1-2 Mekehizuhizu kew is ebaal te kenè hustu he menge kesuǥuan he nenlupiglupig te menge pubri he emurè ku te inged, wey mibpekewazà te ketenged dan wey wazà medtuman te hustu he kukuman para kandan. Pinaaǥi kayi he menge kesuǥuan egkuwaan niw is azen te menge valu he vahi wey menge ilu. 3 Hengkey is ebeelan niw zutun te andew he edsilutan kew? Hengkey is ed-ul-ulahan niw emun ebpekeuma is kezeetan he ebpuun te meziyù? Hentei is ebuyuan niw te tavang? Wey hendei niw id-eles is ketiǥeyunan niw? 4 Wazà egkesamà keniyu, kekenà, egkengevihag kew etawa ebpemematey. Piru kenè pa ǥihapun egkeengked is pauk te Nengazen! Andam pa ǥihapun sikandin he edsilut keniyu.

5 Migkaǥi is Nengazen te, “Mekehizuhizu is menge tig-Asiria. Iyan sikandan egemiten ku he lagkut he para te kedsilut te menge egkeepesan ku. 6 Edsuǥuen ku is menge tig-Asiria te kedsurung te egkeepesan ku he nasyun. Heini is nasyun, kenà sikandan edsunud kedì te Megbevayè dan. Heini sikandan, edezeetan ku iring te vasak diyà te kersada he edtekutakan, wey mepenguwa te menge tig-Asiria is langun he menge azen dan.”

7 Piru kenà egketuenan te hadì te Asiria he egemiten dà sikandin te Nengazen. Kunaan din ke ebpendezeetan din dà is mezakel he menge nasyun. 8 Ebpahambug sikandin he egkaǥi te, “Is menge peremandar te menge sundaru ku ne henduen be te menge hadì. 9 Wazà mibizahayan te Carkemish te Calno, wey Arpad te Hamat, wey is Damascus te Samaria? Neked-iiring dà heini he menge inged su pudu ku naaǥew. 10 Kayi en te palad ku heini is menge ginhedian he ed-azap te menge ed-ezapen he lavew pa te menge ed-ezapan diyà te Jerusalem wey Samaria. 11 Midezeetan ku en is Samaria wey menge ed-ezapen kayi. Ne iyan gihapun heeyan ebeelan ku te Jerusalem wey te menge ed-ezapen kayi.”

12 Piru iyan heini migkaǥi te Nengazen he egkehitavù emun egkepasad din en is ebeelan din he ebpekesuǥat te Buvungan he Zion wey ziyà te Jerusalem: “Edsilutan ku is hadì te Asiria tenged te kegkemepelevawen din wey kegkegelbuwen! 13 Su migkaǥi is hadì te Asiria te, ‘Nehimu ku heini tenged te zesen ku wey ketau ku: Midpen-aǥew ku is mezakel he menge nasyun wey is menge ketiǥeyunan dan. Iring a te tudu he vaka; nezaag ku is menge hadì dan. 14 Mibpenguwa ku is ketiǥeyunan te menge nasyun he iring dà te nenguwa a te impis diyà te mid-ewaan he selaǥà. Wazè en midrerekubkub etawa nemekak.’ ”

15 Lavew ve is wasey etawa gavas te migamit duen? Iyan be egkevitbit te lagkut is migawed duen? 16 Umbe, is Nengazen he Mekeǥeǥehem ebpeeǥiyan din te zaru is menge sundaru te hadì te Asiria, he menge meupiya is kedlelawa. Ebinsulan te Nengazen is ketiǥeyunan kayi te edriyubriyub he hapuy. 17 Is Nengazen he iyan sulù te Israel wey waǥas he Megbevayè dan, egkeiring sikandin te edriyubriyub he hapuy. Ebinsulan din seled te meǥaan dà heini is duǥiyen he zezeisey he kayu he iyan is Asiria. 18 Iring te edezeetan te zaru is lawa te etew, edezeetan daan te Nengazen is ketelunan wey is uuzaran he vevesukà te hadì te Asiria. 19 Deisey zà is egkesamà he menge kayu ziyà te menge ketelunan din. Ne minsan is batà ebpekehimu he ebilang kayi.

20-21 Egkeuma is andew he is egkengesamà he menge kevuwazan ni Israel, he iyan si Jacob, kenè ne edsarig te Asiria he mibpaantus kandan, kekenà, diyè en edsarig te Nengazen, he Waǥas he Megbevayà te Israel. Ebpekid-uliey zan te Mekeǥeǥehem he Megbevayà. 22-23 Minsan pa te iring kehabet is menge kevuwazan ni Israel te pantad diyà te veyvey te zaǥat, piru zeisey zà kandan is edlikù. Netelaan en is kedezeeti te tanè dan. Kenè en egkeeǥen is metazeng he kedsilut te Nengazen he MEGBEVAYÀ he Mekeǥeǥehem. Edtumanen din iyan heini. 24 Umbe, migkaǥi is Nengazen he MEGBEVAYÀ he Mekeǥeǥehem, “Sikiyu is menge etew ku he meǥinged te Jerusalem, kenè kew mahandek te menge tig-Asiria minsan pa te edresayen kew zan iring te mibeelan te menge tig-Ehipto ziyà te keniyu. 25 Su kenè en egkeuǥet ne egkaawè en is pauk ku keniyu ne ziyè ku maan te kandan ibpaahà is pauk ku taman te ebpemematey sikandan. 26 Edsilutan ku sikandan iring te mibeelan ku ziyà te menge Midianhen diyà te Batu he Oreb wey te menge tig-Ehipto hein midlened ku sikandan diyà te zaǥat. 27 Dutun he andew, ibpeǥawas ku sikiyu puun te ǥehem te Asiria he henduen be te meveǥat he uwiten he midtiang niw wey iring te eyuǥu he nekeveǥat te tengel niw. Ebpekeǥawas kew puun te ǥehem din su egkehimu kew he gemhanan.”

28 Midsurung te menge tig-Asiria is Ayat. Diyà sikandan mebayà te Migron ne intaǥak dan diyà te Micmash is menge uwiten dan. 29 Mibayè dan diyà te leyunà, ne ziyè dan mebpemenlipezeng te Geba. Nengahandek is menge tig-Rama, ne nemelaǥuy is menge meǥinged te Gibea he iyan inged ni Hadì Saul. 30 Kulahì kew is menge tig Galim! Pemineg kew is menge tig-Laish wey sikiyu is menge tig-Anatot he menge mekehizuhizu! 31 Nemelaǥuy en is menge meǥinged te Madmena wey Gebim. 32 Guntaan he andew ebpekeuma is menge tig-Asiria ziyà te Nob. Ne ed-uyew sikandan su edsurung dan diyà te Jerusalem, kes Buvungan he Zion. 33 Pemineg kew! Is Nengazen he Mekeǥeǥehem edezeetan din is menge tig-Asiria pinaaǥi te utew zekelà he ǥehem din. Ed-iringen din sikandan te ebpenempezen he menge subpang te kayu. Ebpekevevaan din sikandan is menge gelbuwen iring te kebpemiley te memetawis he kayu. 34 Edezeeten din sikandan he iring te ebpemilayen sikandan he kayu ziyà te ketelunan pinaaǥi te wasey heini skandan is iring te menge kayu ziyà te Lebanon, edezeetan te mekeǥeǥehem Megbevayà.

<- Isaias 9Isaias 11 ->