1 Ne si Sarai, sikan is esawa ni Abram, kenà ed-anak. Duen uripen din he Ehiptohanen he egngezanan ki Hagar. 2 Ne migkaǥi si Sarai ziyà te ki Abram te, “Tenged te wazà ituǥut te Nengazen he mekaanak a, deyzey pa vuwa ke edhulizan nu is uripen ku, su kela ke egkehimu he pinaaǥi kandin duen ku zed menge anak.” Ne mid-uyun dutun si Abram te sambag ni Sarai. 3 (Sepulù en he tuig dutun is ked-ubpà eni Abram diyà te tanà he Canaan.) Ne mibeyaan dutun ni Sarai haazà is uripen din he tig-Ehipto he si Hagar ne imbeǥey zin diyà te esawa zin wey zin meesawa. 4 Ne midhulizan ni Abram si Hagar ne mibmeǥingey si Hagar.
Ne si Hagar, hein nesavut din he meǥingey sikandin, mibpelevawan din is egalen din he si Sarai. 5 Ne migkaǥi zutun si Sarai ziyà te ki Abram te, “Kenikew he salà heini is kebpelevawi kediey ni Hagar. Minsan pa te iyan a mibeǥey kandin diyan te kenikew, ebpelevawan e zin gihapun hein netuenan din he meǥingey en su kenè nu edewayen. Nesayud is Nengazen ke hentei kenita is ebpekevenar!” 6 Ne midtavak dutun si Abram diyà te ki Sarai te, “Emun iyan heeyan, idlikù ku sikandin diyan te kenikew ne bayèbayè ka ke hengkey is ed-ul-ulahan nu kandin.” Ne puun dutun, kenà meupiya is ebelan ni Sarai ki Hagar, umbe hein neuǥet ne mibpelaǥuy sikandin.
7 Ne zutun naahà si Hagar te velinsuǥuen te Nengazen diyà te uvey te serebseb he ziyà te sibsivayan. Iyan haazà sikan is serebseb he ziyà te zalan pehendiyà te inged he Shur. 8 Ne mid-insaan dutun te velinsuǥuen sikandin te, “Hagar he suluǥuen ni Sarai, hendei ka ebpuun wey hendei ka ebpevayà?” Ne midtavak si Hagar te, “Ebpeleǥuyan ku is egalen ku he si Sarai.” 9 Ne zutun migkaǥi ziyà te kandin is belinsuǥuen te Nengazen, ke sikandin te, “Ulì ka ziyà te egalen nu ne pevayàbayè ka kandin.” 10 Ne migkaǥi zaan is belinsuǥuen te,
“Edhimuwen ku he utew medmezakel keuzemà is menge kevuwazan nu, ne kenè dan egkengevilang.”
11 Ne impelaus din is egkeǥiyen din kandin te, “Meǥingey ka, ne maama is id-anak nu. Ishmael is igngazan nu kandin, su nezineg te Nengazen is menge pengemuyù nu kandin tenged te merasey is egkeulaula nu.
12 Ne heini is anak nu, iring sikandin keuzemà te asnu he leew su kenà ebpevayàbayà te minsan hentei. Ebpekigkuntada sikandin te minsan hentei ne egkuntedahan daan sikandin te langun. Minsan is langun he menge kezuzumahi zin, egkuntedahan din pa.”
13 Umbe migngezanan ni Hagar is Nengazen te, “El-roi,” su ke sikandin te, “Neehè ku ve is Megbevayà, ne kemulu e pa he uuyag guntaan?” 14 Tenged dutun migngezanan haazà is kalut te Beer Lahai Roi, he ke và dà egkeǥiya, “Kalut te uuyag he Megbevayà he nekaahà kediey.” Kemulu pa haazà is kalut diyà te pid-elangan te inged he Kadesh wey inged he Bered.
15 Ne mid-anak si Hagar te maama pinaaǥi ki Abram. Ne haazà is anak din, migngezanan ni Abram ki Ishmael. 16 Is penuiǥen ni Abram ne 86 he tuig hein ked-enaka ni Hagar ki Ishmael.
