3 Migkeǥiyan te menge vahi he tig-Moab is menge tig-Juda te: “Sembaǥi key ke hengkey is ereg he ebeelan dey. Pengelangi key keniyu he iring te ebpekehelung key ziyà te merapung he kayu ke meudtu. Mibpelaǥuy key puun diyà te kenami, ne wazè key en diyà te kenami he ubpeey. 4 Ipeubpè key is menge tig-Moab diyà te tanè niw. Pengelangi key keniyu te egkesuat he edezaat kenami.”
6 Nezineg dey is kegkegelbuwen te menge tig-Moab. Menge gelbuwen sikandan wey menge mepelevawen, iyan, wazè en kayi pulus. 7 Umbe, edsineǥawan te menge tig-Moab is nasyun dan. Edsineǥew sikandan is langun tenged te kegkaawà te metaam he keenen dan diyà te Kir Hareset. 8 Nengezeetan is menge vevesukè diyà te Heshbon ragkes en is menge pemuleey te paras diyà te Sibma. Midezeetan te menge pengulu te menge nasyun is menge pemuleey te paras he taman en diyà te Jazer, pehendiyà te disirtu, wey taman en te Daǥat he Meriǥà. 9 Umbe edsineǥew a, iring te tig-Jazer he midsineǥew tenged duen te pemuleey te paras diyà te Sibma. Edsineǥawan ku is Heshbon wey Eleale su kenè ne egkezineg dutun is kedlipey te menge kedraǥun dan. 10 Naawà is kelipey wey kegkebibu tenged te zekelà he selebpeten he menge vevesukà. Wazè en egkanta etawa ed-ugyab diyà te menge pemuleey te paras. Wazè en egkeres te paras he para ebeelan he vinu. Impeengked en te Nengazen is kebpekeugyab dan. 11 Umbe, neiring is gehinawa ku te mekevulungbulung he zaǥing te alpa su ingkeseeng ku is nehitavù diyà te Moab. Ingkeseeng ku zaan is nehitavù te Kir Hareset. 12 Bà dà egkeveley is menge tig-Moab te kedlikù-likù diyà te menge simbahan dan diyà te metikang he menge lugar. Kenà ebpulus is kedhendiyè dan te lavew he simbahan dan para te kebpengemuyù.
13 Nekaǥi en heini zengan te Nengazen is mehitenged te Moab. 14 Ne ǥuntaan iyan en maan heini egkeǥiyen din, “Seled te tetelu he tuig egkaawà is ketiǥeyunan te Moab, ne egkepeel-elezan is menge etew kayi. Deisey zà is egkesamà he uuyag te menge etew kayi, ne heini sikandan kenè pa memelig-en.”
<- Isaias 15Isaias 17 ->