1 Migkaǥi is Megbevayà te, “Lipaya niw wey desiǥa is menge etew ku. 2 Lelaǥi niw te menayù is menge etew ziyà te Jerusalem. Tudtula niw kandan he nepasad en is kegkerasey zan wey nepesaylu en is menge salè dan. Su nezawat dan en is silut he para te langun he menge salè dan.” 3 Duen menunudtulà he ebpemensag diyà te sibsivayan. Ke sikandin te, “Endama niw is beyeey ziyà te sibsivayan he zutun ed-ikul is Nengazen. Tendanga niw is dalan he ed-ikulen te Megbevayè tew. 4 Is kada lis-evu, edtembakan te tanà, ne is kada vuntud etawa buvungan, ne ebpenhayen, ragkes is menge lugar he ebpemukbuketur. 5 Ne ibpezayag is mekeǥeǥehem he kebpekiduma te Nengazen, ne egkaahà heini te langun he menge etew. Su iyan mismu migkaǥi is Nengazen kayi.” 6 Duen migkaǥi kayi te kediey te, “Wali ka!” Midtavak a te, “Hengkey is idwali ku?” Migkaǥi sikandin te, “Iwali nu he is langun he etew, ne iring te sagbet, ne is bentuǥan dan, iring te vulak te sagbet. 7 Is sagbet egkeǥangu ne egketaktak is menge vulak din su egkeremaǥen heini te keramag he ibpekeramag te Nengazen. Tutuu he iring te sagbet is etew. 8 Is sagbet egkeǥangu ne egkengeulug is menge kevukad din, piru is lalag te Megbevayè tew ebpedayun te wazà pidtemanan.” 9 Sikiyu is edsangyew ziyà te Zion, is inged he Jerusalem te meupiya he tudtulanen, tekezeg kew ziyà te metikang he vuntud, ne pekezaǥing kew is edsangyew te meupiya he tudtulanen. Kenè kew mahandek he ebpemensag. Keǥiyi niw is menge etew ziyà te menge inged he sakup te Juda he nekeume en is Megbevayè dan. 10 Uya, nekeume en is Nengazen he MEGBEVAYÀ he mekeǥeǥehem, ne edhadì sikandin he mekeǥeǥehem. Ebpekeuma sikandin he ed-uwit te suhul he para te menge etew zin. 11 Ed-etimanen din is menge etew zin iring te ked-etiman te ebantey te menge kerehidu: Edsepipiyen din is dezeisey pa he menge kerehidu ne meelima sikandin he egiya zuen te menge telenati.

12 Hentei is ebpeketakes te zaǥat diyà te palad din wey ebpekesukud te langit pinaaǥi te kedrengawa kayi? Hentei is igkaahuk din diyà te tekesà is langun he tanà, etawa ebpekehimu he edtimbang te menge vuntud wey menge vuvungan? 13 Hentei is nesayud te isip te Nengazen etawa ebpekepenurù kandin ke hengkey is ereg he ebeelan din? 14 Hentei is mibuyuan din te sambag para mekesavut sikandin wey hentei is nenurù kandin te hustu he zalan? Hentei is mibeǥey kandin te ketau etawa migiya kandin pehendiyà te zalan te kedsavut? Wazà! 15 Iyan benar, is menge nasyun iring dà te tiǥis te wahig puun te teleǥuey kayi, etawa eliyavuk diyà te timbangan. Para te Megbevayà, is menge isla ke ebitbiten din, iring dà kahagkap te eliyavuk. 16 Is langun he menge langgam diyà te Lebanon, kenà ereg he ibpemuhat diyà te kandin, ne is menge kayu kayi, kenè pa zaan ereg he idtavun te menge pemuhat. 17 Kenà ebpekesusuluwan kandin is menge nasyun. Diyà te isip din, wazà bali te menge nasyun. 18 Umbe hentei is igkehindeg niw te Nengazen? Etawa hengkey is ibpetug-iring niw kandin? 19 Iyan be is menge ed-ezapen he ebeelan dà te pandey, ne ed-epizan te vulawan wey edeyzeyanan te kedina he pelata? 20 Etawa iyan is menge ed-ezapen he ed-as-as he kayu, he ebpeveelan te pubri he etew su idhalad din? Ebpeveelan din heini te metau he pandey su para kenà mepiley.

21 Wazè kew ve mesayud etawa wazà kew ve mekezineg? Wazè be nenudtul ziyà te keniyu puun te puunà ke mibmenumenu is kedlimbaǥa te kelibutan? 22 Iyan midhimu kayi is Megbevayà he ebpimpinuu ziyà te pinuuwè din te kedhadì diyà te zivavew te kelibutan, ne is kandin he ked-ahaa te menge etew kayi te zizalem henduen dà te menge lemetik. Mibekar zin is langit iring te kurtina. Mibekar zin heini he iring te tulda su para meubpai. 23 Id-awè din is gehem te menge pengulu kayi te kelibutan, ne midhimu zin sikandan he wazà menge pulus. 24 Neiring sikandan te pinemula he veǥu pa he midtuvù, he henduen te wazè pa mekependalid. Ne hein midhiyup te Nengazen ne neǥangu heini, ne neiring te ukap he inlayap te eribpures.

25 Migkaǥi is Waǥas he Megbevayà te, “Hentei is ebpetug-iringan niw kediey? Duen be iring kediey?”

26 Lingehè kew ziyà te langit! Hentei man is midlimbag keniyan te menge vituen? Is midlimbag keniyan iyan is Megbevayà. Midtigseselimbaha zin is kebpelepawa zin kandan ne migngezanan din te menge ngazan dan. Ne tenged te ǥehem din ne wazà minsan sevaha kandan he naawà. 27 Sikiyu is menge etew ziyà te Israel he menge kevuwazan ni Jacob, maan is edriklamu kew he wazà beliya te Megbevayà is menge pelanu niw wey ketenged niw? 28 Wazè niw ve metueni wey mezineg he is Nengazen iyan kes wazà pidtemanan he Megbevayà he midlimbag te tivuuk he kelibutan? Kenè sikandin egkeveley wey edluyahan, ne wazà ebpeketegkad te isip din. 29 Ebeǥayan din te zesen is menge meluya wey nengeveley. 30 Minsan is menge vetan-en egkeveley wey ebmeluya, ne egkengepiley sikandan, 31 piru sikan is edsarig te Nengazen ebpekeuman ebpekaangken te zesen. Egkeiring sikandan te edlayang he vanug; emun ebpelelaǥuy sikandan ne kenè dan egkeveley, emun edhipanew sikandan kenè dan edluyahan.

<- Isaias 39Isaias 41 ->