1 Iyan heini ampù te ebpeneuven he si Habakuk:

2 “He Nengazen, nezineg ku is menge mibeelan nu, ne tenged kayi utew zekelà is kedtehuza ku kenikew. Ne ǥuntaan umani nu heini veeli kayi te kenami he timpu. Ne zutun te timpu te kebpaahaa nu te pauk nu ne kehizuwi key kenikew.

3 “Iyan ka kes Waǥas he Megbevayà he ebpekeuma he ebpuun te Teman wey te Buntud he Paran, ne is gehem nu egkaahà diyà te langit, ne tenged kayi edeliǥen ka te menge etew kayi te kelibutan. 4 Is kebpenganlag te kebpekeuma, nu ne iring te kebpenganlag te andew; edsiǥa is menge velad nu he zutun mekeeles is gehem nu. 5 Ed-uwit ka te kezeetan dutun te kebpekeuma nu. 6 Emun edhitindeg ka egkehuyung is kelibutan, ne emun edtengteng ka ne egkerkeren te kegkahandek is menge etew wey egkengetiplak is neuǥet en he menge vuntud. Is menge paaǥi nu ebpedayun te wazà pidtemanan. 7 Neehè ku he egkengeregdas is menge tulda te meǥinged diyà te Cushan wey Midian.

8-9 “Nengazen, iring ka te sundaru he ed-untud te kerwahi he ibpekezaag te tebek. Andam ke en he ebpanà. Piru hentei man is egkeepesan nu? Iyan be is menge wahig wey menge zaǥat? Kenà iyan is menge wahig wey is menge zagat, kekenà, iyan is menge etew he ebpemekigkuntada kenikew. Midtevì nu is tanà ne midtudà dutun is wahig. 10 Is menge vuntud henduen be te menge etew he egkerkeren emun egkeehè ke zan. Mid-uzan te mereǥes, mideǥurus is wahig diyà te zaǥat ne midekelà is menge vaǥel. 11 Mibpundu is andew wey is bulan tenged te hagyung te menge vesut te panè nu wey kesinew te ed-ilak-ilak he vangkew nu.

12 “Tenged te utew nu kegkepauk midhipenawan nu is kelibutan ne midtekutakan nu is menge nasyun, 13 su edlibriyen nu is pinilì nu he menge etew. Midhimetayan nu is pengulu te mezaat he ginhedian ne mibpurungan nu zezeeti is menge etew zin. 14 Midtiyuk nu is ulu te peremandar te menge sundaru zin ne iyan nu in-uney itiyuk is besut te panà dutun te peremandar. Mibeelan nu heini hein midsurung key zan he iring dan te vagyu su wey key zan ikepeyapat. Su kelipey zan is kedezaat kenami te mekehizuhizu, he nemen-eles tenged te kegkahandek. 15 Iring ka te sundaru he imperapas din diyà te zaǥat is kudè din te kedsewsew kayi.”

16 Migkaǥi si Habakuk te, “Hein nezineg ku is impahayag te Nengazen kayi te kedì, migkerker is tivuuk he lawa ku ragkes en is bivig ku tenged te kegkahandek ku. Midluyahan a ne migkerker is menge paa ku. Ne tenged kayi te impahayag te Nengazen, ne kenà a edarà is edtaǥad te timpu te kedsiluti zin te menge midsurung kenami. 17 Minsan kenè pa mebpemeǥas is kayu he higira, is paras, etawa kayu he ulibu, wey minsan wazà sebpet diyà te tanà, wey minsan mebpemematey pa is menge uyaǥen diyà te tudil, 18 egkelipey a gihapun su ǥeina te iyan midlibri kedì is Nengazen he Megbevayà. 19 Iyan sikandin mibeǥey kedì te zesen. Midlig-enan din is menge paa ku, in-iring din te paa te selazeng su wey ku metekezeg is metikang he menge lugar.”

<- Habakuk 2