1 Si Dina, sikan is anak ni Jacob he raǥa he anak ni Lea, mibpenumbaley ziyà te menge vahi he menge meǥinged dutun te inged. 2 Naahà sikandin ni Shekem he anak ni Hamor he Hivihanen, he pengulu zengan dutun he lugar. Mid-eǥen din si Dina ne midlayug din. 3 Utew zin nesuati si Dina, ne utew zin mibmahal ne midneyneyuan din. 4 Ne migkeǥiyan din is amey zin he si Hamor te, “Ipeesawa nu kedì heeyan is bahi.”

5 Hein netuenan ni Jacob he midlayug ni Shekem si Dina, wazè din pa ul-ulaha is egkeisip din su wazè pa mekeulì is menge anak din he menge maama he ziyà te unayan su abantey te menge uyaǥen dan. 6 Midhendiyà si Hamor wey is anak din he si Shekem te ki Jacob su ebpekidlalag kandin.

7 Ne hein netudtulan is menge anak ni Jacob he menge maama zutun te neulaula, segugunè dan mid-ulì. Utew mibmezaat is gehinawa zan ne utew zan egkepeuki si Shekem tenged te mid-ulaula zin he kenà meupiya he vaal, he nekeveǥey te keelezan te pemilya ni Jacob. 8 Piru migkeǥiyan sikandan ni Hamor te, “Utew nesuati te anak ku he si Shekem is raǥa niw, umbe edhangyù a he ipeesawa niw en sikandin ki Shekem. 9 Egkesuatan dey zaan he ebpengesawa kew kayi te kenami. Is menge anak niw he vahi, ne ipeesawa niw kenami ne ibpeesawa zey zaan is menge anak dey keniyu. 10 Egkehimu he ebpekeubpè kew kayi te kenami he tanà su kenè dey keniyu ibarew. Dini kew ubpà; dini kew petiǥayun minsan hendei ne ebpekaangken kew te tanà.”

11 Midhangyù daan si Shekem diyà te amey wey menge suled ni Dina te, “Emun egkehizuwan a keniyu ne ipeesawa niw en kedì si Dina, ne minsan hengkey he ebuyuen niw ibeǥey ku. 12 Minsan pira is ibpesunggud niw kediey wey is minsan hengkey he ebuyuen he igasa ku kandin ne ibeǥey ku asal ipeesawa niw kediey si Dina.”

13 Tenged te midèdeetan ni Shekem is dengeg ni Dina, mid-ekalan te menge anak ni Jacob si Shekem wey is amey zin he si Hamor. 14 Ke sikandan te, “Kenà egkehimu he ibpeesawa zey is etevey zey te maama he wazà mesirkunsidar, su utew heeyan mekeeled-eled dini te kenami. 15 Ebpemineg key he ibpeesawa kenikew is etevey zey ke ebpekeiring kew kenami. 16 Emun ebpesirkunsidar kew ne human egkehimu he ibpeesawa zey keniyu is menge anak dey he raǥa. Human egkehimu he zini key ed-ubpà te keniyu ne egkehimu kiw he sevaha zà he tribu. 17 Piru emun kenè kew ebpesirkunsidar, ne egkuwaan dey is etevey zey ne egenat key.”

18 Nesuat dutun si Hamor wey si Shekem. 19 Umbe tenged te utew nesuati ni Shekem si Dina, wazè en sikandin medlanganlangan ne midtuman din is migkaǥi kandin te menge anak ni Jacob.

Si Shekem utew midtahud kandin is pemilya te amey zin. 20 Umbe midhendiyè dan te amey zin te pultahan te inged su edlelaǥan dan is menge maama zutun te inged dan. 21 Ke sikandan te, “Haazà is menge etew, ne ebpekid-emiǥu zan kenitew, umbe meupiya ke kayi tew en sikandan ibpeubpà te kenitew. Meluag daan heini is tanè tew. Ebpekepengesawa kiw te menge anak dan he raǥa ne ebpekepengesawa zan daan te kenitew he menge raǥa. 22 Iyan, wey zan dà ebpekeuyun he zini zan ed-ubpà te kenitew ke ebpesirkunsidar kiw is langun he menge maama iring kandan. 23 Ne emun ebpekeubpè dan en kayi, egkehimu en he is langun he uyaǥen dan wey menge azen dan ne kenitew en daan. Umbe ebpemineg kiw en te egkesuatan dan su wey zan mekeubpà kayi zuma kenitew.” 24 Ne mid-uyunan te langun he menge maama he meǥinged dutun haazà is sambag ni Hamor wey te anak din he si Shekem. Umbe mibpesirkunsidar is langun he menge maama zutun te inged.

25 Kedlevey zutun te tetelu he andew, zutun te kemulu pa egkesekiti is menge maama te kedsirkunsidara kandan, midseled dutun te inged kes dezuwa he menge anak ni Jacob, si Simeon wey si Levi, is menge kakey ni Dina. Wazà metueni te menge etew zutun he mezaat bes is tuyù dan. Mid-uwit dan te ispada ne mibpenhimetayan dan is langun he menge maama zutun. 26 Midhimetayan dan si Hamor wey is anak din he si Shekem, ne migkuwa zan dutun si Dina te valey ni Shekem ne migenat dan. 27 Ne zutun, nekeuma zaan is duma pa he menge anak ni Jacob dutun te inged ne mibpenavan dan is menge azen dutun te inged. Mid-ulaula zan haazà tenged te midèdeetan is dengeg te etevey zan he si Dina. 28 Mibpenguwa zan is menge kerehidu, menge vaka, menge asnu, wey is minsan hengkey he menge azen diyà te inged wey minsan is diyà te menge unayan. 29 Mibpenguwa zan is langun he ketiǥeyunan dutun te inged, ragkes is menge azen he zutun te seled te menge valey. Ne mibpemihag dan is langun he menge vahi wey menge vatà.

30 Ne migkeǥiyan ni Jacob si Simeon wey si Levi te, “Mibeǥayan a keniyu te utew zekelà he samuk. Edumutan kiw en te menge Canaanhen wey menge Pirisihanen he menge meǥinged kayi te tanà. Mezakel zan, kenè kiw, ne emun ebpetebtevangè dan ne edsurungen kiw zan, egkaamin kiw zan te edhimatey.” 31 Piru midtavak haazà is dezuwa he anak din te, “Idtuǥut dey ve he ebpesipelahan is etevey zey su id-iring te vahi he ebelegyà te zengeg din?”

<- Genesis 33Genesis 35 ->