2 Nengazen, kehizuwi key. Midsarig key kenikew. Lig-eni key kada andew, wey libriya key zutun te timpu te kelised. 3 Ebpemelaǥuy is menge etew emun egkezineg dan is daǥing te laǥeng nu he henduen be te ruǥung. Emun edhitindeg ka su edsilut ka ebpekedsusuwey is menge etew ziyà te menge nasyun. 4 Edtevanen is menge azen dan; egkeiring sikandan te pinemula he midterapan.
5 Is Nengazen, lavew te langun! Su ziyà sikandin ed-ubpà te langit. Kenè din id-awà diyà te Jerusalem is hustu he kukuman wey ketazeng. 6 Edlig-enan kew zin dutun te keniyu he timpu. Layun kew zin edlibriya wey ebeǥayan kew zin te ketau wey keuluwanen. Is mahal he ketiǥeyunan niw iyan is kedtehuza niw te Nengazen.
7 Pemineg kew! Is duma niw he menge mevurut nengulahì diyà te menge zalan is ebpetevang; edsineǥew is menge imbehedur niw su iyan suat dan he kenà maawà is kelinew. 8 Wazè en ebayà diyà te menge zalan; wazè en edriǥuriǥu zuen. Midsupak en is neuyunan ne wazè en beliya is menge tistiǥus kayi. Wazè en dutun etew he edtehuzen. 9 Nezeetan is tanà he Israel. Nengeǥangu is menge kayu ziyà te Lebanon, ne ke và dà etew ne neeled-eled heini. Neiring te sibsivayan is menge suǥud diyà te Sharon. Netaktak is menge zahun te menge kayu ziyà te Bashan wey Carmel. 10 Migkaǥi is Nengazen te, “Iyan en heini timpu te kedwaleng ku, ne ebeǥayan a te zengeg te menge etew. 11 Sikiyu is menge tig-Asiria, wazà pulus te pelanu niw wey vaal niw. Is pauk niw he henduen be te egkeregreg he hapuy, ne iyan dà ebpekezezaat keniyu. 12 Egkevinsulan kew taman te egkeiring kew te apug. Egkeiring kew te zuǥiyen he zezeisey he kayu he ebpenempezen ne ebinsulan. 13 Sikiyu is menge meǥinged diyà te menge nasyun diyà te meziyù wey ziyà te uvey, pemineǥa niw ke hengkey is mibeelan ku wey kilelaa niw is kegkemekeǥeǥehem ku.”
14 Mibpengerker tenged te kekahandek is menge mekesasalà diyà te Zion. Egkaǥi sikandan te, “Is Megbevayà, iring te edriyubriyub he hapuy he kenà egkeuvukan. Hentei man kenitew is ebpekeubpà diyà te etuvangan te Megbevayà?” 15 Is ebpekeubpà dutun, iyan is etew he nengungubpaan he metazeng wey tutuu is menge lalag din, ne wazà mebpenapì, wey wazà medawat te sipsip. Wazà sikandin mebpekiduma te mibpelanu te kebpemenhimatey wey te kebaal te zuma pa he mezaat he menge vaal. 16 Iyan heini ked-etew te menge etew he ebpekelingkawas te vangkit, ne iring te ziyè dan med-ubpà te metikang he menge lugar, ne iyan egkehimu he endilungè dan is dezekelà he menge vatu. Ne kenà sikandan egkeewaan te keenen wey wahig.
17 Sikiyu is menge Israilihanen, egkeehè niw is sevaha he hadì he mekeǥeǥehem, he utew meluag is ginhedian din. 18 Egketenuzan niw is nehuna he mekahandekhandek he hitavù he zutun midhendiyà te keniyu is menge upisyal ziyà te Asiria, ne mibilang dan ke pira is menge turi niw, wey midsusi zan ke pira he menge azen is egkekuwa zan diyà te keniyu. 19 Piru kenè niw en egkeuman egkaahà haazà is gelbuwen he menge etew he kenè niw egkesavut is kineǥiyan dan. 20 Ahàa niw is Zion, kes inged he zutun kiw edsilibra te menge pista. Heini he inged, egngezanan daan te Jerusalem, egkeehè niw he melinawen wey melig-en. Iring heini te melig-en he tulda, he kenà egkevazut is menge palpal zin wey kenà egkevidtew is menge hiket din. 21 Kayi he lugar ibpeehè te Nengazen kenitew he mekeǥeǥehem sikandin. Is Jerusalem, egkeiring te sevaha he lugar he meluag is menge zezekelà wey zezeisey he menge wahig duen he edtudà, ne kenà ebpekehimu he edlayun duen is untuzà te menge kuntada. 22 Ebeelan heini te Nengazen su iyan sikandin perehukum tew, perevaal te kesuǥuan tew, wey edhadì kenitew. Ne iyan sikandin edlibri kenitew.
23 Is Jerusalem guntaan, iring te untuzà diyà te zaǥat he nelugkà is menge hiket din wey menge layag, ne kenà egkevekar is menge layag din. Piru egkeuma is timpu he mahabet he menge azen is egkaaǥew te menge tig-Jerusalem diyà te menge kuntada zan. Umbe minsan is menge piang ne egkevehinan. 24 Dutun he timpu, wazà meǥinged diyà te Jerusalem he ebpekekaǥi te, “Deruwanen a.” Ebpeseyluwen te Nengazen is menge salè dan.
<- Isaias 32Isaias 34 ->