1 Midlavey is nepipira he tuig ne neuma is timpu he migezaman si Abraham te Megbevayà. Migkeǥiyan sikandin te Megbevayà te, “Abraham!” Ne midtavak si Abraham te, “Hengkey!” 2 Ne migkaǥi zutun is Megbevayà te, “Kuwaa nu is budtung he anak nu he si Isaac he utew nu mibmahal ne hendiyè ka te tanà he Moria. Tekezeg kew zutun te vuvungan he ibpeehè ku kenikew ne ipemuhat nu sikandin kayi te kedì he pemuhat he edtutungen.”

3 Umbe, zutun te utew pa meselem te sunud he andew, midselem med-enew si Abraham ne midsilyahan din is asnu zin. Mibpengayu pa sikandin te idtavun dutun te pemuhat he edtutungen ne miduma zin is dezuwa he suluǥuen din wey is anak din he si Isaac ne migenat dan pehendiyà te vuvungan he migkaǥi te Megbevayà. 4 Dutun te iketelu he andew te kedhipanew zan, nepantew ni Abraham haazà is buvungan he malù pa meziyùdiyù. 5 Migkeǥiyan din is menge suluǥuen din te, “Dini kew zà dèpa taǥad duma is asnu, su edlaus key pa ziyà su ed-azap key te Megbevayà. Edlikù key zè kan dini.” 6 Migkuwa zutun ni Abraham sikan is menge kayu ne impeuwit din ki Isaac ne iyan sikandin migkulang te tigtiǥen wey ubpit. Ne midlaus dan dutun.

7 Dutun te kemulu zan en edhipanew, migkaǥi si Isaac diyà te amey zin he si Abraham te, “Amà!” Ne midtavak si Abraham te, “Hengkey, Mama?” Mid-insà si Isaac te, “Duen ta tigtiǥen wey kayu, piru hendei ta egkekuwa is nati he kerehidu he ibpemuhat he edtutungen?” 8 Ne midtavak dutun si Abraham te, “Is Megbevayà, Mama, iyan ebeǥey kenita te nati he kerehidu he egkehimu he ibpemuhat he edtutungen.” Ne midlaus dan en dutun is dezuwa he edhipanew.

9 Ne hein nekeuma zan en dutun te vuvungan he impaahà te Megbevayà ki Abraham, mibaal si Abraham te pemuhatà, ne insavuk din dutun is menge kayu. Mibakus din dutun si Isaac ne insavuk din daan sikandin dutun te zivavew te kayu he ziyà te pemuhatà. 10 Ne migewezan ni Abraham is ubpit su edhimetayan din en is anak din. 11 Mid-umew si Abraham te velinsuǥuen te Nengazen he ebpuun te langit te, “Abraham! Abraham!” Ne midtavak sikandin te, “Hengkey.” 12 Ne migkaǥi is belinsuǥuen te, “Isavuk nu zà heeyan is ubpit! Kenè nu pelii is batà te minsan deisek dà! Netuenan ku en he iyan a is Megbevayà, utew lavew he ebmahalen nu su minsan is anak nu he utew nu minahal, wazè nu isipa he kenè nu ibeǥey kediey.” 13 Dutun te nekelilingey si Abraham, ne neehè din is kerehidu he meemahan he nekesanggat is sungey zin diyà te dezeisey he kayu. Ne migkuwa ni Abraham haazà ne impemuhat din he pemuhat he edtutungen ilis te anak din. 14 Migngezanan ni Abraham haazà te, “Iyan Ebeǥey is Nengazen.” Ne zuen pa erubasa ǥuntaan he edhenduen te, “Diyà te Buvungan te Nengazen egkeveǥayan kiw te tavang.”

15 Ne zutun mid-uman med-umew is belinsuǥuen te Nengazen he ziyà te langit ki Abraham, 16-17 ke sikandin te, “Iyan heini migkaǥi te Nengazen: Ibpenangdù ku kayi te gehinawa ku he edtuvazan ku iyan sikew tenged te wazè nu ikeleǥezi kedì is namànamà he anak nu. Edhimuwen ku he utew medmezakel is menge kevuwazan nu su iring te menge vituen diyà te langit wey iring te menge pantad diyà te veyvey te zaǥat. Egkeveyveyaan dan is menge inged te menge kuntada zan. 18 Ne pinaaǥi te menge kevuwazan nu, edtuvazan ku is langun he menge nasyun diyan te kelibutan, tenged te midtuman nu is suǥù ku kenikew.”

19 Hein nepasad haazà, midlikuan eni Abraham sikan is dezuwa he suluǥuen din, ne midhendiyè dan te Beersheba, ne ziyà si Abraham med-ubpà te Beersheba.

20 Midlavey zutun is timpu, ne nezineg ni Abraham is tudtul te zuen en menge anak te hazi zin he si Nahor ziyà te ki Milca. 21 Is kinekekayan he anak dan he maama ne si Uz, is sunud ne si Buz, is sunud pa ne si Kemuel (he nehimu he amey ni Aram), 22 si Kesed, si Hazo, si Pildash, si Jidlaf, wey si Betuel. 23 Si Betuel, ne zuen anak din he raǥa he si Rebeka. Sikandan is walu ne menge anak ni Nahor ziyà te ki Milca. 24 Duen pa menge anak ni Nahor ziyà te sevaha he esawa zin he si Reuma. Iyan ensi Tiba, Gaham, Tahash wey si Maaca.

<- Genesis 21Genesis 23 ->