1 Ne zuen insuǥù ni Jose ziyà te suluǥuen din he ebayàbayà diyà te valey zin. Ke sikandin te, “Penua nu is saku te kada sevaha kandan sumalà is egkehenat te menge asnu zan, ne itaǥù nu is selapì he ibpemasa te kada sevaha ziyà te saku zin. 2 Ne haazà is saku te hazi zan, dutun nu itaǥù is tasa ku he pelata zuma te selapì din he ibpemasa zin te egkeenen.” Ne midtuman din haazà is insuǥù ni Jose.

3 Ne hein nepawà impeǥenat din en is menge suled ni Jose wey menge asnu zan. 4 Ne hein kenè pa utew meziyù is imbayè dan migkaǥi si Jose ziyà te suluǥuen din te, “Gègaani nu telukuni haazà is menge etew ne emun egkesaut nu, keǥiyi nu sikandan te, ‘Maan is utew mezaat is imbales niw te ǥaǥew te egalen ku? 5 Maan is migkuwa niw kes tasa he inumà te egalen ku he egemiten din te kebpenagnà? Kenà meupiya hini is mid-ulaula niw.’ ”

6 Ne nesaut din sikandan ne migkaǥi zin kandan haazà is impekaǥi kandin ni Jose. 7 Piru midtavak dan te, “Datù, maan is egkaǥi ka te iring keniyan? Kenà egkehimu he zuen ebeelan dey he iring te migkaǥi nu. 8 Netuenan nu en man he puun pa te Canaan, inlikù dey is neehè dey he selapì duen te saku zey ziyan te kenikew. Maan is egkinahanglan key pa te kebpenakew te selapì wey vulawan diyà te valey te egalen nu? 9 Emun duen kayi te kenami egkaahaan nu keniyan te tasa he nekaǥi nu, himetayi sikandin ne uripena key is duma.” 10 Ne midtavak haazà is suluǥuen ni Jose te, “Uya, emun duen minsan hentei keniyu he egkaahaan ku kayi ne ed-uripenen ku sikandin, ne is duma keniyu ne wazè din mulà televaken.” 11 Ne zutun migègaanan hew-asa te kada sevaha is saku zin ne mibengkasan din. 12 Ne zutun midsusi te suluǥuen is saku te kada sevaha puun dutun te kakey kandan pehendiyà te kineheziyan, ne ziyè din meturedu is tasa te saku ni Benjamin. 13 Ne hein naahà heini zutun te teltelesuled, mibindas dan is menge ugelingen dan tuus te utew zan kegkeseeng. Migkergahan dan en maan is menge asnu zan ne midlikù dan diyà te inged.

14 Ne hein nekeuma si Juda wey is menge suled din, ne zutun ded si Jose te valey zin. Midseled sikandan dutun te valey ne midluhud dan diyà te etuvangan ni Jose. 15 Migkeǥiyan ni Jose sikandan te, “Hengkey heini is mid-ulaula niw? Wazè niw ves metueni he metau a he edtagnà?” 16 Ne midtavak si Juda te, “Datù, wazè dey en igkepengetezengan kenikew, ne kenè dey zaan egkekaǥi he wazè dey salà. Iyan is Megbevayà mibpezayag te salè dey. Sikami is langun ne menge uripen key en kenikew wey kes naahaan nu zuen te tasa.” 17 Iyan, midtavak dutun si Jose te, “Kenà egkehimu he pudu kew ed-uripenen ku su kenà haazà metazeng he kukuman. Iyan dà ed-uripenen ku is sevaha he ziyà te kandin maahà kes tasa ku. Is duma keniyu ne egkehimu he ed-ulì kew ziyà te amey niw te wazà samuk.”

18 Ne zutun mid-uvayan si Jose ni Juda ne ke si Juda te, “Pekelalaglalag ka, datù, ne tuǥuti a kenikew is suluǥuen nu he mekekaǥi a ziyà te kenikew. Ne minsan pa te nekedrepeng kew te hadì te Ehipto ne kenà a kenikew mepeuki. 19 Dutun te nehuna he kedhendini zey, in-insè nu kenami te menge suluǥuen nu ke zuen dey pa amey wey hazi. 20 Ne midtavak key te duen dey iyan amey he meǥurang en utew wey zuen dey pa hazi he in-anak te meǥurang en utew is amey zey. Iyan dà sikandin nesamà te menge anak te iney zin su minatey en is kakey zin. Ne utew sikandin pinelanggà te amey zey. 21 Ne migkaǥi nu he kinahanglan he edumahan dey sikandin dini wey nu zaan maahà. 22 Ne migkaǥi key he kenà egkehimu he ed-ewaan din is amey zey su ebpatey is amey zey ke egkeewaan sikandin te hazi zey. 23 Ne iyan migkaǥi nu is: ‘emun kenè dey edumahan dini is hazi zey ne kenè en egkehimu he ebpekeetuvang key maan kenikew.’ 24 Ne hein mid-ulì key ziyà te suluǥuen nu he amey zey midtudtul zey kandin haazà is migkaǥi nu. 25 Ne zuen timpu he migkaǥi is amey zey he kinahanglan he medlikù key kayi te Ehipto wey key mekepemasa en maan te egkeenen. 26 Ne migkaǥi key zutun he kenè key ebpekelikù. Wey key zà ebpekelikù ke egkezuma zey is hazi zey su migkaǥi key he kenà egkehimu he ebpekeetuvang key kenikew emun kenà ebpekezuma is hazi zey. 27 Ne zutun migkaǥi kenami is suluǥuen nu he amey zey, ke sikandin te, ‘Netuenan niw he zuen dezuwa he maama he in-anak te esawa ku. 28 Neewaan a te sevaha, ne migkaǥi ku zutun he siguradu midawi sikandin te kumekaid, ne taman en guntaan wazè ku en maan sikandin maahà. 29 Ne emun edumahan niw si Benjamin ne ke zuen mezaat he egkeulaula kandin, siak is uvanen en, tenged keniyu kenè en egkaawà is utew ku kegkeseeng taman te kenè e pa ebpatey.’

30-31 “Ne emun kenà ebpekezuma kenami is hazi zey ke ed-ulì key ziyà te amey zey, ne is amey zey emun kenè din egkaahà is anak din, ebpatey sikandin su iring te untung din heini is anak din. Ne sikami is menge suluǥuen nu, tenged kenami utew en egkeseeng is amey zey he uvanen en ne kenà egkaawà is seeng din taman te kenè pa sikandin ebpatey. 32 Siak is sevaha he suluǥuen nu, mibpesarig a ziyà te amey zey he wazà mezaat he egkeulaula te anak din he ke siak te, ‘Emun kenè ku sikandin igkeulì kayi ne kediey he salà diyà te kenikew te wazà pidtemanan.’ 33 Ne pekelalaglalag ka ǥuntaan ne ituǥut nu he iyan a is suluǥuen nu ebpetaǥak kayi su iyan a ed-uripenen he id-ilis te hazi ku ne ipeulì nu zed sikandin duma is menge suled din. 34 Su kenà a ebpekeulì diyà te amey ku emun kenà ebpekezuma is hazi ku. Kenè ku egkaantus is utew gerabi he kegkeseeng te amey ku.”

<- Genesis 43Genesis 45 ->