1 Hein mid-uwit en duen te menge Ismailihanen si Jose ziyà te Ehipto, imbelegyà sikandin diyà te ki Potifar he sevaha te menge upisyal te hadì te Ehipto he kepitan te menge vantey te turuǥan. 2 Midumahan te Nengazen si Jose umbe mid-iseg mebmeupiya is kebpekesavuk din. Diyà sikandin med-ubpà te valey te egalen din he tig-Ehipto he si Potifar. 3 Naahà te egalen din he midumahan si Jose te Nengazen wey midtuvazan is langun he menge vaal zin, 4 umbe utew zin ingkeǥaǥew si Jose. Midhimu zin si Jose he sineriǥan din te kedumalaha te langun he menge suluǥuen din diyà te valey zin wey is kebayàbayà te langun he menge azen din. 5 Ne puun dutun te kedseriǥi ki Jose, midtuvazan te Nengazen is pemilya ni Potifar he Ehiptohanen wey is langun he menge azen din diyà te baley zin wey ziyà te vevesukè din. Midhimu heini te Nengazen tenged ki Jose. 6 Ne tenged dutun, insarig ni Potifar ki Jose is langun he azen din su emun iyan si Jose edumala ne kenè en sikandin egkesamuk gawas te kegkaan.

Metaid si Jose wey meupiya is kedlelawa zin. 7 Ne wazà meuǥet, neimahan sikandin te esawa te egalen din. Ne midhinggat din si Jose he ebpehulizè dan. 8 Ne si Jose, wazè din pemineǥa, kekenà, migkeǥiyan din te, “Sikan is egalen ku, wazà igkesamuk din he minsan hengkey tenged te insarig din kediey is langun he menge azen din. 9 Henduen be te nekedrepeng key kayi te valey, su insarig din is langun kediey kayi ǥawas kenikew su esawa ke zin man. Kenà egkehimu he edlimbungan ku is egalen ku wey ebaal a te salà diyà te Megbevayà.” 10 Ne minsan pa te andew-andew is kedhinggata zuen te vahi ki Jose he ebpehulid, wazà si Jose mebpemineg.

11 Sevaha zutun he andew, midseled si Jose ziyà te valey su zuen din ebeelan, ne wazà dutun is menge zuma zin he menge suluǥuen. 12 Migewezan duen te esawa zuen te egalen ni Jose bisti zin ne migkeǥiyan din te, “Hulid ka kedì.” Piru mibpelaǥuy si Jose pehendiyà te ǥawas, piru netaǥak din is samput din dutun te vahi. 13 Hein naahà duen te vahi he migawas si Jose ne neǥewezan din is bisti ni Jose, 14 ne mid-umew zin is menge suluǥuen din, he egkaǥi te, “Ahaa niw man heini! Mid-uwitan kiw kayi te esawa ku te Hebriyuhanen para mepeel-elezi kiw. Kunaan niw vuwa, midseled sikandin kayi te ruǥu ku su edleyuǥen e zin, piru nengulahì a. 15 Ne tenged dutun, mibpelaǥuy sikandin diyà te gawas, piru netaǥak din is samput din.”

16 Ne intaǥù dutun te vahi haazà is samput ni Jose taman te nekeulì is esawa zin. 17 Ne midtudtul zin haazà diyà te esawa zin. Ke sikandin te, “Kes Hebriyuhanen he uripen nu he mid-uwit nu zini, egkesuatan din he mepeel-elezi a su midseled geina kayi te ruǥu ku su edleyuǥen e zin. 18 Piru hein migkulahì a ne mibpelaǥuy sikandin pehendiyà te gawas, ne netaǥak ganì is samput din.”

19 Hein nezineg ni Potifar haazà is tudtul te esawa zin mehitenged ki Jose, utew sikandin nepauk. 20 Ne tenged dutun, impezakep din si Jose ne inseled duen te pirisuan te menge pirisu te hadì. Piru minsan pa te ziyà si Jose te pirisuwan, 21 midumahan ded si Jose te Nengazen. Tenged te tuvad te Nengazen, nehizuwan duen te ebantey zuen te pirisuwan si Jose. 22 Ne tenged dutun, insarig duen te ebantey te pinirisu ki Jose is kebayàbayà te langun he menge pirisu ziyà te pirisuwan ne iyan impezumala sikandin te langun he menge vaal zutun. 23 Haazà is egalen te pirisuwan, wazè en igkesemuki zin duen te langun he insarig din ki Jose su midtuvazan man si Jose te Nengazen ne mibpengelinteuwan din he layun meupiya is minsan hengkey he ebeelan ni Jose.

<- Genesis 38Genesis 40 ->