1 Tenged te suǥù ni Hadì Sargon te hadì te Asiria, midsurung te peremandar te menge sundaru ziyà te Asiria is Ashdod, ne mid-aǥew zan heini. 2 Dutun te wazè pa heini mehitavù ne migkaǥi is Nengazen diyà te ki Isaias he anak ni Amoz te, “Luwasa nu is bisti nu he saku wey pul-uta nu is sendalyas nu.” Midtuman heini ni Isaias, ne midhiphipanew sikandin is wazà bisti wey sendalyas.

3 Ne migkaǥi is Nengazen te, “Is suluǥuen ku he si Isaias midhiphipanew he wazè din bisti wey sendalyas seled te tetelu he tuig. Ne sevaha heini he simbulu wey petizaan te Ehipto wey Etiopia. 4 Su ebihaǥen te hadì te Asiria is menge tig-Ehipto wey menge tig-Etiopia, batà etawa meǥurang. Ne ibpehipanew zin sikandan he wazà menge visti wey menge sendalyas. Egkaahà sikandan he menge lelevas, ne egkepeel-elezan is menge Ehiptohanen. 5 Is menge midsarig te Etiopia wey is ebantug te Ehipto egkengeheratan wey egkengepeel-elezan. 6 Ne emun egkehitavù en heini, egkaǥi is menge Filistihanen te, ‘Ahàa niw man is nehitavù te menge nasyun he midseriǥan tew wey mibuyuan tew te tavang su para melibri kiw te kedeezeti kenitew te hadì te Asiria. Ne ebmenumenu kiw en buwa wey kiw mekelikey?’ ”

<- Isaias 19Isaias 21 ->