1 Ne haazà is dezuwa he menge velinsuǥuen te Nengazen, hein nekeuma zan diyà te inged he Sodom ne mahapun en, diyà si Lot ebpimpinuu te uvey te pultahan dutun te inged. Ne hein neehè din sikandan, midhitindeg sikandin ne midsinuǥung din ne midlangkeb sikandin diyà te tanà te kedtahud, he egkaǥi te, 2 “Edhengyuan ku sikiyu, menge zatù, tuluy kew pa ziyà te valey ku te suluǥuen niw. Penlùlui niw is menge paa niw wey hulavung kew pa. Keeselem kew en laus te hipenawan niw.” Ne midtavak sikandan te, “Maambe en su zini key zà edhulavung te pelasa.” 3 Piru midteǥel sikandan ni Lot, umbe miduma zan diyà te valey zin. Ne mid-andam si Lot te menge inumen wey egkeenen dan, ne mibpevaal zaan sikandin te supas he wazè din tapey, ne midlavung sikandan.

4 Ne zutun te wazè dan pa mekehizeǥà, nemekeuma is langun he menge maama zutun te tivuuk he inged he Sodom, menge kengkenakan wey menge meǥurang he maama, ne midlingutan dan is baley ni Lot. 5 Mid-umew zan si Lot, ne mid-insaan dan te, “Hendei sikan is menge maama he meǥeliyug nu he nekeuma ǥeina te mahapun? Ipeǥawas nu su egkesuat key he ebpekidhilavet kandan.”

6 Ne migawas dutun si Lot te valey su edlelaǥan din sikandan. Ne hein nekeǥawas en sikandin, ne midlekevan din is gemawan. 7 Migkeǥiyan din sikandan te, “Menge geli ku, kenà haazà egkehimu. Edhangyù a he kenè niw ul-ulaha heeyan is utew mezaat. 8 Heini zed is menge anak ku he raǥa. Wazè pa sikandan meuvayi te maama. Ibpeǥawas ku en sikandan ne egkehimu he ziyè niw ul-ulaha te kandan is egkesuatan niw, iyan, kenè niw pesipelahi heini is dezuwa he maama su menge meǥeliyug ku man ne kinahanglan he ed-elimahan ku sikandan.” 9 Piru nasì dan medtavak te, “Lumelengyawè ke zà dini, hentei ka is uvag en ebpelavetlavet kenami. Awè ka keniyan! Kela ke tuwas pa he mezaat is ed-ul-ulahan dey kenikew kenà kandan.” Ne zutun insinumag dan si Lot, ne ed-uvey zan en pezem duen te ǥemawan su egkebrahan dan is lekeb kayi. 10 Piru haazà is dezuwa he maama he ziyà te seled, mibpuwasan dan is gemawan ne midsengguyud dan si Lot ne inseled dan dutun te valey ne midlelekeb dan. 11 Ne haazà is menge etew he ziyà te ǥawas, mibpengelinteuwan kayi te zezuwa he melakap sikandan para kenà sikandan meketuredu te ǥemawan.

12 Ne migkaǥi haazà is dezuwa ziyà te ki Lot te, “Emun duen nu pa menge zuma kayi, iring te menge anak nu he maama wey vahi, wey menge mekaamung nu, wey is minsan hentei pa he menge sakup nu kayi te inged, kinahanglan he zumaha nu en ne pelaǥuy kew pehendiyà te ǥawas te inged, 13 su edèdeetan dey en heini is inged. Nezineg en te Nengazen is menge riklamu kandan tenged te menge ulaula zan he mezaat. Umbe midsuǥù key zin dini su ibpelimas din kenami heini he inged.”

14 Ne zutun mibeyaan ni Lot is menge maama he nekekaǥun te menge anak din, ke sikandin te, “Kuwa kew en su ebpelaǥuy kiw kayi su edlimasen en te Nengazen heini is inged tew.” Piru wazè dan mebpemineg su kunaan dan ke suyat dà haazà ni Lot.

15 Ne hein egkeriwaswas en, impeǥaangaan en si Lot dutun te zezuwa he velinsuǥuen he med-awè dan en dutun te inged, ke sikandan te, “Gaanggaan ka! Genat ke en, dumaha nu is esawa nu wey is menge anak nu he raǥa, su kela ke mekeragkes kew kayi te kedlimasa kayi te inged, tenged te utew meremerik he ulaula te menge etew kayi.” 16 Ne minsan pa zutun midlanganlangan pa si Lot. Ne tenged te nehizuwan sikandan te Nengazen, migewezan sikandan duen te menge velinsuǥuen diyà te zezuwa he velad dan, su wey zan mekeǥawas dutun te inged.

17 Ne hein diyè dan en te ǥawas, migkaǥi is sevaha he velinsuǥuen diyà te ki Lot te, “Pelaǥuy kew en! Kenè kew lilingey wey kenè kew teren kayi te menge suǥud. Diyè kew petandang te menge vuvungan para kenè kew meragkes mepatey.” 18 Piru midtavak si Lot te, “Egalen ku, kenè ad kenikew epepelaǥuy diyà te vuntud. 19 Utew zekelà is tavang niw kediey te suluǥuen niw ne utew zekelà is gaǥew niw kediey su midlibri a keniyu wey a kenà mebpatey. Utew zà meziyù haazà is buntud; kenà a ebpekepelaǥuy pehendiyà te vuvungan su egkesaut e zed kayi te kedlimas ne ebpatey a ǥihapun. 20 Neehè nu ve heeyan is deisey he inged keniyan te egkehunaan? Egkesiguru ku he egkeuma ku heeyan su uvey zà. Egkehimu ve he keniyan e zà ebpevayà te zeisey he inged su wey a meluwas?”

21 Ne midtavak dutun is belinsuǥuen te, “Uya, egkehimu; idtuǥut ku heini is hangyù nu. Kenè ku en edèdeetan haazà is inged he egkeǥiyen nu. 22 Sigi, pelaǥuy kew. Hendiyan kew en, su wazà egkehimu ku taman te kenè kew pa ebpekeuma zutun.”

Ne tenged dutun, egngezanan haazà is inged te Zoar, he ke và dà egkeǥiya, “Deisek.”

23 Ne hein midsilè en is andew nekeume en ensi Lot diyà te Zoar. 24 Segugunà mibpeuzan is Nengazen te egkeregreg he esupri ziyà te inged he Sodom wey Gomora.

25 Pinaaǥi zutun midlimas te Nengazen haazà is dezuwa he inged wey sikan is tivuuk he suǥud. Neǥerà is langun he menge meǥinged dutun wey nezeetan is langun he edtuvù dutun. 26 Piru midlilingey sikan is esawa ni Lot su ed-ahaan din is neewaan dan, ne mibaluy sikandin he timus he iring te tukud.

27 Ne zutun te sunud he andew, midselem med-enew si Abraham, ne midlikù diyà te zaan he midhitindeǥan din hein mibpekidlaglag kandin is Nengazen. 28 Ne mibpememantew sikandin diyà te Sodom wey Gomora wey ziyà te tivuuk he suǥud. Ne neehè din is dekelà he evel he ebpuun dutun te tanà he iring te evel te selsalan.

29 Wazà melipati te Nengazen is kebpekid-uyun din diyà te ki Abraham, su zutun te kedèdeeti zin te menge inged diyà te suǥud he zutun med-ubpà si Lot, impepelaǥuy zin si Lot su wey kenà meragkes.

30 Ne mid-awà dutun si Lot wey is menge anak din he raǥa te inged he Zoar su egkahandek sikandin dutun he ed-ubpà, ne ziyè dan medhalin te vuntud, ne ziyè dan med-ubpà te surung. 31 Dutun he timpu, migkaǥi is kakey he anak din diyà te hazi zin te, “Utew en meǥurang is amey ta ne wazà kayi zuma pa he maama he ebpekeesawa kenita wey edhulid kenita sumalà is betasan te tivuuk he menusiyà. 32 Edlenguten ta nasì is amey ta te vinu, ne edhulizen ta sikandin su wey zuen te zed kevuwazan pinaaǥi te amey ta.” 33 Ne zutun he kezukileman, midlangut dan is amey zan, ne mibpekidhulid haazà is kakey te amey zan. Tenged te utew nelangut si Lot, wazè din metueni haazà is neulaula.

34 Ne hein nepawà, migkaǥi haazà is kakey ziyà te hazi zin te, “Geina te mezukilem, iyan a midhulid ki amà. Kengkuwan te mezukilem edlenguten te en maan sikandin, ne iyan kad maan hulid kandin su wey zuen te zed kevuwazan pinaaǥi te amey ta.” 35 Umbe, zutun he kezukileman, midlangut dan en maan is amey zan, ne iyan maan haazà is hazi mibpekidhulid te amey zan. Tenged te utew nelangut si Lot, wazè din metueni is neulaula.

36 Ne pinaaǥi zutun neǥingey ni Lot haazà is menge anak din he vahi. 37 Mid-anak haazà is kakey, ne maama is anak din, ne migngezanan din ki Moab. Iyan sikandin kepuun te menge Moabitanhen guntaan. 38 Mid-anak daan haazà is hazi, ne maama zaan is anak din, ne migngezanan din ki Ben Ami. Iyan sikandin kepuun te menge Amunihanen guntaan.

<- Genesis 18Genesis 20 ->