1 Ne mid-uman mebpaahà is Nengazen ki Abraham diyà te uvey te menge kayu he ulayan ni Mamre. Hein ebmeudtu zutun is andew, ebpimpinuu si Abraham diyà te ǥemawan te tulda zin. 2 Mibpememantew si Abraham ne neehè din is tetelu he maama ziyà te uvey. Ne zutun te kegkaahaa zin, migaanggaan medsinuǥung ne midlangkeb diyà te tanà su edtahud. 3 Ke sikandin te, “Datù, emun meupiya zà te ǥehinawa niw, ne tuluy kew zèpa kayi te kenami. 4 Ituǥut niw he ed-uwit key te wahig wey kew mekepenlùlù te menge paa niw. Himeley kew zèpa kayi te sihung te kayu. 5 Ne ituǥut niw zaan he ibpekaan dey pa sikiyu te zeisek su wey kew meulii te zesen te kenè kew pa edlaus te hipenawan niw su iyan buwa heini ketezengan ke maan is imbanglis kediey is kedhendini niw te kediey te suluǥuen niw.” Ne zutun midtavak dan te, “Uya, meupiya iyan ke egkeulaula haazà is migkaǥi nu.”

6 Ne zutun migaanggaan si Abraham ne midhendiyà te ki Sara he ziyà te tulda ne ke sikandin te, “Ganggaang ka, kuwa ka te menge pitu he ǥantang he herina wey vaal ka te supas.” 7 Ne mibpelelaǥuy sikandin pehendiyà te uyaǥen din ne mibpilì te nati he vaka he utew meupiya ne impelapè din duen te betan-en he suluǥuen din ne impehilutù din.

8 Ne hein naandam en is langun, midtangel en ni Abraham haazà is usa wey zuen daan gatas wey kisu. Ne migkaan dan diyà te sihung te kayu ne zutun daan si Abraham is ebpenilbi kandan.

9 Ne zutun mid-insaan dan si Abraham te, “Hendei is esawa nu he si Sara?” Ne midtavak sikandin te, “Diyè ded te seled te tulda.” 10 Ne zutun migkaǥi is Nengazen te, “Senge tuig pa ǥuntaan, edlikuan ku sikiyu ne zutun he timpu, si Sara, is esawa nu, id-anak din is maama.”

Ne ziyà si Sara te ǥemawan te valey he egkeiniyuǥan dan is ebpemineg te vitiyara zan. 11 (Si Abraham wey si Sara, utew zan en meǥurang ne wazà bahi he ebpekaanak emun is penuiǥen din, iring te penuiǥen ni Sara.) 12 Ne tenged dutun nekeengit si Sara ziyà te ǥehinawa zin, ne neisip din is, “Egkehimu ve he egkeulaula heini is meupiya kediey te nemezahan e en wey utew en meǥurang is esawa ku?”

13 Ne zutun migkaǥi is Nengazen diyà te ki Abraham te, “Maan is mid-engit si Sara he egkaǥi te, ‘Egkehimu ve he ed-anak a is utew en meǥurang?’ ” 14 Ne mid-uman megkaǥi is Nengazen te, “Duen be minsan hengkey he kenà egkehimu te Nengazen? Sumalà is migkaǥi ku, edlikuan ku sikiyu seled te senge tuig ne ed-anak iyan dutun si Sara te maama.”

15 Ne mibarew zutun si Sara tenged kegkahandek din he egkaǥi te, “Wazà a med-engit!” Ne midtavak is Nengazen te, “Mid-engit ka iyan.”

16 Ne migenat en dutun haazà is tetelu he maama. Inhated sikandan ni Abraham taman te nepantew zan is inged he Sodom. 17 Ne migkaǥi is Nengazen diyà te ǥehinawa zin te, “Kenè ku id-eles ki Abraham is ebeelan ku. 18 Su kepuun si Abraham te utew zekelà wey mekeǥeǥehem he nasyun wey is kevuwazan din te peleebuten. Pinaaǥi kandin edtuvazan ku is langun he menge nasyun dini te kelibutan. 19 Mibpilì ku si Abraham su wey zin ikepenurù diyà te menge anak din wey menge kevuwazan din he med-ikul zan te ibayè ku te Nengazen pinaaǥi te ked-ul-ulaha zan te metazeng wey hustu. Pinaaǥi kayi, egketuman is menge pesarig ku kandin.”

20 Ne migkaǥi zutun is Nengazen diyà te ki Abraham te, “Utew kun mezaat is menge ulaula te menge tig-Sodom wey menge tig-Gomora wey utew kun meveǥat is menge salè dan. 21 Umbe edhendiyà a su ed-ahaan ku is menge ulaula zan ke utew subra he mezaat he iring te nezineg ku, su kinahanglan he egketuenan ku.”

22 Ne zutun migenat is dezuwa he menge maama su edhendiyè dan te Sodom, piru si Abraham, diyè ded edhithitindeg te etuvangan te Nengazen. 23 Ne mid-uvayan ni Abraham is Nengazen ne nenginginsà te, “Tutuu ve he idragkes nu is menge metazeng dutun te kedlimasa nu te utew menge mekesesalà he etew? 24 Penenglitan ke zuen 50 he menge metazeng he etew ziyà te inged, tutuu ve he edlimasen nu? Ne kenè nu egkehizuwan haazà is menge meǥinged minsan pa te zuen 50 he menge metazeng dutun? 25 Kenà haazà dait he edsilutan nu is menge metazeng duma te menge mekesesalà. Kenà egkehimu he id-iring nu is menge lalung kandan. Iyan ka ebayàbayà te tivuuk kelibutan, kenè be kinahanglan he ebeelan nu ke hengkey is hustu?” 26 Ne midtavak dutun is Nengazen te, “Emun duen egkeehè ku he 50 he menge metazeng he etew zutun te inged, kenè ku edèdeetan is tivuuk he inged tenged dutun te 50.”

27 Ne mid-uman dutun si Abraham megkaǥi te, “Peseyluwa a, su ǥeina te mibpekevurut a he egkaǥi ziyan te kenikew te Nengazen, ibpelaus ku pa is egkeǥiyen ku, minsan pa te kayi te etuvangan nu iring a te eliyavuk dà wey igmuk su utew minus is pid-etawan ku. 28 Penenglitan, ke wazà 50 he menge metazeng dutun te inged su 45, edlimasen nu zed be haazà is inged su egkurang te lelima he menge metazeng?” Ne midtavak is Nengazen te, “Emun duen egkeehè ku he 45, ne kenè ku en edlimasen.”

29 Ne mid-insè pa maan si Abraham te, “Ne emun iyan nu zà egkaahà dutun is 40 he menge metazeng?” Ne midtavak is Nengazen te, “Emun duen egkeehè ku he 40 ne kenè ku edlimasen.”

30 Ne migkaǥi en maan si Abraham te, “Pekelalaglalag ka, Nengazen, ne kenà a kenikew mepeuki su ebpenginginsè e pa. Penenglitan ke zuen egkeehè nu he 30 he menge metazeng?” Ne midtavak is Nengazen te, “Emun duen egkeehè ku he 30 ne kenè ku zaan edlimasen.”

31 Ne migkaǥi en maan si Abraham te, “Nengazen, ǥeina te mibpekevurut e pa maan he egkaǥi ziyan te kenikew te, ibpelaus ku pa is egkeǥiyen ku. Ne penenglitan, emun duen 20 he metazeng he egkeehè nu, edlimasen nu zed be?” Ne midtavak is Nengazen te, “Ke zuen minsan 20, kenè ku en edlimasen is inged.”

32 Ne migkaǥi pa maan si Abraham te, “Nengazen, Kenà a kenikew mepeuki, ketepusan en heini he id-insè ku. Penenglitan ke zuen 10 he menge metazeng he egkeehè nu zutun?” Ne midtavak is Nengazen te, “Ke zuen egkeehè ku ziyà he minsan 10 dà he menge metazeng, ne kenè kud edlimasen.”

33 Ne zutun nepasad is kebitiyara zan, nahanew is Nengazen, ne mid-ulì si Abraham diyà te kandan.

<- Genesis 17Genesis 19 ->