1 Migkaǥi pa is Nengazen te, “Pemineg kew, is menge etew te Israel, ragkes kew en is menge memumuhat wey menge sakup te pemilya te hadì, su heini he kedhukum ne para keniyu: Iring kew te penuǥes he nekeutel, su nezeetan tenged keniyu is menge etew ziyà te Mizpa wey Tabor. 2 Nekidsukulè kew kediey wey edtinguhè kew te kebpenhimatey, umbe ebmensuwen ku sikiyu is langun. 3 Netuenan ku is langun mehitenged keniyu te menge tig-Israel; wazà igkeeles niw kayi te kedì. Mid-azap kew te zuma he menge ed-ezapen, umbe neremerikan kew.

4 “Is mezaat he menge vaal niw iyan ed-eǥen keniyu wey kew kenà mekelikù kayi te kedì te Megbevayè niw. Su ziyà te gehinawa niw is mulin-ulin he edtukù keniyu te ked-azap te zuma he menge ed-ezapen, ne wazà a keniyu kilelaa he Nengazen. 5 Is kegkemepelevawen niw iyan ebpengintutuu he ereg kew he edsilutan. Ne tenged te menge salè niw ne egkezeetan kew is menge tig-Israel zuma te menge tig-Juda. 6 Edangep kew kayi te kedì pinaaǥi te kebpemuhat niw te menge kerehidu, kambing, wey vaka, piru kenè niw en egkeseǥazan is kebpekiduma ku keniyu su mid-iniyuǥan ku en sikiyu. 7 Siak is esawa niw, midluivan a keniyu te menge kevuwazan ni Israel, su ǥeina te kenà kediey is menge anak niw. Umbe ǥuntaan, edezeetan ku sikiyu wey is menge tanè niw seled dà te senge vulan.