tew, henduen kiw te menge minatey su wazè tew egkehimu. 11 Tenged te kegkeseeng tew nekezag-es kiw he henduen kiw te edhiniǥer he bir wey egkaǥi he merepatik. Ebperateng kiw he edsilutan te Megbevayà is menge kuntada tew ne edlibriyen kiw zin, piru wazà heini mehitavù. 12 Su mahabet en is menge salè tew ziyà te etuvangan te Megbevayà, ne iyan heini ebpeǥumbenar he ereg kiw he edsilutan. Uya, netuenan tew he layun kiw ebaal te salà. 13 Midsupak wey midluivan tew is Nengazen; mid-iniyuǥan tew is Megbevayè tew. Edèdaaǥen wey ebpesipelahan tew is duma. Ebpurungan tew ed-is isipa ke ebmenmenuwen tew is kedtarùtarù tew. 14 Ne iyan heeyan hinungdan he wazè pa siluti te Megbevayà is menge kuntada tew wey wazè kiw zin pa veǥayi te kezeeǥan duma is ketazeng. Egketembunan en is tutuu ziyà te minsan hendei; is menge etew kenè en egkeseriǥan. 15 Uya, naawè en is ketutuanan, ne is menge edlikey te kebaal te mezaat ne ebpesipelahan.

Naahà heini te Nengazen, ne wazè din ikelipey is kenà ked-ikul te hustu he kukuman. 16 Neinuinu sikandin hein neehè din he wazà minsan sevaha he edtavang te menge edèdaaǥen. Umbe migamit din is kandin he gehem te kedluwas kandan, wey is kandin mismu he ketazeng iyan neketavang kandin. 17 Egemiten din he iring te pengalang te kumeng is ketazeng, ne egemiten din he iring te hilmit is keluwasan. Idsul-ub din iring te visti is penimales wey rerangit. 18 Ebelesan din is menge kuntada zin sumalà te menge vaal zan; minsan is diyà te meziyù. Egkeǥezaman dan is rerangit din. 19 Minsan hendei edtehuzen sikandin wey ebeǥayan te zengeg te menge etew, su ebpekeuma sikandin he iring te edeǥurus he wahig he edhiyupen te mevendes he keramag.

20 Migkaǥi is Nengazen te, “Ebpekeuma ziyà te Zion is menluluwas niw te menge kevuwazan ni Jacob, ne edlibriyen din is ed-engked he ebaal te salà. 21 Ne iyan heini kebpekid-uyun ku keniyu: Kenà egkaawà is Mulin-ulin ku he ziyà te keniyu wey is menge lalag he migkaǥi ku keniyu. Tudtula niw heini ziyà te menge anak niw, ne edtudtulen dan daan heini ziyà te kandan he menge anak, ne ebpedayun heini pehendiyà te huziyan he menge lapis te kevuwazan. Iyan a, is Nengazen, is migkaǥi kayi.”

<- Isaias 58Isaias 60 ->