1 Nengazen, iyan ka Megbevayè ku! Edalig a wey ebeǥey te zengeg kenikew su utew egkein-inuwi is menge mibpemeelan nu. Midtuman nu is menge pelanu nu he midhimu nu zengan te nehuna he timpu. 2 Mibengkag nu is binerengbeng he menge inged te menge etew ziyà te zuma he menge nasyun. Midrundus nu is melig-en he menge vahin te inged dan, ne kenè en heini egkeuman egkevangun. 3 Umbe, ebeǥayan ka te zengeg te mekeǥeǥehem he menge etew, wey edtehuzen ka te mesipala he menge nasyun. 4 Iyan ka kes melig-en he eputà te menge pubri emun timpu te kedlised. Helungè ka emun timpu te vagyu wey gulavung. Su is kedsurung te mesipala he menge etew, iring te vagyu he ebpekesuǥat diyà te verengbeng, 5 wey iring te keinit diyà te disirtu. Piru impeengked nu is kulehian te menge etew ziyà te zuma he nasyun. Impeengked nu is kegkanta te mesipala he menge etew, iring te keinit te andew he naawà su nenggapun.

6 Kayi te Buvungan he Zion, ebpengandam is Nengazen he Mekeǥeǥehem te sevaha he keemuran te para te langun he menge etew. Ne zutun metaam he menge keenen wey menge inumen is id-andam din. 7 Ne kayi zaan he vuvungan, id-awè te Nengazen is kegkeseeng te menge etew ziyà te langun he menge nasyun. 8 Id-awà te Nengazen he MEGBEVAYÀ is gehem te kemetayen ne ebpunasen din is luhà te langun he menge etew. Id-awè din is keelezan te menge etew zin puun te tivuuk he kelibutan. Egkehitavù heini su iyan migkaǥi kayi is Nengazen

9 Emun egkeulaula en heini, egkaǥi is menge etew te: “Iyan sikandin Megbevayè tew! Midsarig kiw kandin, ne midlibri kiw zin. Iyan sikandin Nengazen he midseriǥan tew. Edlipey kiw wey edlipeylipey su midlibri kiw zin.”

10 Benar iyan, edtevangan te Nengazen is menge etew ziyà te Buvungan he Zion, ne edsilutan din mulà is menge tig-Moab. Edtekutakan din sikandan iring te kedtekutaki te reǥami ne ebpesegdanen en he meredak. 11 Ebpenigudu zan para mekelingkawas sikandan keniyan te mezaat he kebpekesavuk iring te kebpenigudu kegkapeykapey te etew he ed-emparas. Piru minsan metau sikandan he ed-emparas, edlenezen dan gihapun te Nengazen; ibpekevavè din sikandan is menge gelbuwen. 12 Ebengkaǥen din is metikang wey melig-en he menge verengbeng dan taman te ebpekepeyapat heini ziyà te tanà.

<- Isaias 24Isaias 26 ->