2 Iyan heini tavak te Nengazen ki Habakuk: “Isurat nu he keladu ziyà te suratà he vatu is ibpahayag ku ziyà te kenikew su para melemu heini he ebesahan. 3 Isurat nu zà heini zep-a su wazè pa meuma is midtelaan he timpu te kegkeul-ulaha kayi. Ne kenà ebperis is kegkeul-ulaha kayi te kena egkeuǥet. Emun henduen be te malù egkeuǥet ne teǥazi nu, su siguradu he egkehitavù heini he kenà egkeuǥet. 4 Iyan heini isurat nu:

“Ahaa nu is menge mepelavawen! Lalung sikandan he menge etew. Piru is metazeng he menge etew ebpengungubpaan tenged te kedtuu zan. 5 Benar iyan, kenà egkeseriǥan is ketiǥeyunan. Ne sikan is mepelavawen he menge etew he zekelà is kadar zan te ketiǥeyunan, ne kenà mevented wey kenè dan egkekuntintu. Iring sikandan te kemetayen he kenà egkeperahan. Ne iyan heeyan imbihaǥa zan te menge etew ziyà te mahabet he menge nasyun. 6 Piru edsudien sikandan keniyan te menge etew ziyà te menge nasyun pinaaǥi te mesakit he menge lalag he edhenduen te,

“ ‘Kehizu niw te ebpenguwa te menge azen he kenà keniyu, wey edtiǥum te ketiǥeyunan pinaaǥi te kebpenapì. Taman pa te keenu is ked-ul-ulaha niw keniyan? 7 Piru edtik-awan kew ebelesi te menge etew ziyà te menge nasyun he mibihag niw, ne tenged kandan egkerkeren kew te kegkahandek, ne iyan en maan sikandan ed-aǥew te menge azen niw. 8 Tenged te mahabet he menge nasyun is mid-eǥawan niw te menge azen, ne iyan kew en maan ed-eǥawan te menge etew he nesamà keniyan he menge nasyun. Egkehitavù heini keniyu tenged te kebpenhimatey niw te menge etew wey kebpendezeeti niw te menge tanè dan wey menge inged dan.

9 “ ‘Mekehizuhizu kew is mibpehitindeg te menge valey pinaaǥi te selapì he nekuwa niw te mezaat he paaǥi. Midlig-enan niw is menge valey niw su wey kew kenà memenu emun ebpekeuma is kezeetan. 10 Tenged te kebpenhimatey niw te mahabet he menge etew, edhimetayan kew zaan ne egkezeetan is dengeg niw. 11 Henduen be te edriklamu minsan is menge vatu ziyà te elavat wey is menge pepesanan te menge valey niw. Henduen be te ebpengulahì dan is edsumbung keniyu.

12 “ ‘Kehizu niw te mibangun te inged pinaaǥi te pesipala. Andam kew he edhimatey te etew vasta mevangun heini. 13 Piru heeyan is impevangun niw te menge etew he mibihag niw ne ebinsulan dà heeyan, umbe egkehimu he wazà pulus te midheǥuan dan. Midtelaan en heini te Nengazen he Mekeǥeǥehem. 14 Su is menge etew kayi te kelibutan, egkepenù te keuluwanen vahin te gehem te Nengazen, iring te zaǥat he nepenù te wahig.

15 “ ‘Mekehizuhizu kew su tenged te pauk niw mibpeel-elezan niw is menge etew ziyà te avey niw he menge nasyun. Henduen be te midlangut niw sikandan te vinu su wey maahà is kegkelevasi zan. 16 Ne ǥuntaan iyan kew en maan egkepeel-elezan he iyan pezem egkesuatan niw he veǥayi kew te zengeg, su edsilutan kew iyan te Nengazen. Iring te ibpeinum kew zin te vinu su wey kew melangut ne wey maahà is kegkelevasi niw su wey kew meeled-eled. 17 Mibpemiley niw is menge kayu ziyà te Lebanon, ne midhimetayan niw is menge langgam duen. Umbe edezeetan kew zaan ne egkerkeren kew te kegkahandek. Egkehitavù heini keniyu tenged te kebpenhimatey niw te menge etew wey kebpendezaat niw te menge tanè dan wey menge inged dan.

18 “ ‘Hengkey is pulus te zuma he menge ed-ezapen? Kayu zè man heeyan etawa mital he mibeelan te etew, ne kenè man heeyan ebpekekaǥi mehitenged te tutuu. Ne maan is midtuuwan heeyan te menge etew he mibaal zuen? Kenà ganì heeyan ebpekekaǥi. 19 Kehizu niw te egkaǥi ziyà te ledawan he kayu etawa vatu te, “Kepukew ke en ne tevangi key.” Kenè ganì heeyan ebpekepenurù keniyu. Minsan mibpekeplaan heeyan te vulawan wey pelata, piru kenà heeyan uuyag. 20 Piru is Nengazen mulà, ne ziyà sikandin te segradu he ubpeey zin he ziyà te langit. Umbe is langun he kayi te kelibutan ebpereremek diyà te etuvangan din.’ ”

<- Habakuk 1Habakuk 3 ->