1 Umbe, midsuǥù si Hadì Darius he susiya is menge surat he intaǥù diyà te teleǥuey kayi ziyà te Babilonia. 2 Piru ziyà maahà te turuǥan diyà te Ecbatana, he sakup te prubinsya he Media, is sevaha he linulun he velesahan he zuen duen nekesurat he edhenduen te:

3 “Heini he menge surat ebpetanudtanud he heini nehuna he tuig te kedhadì ni Cyrus, midsuǥù sikandin he ed-umanan ebenguna is baley te Megbevayà diyà te Jerusalem he zutun ibpemuhat is menge pemuhat. Kinahanglan he melig-en is menge pundasyun kayi. Kinahanglan he 90 he ǥiek is ketikang kayi wey 90 zaan he ǥiek is keluaǥan din. 4 Is kada tetelu he dezekelà he menge vatu he ibped-uuntud, kinahanglan he ebpezivevawan te sevaha he trusu. Is langun he gelestuwan, egkuwaan diyà te selapì te ginhedian. 5 Ne sikan is bulawan wey pelata he menge gelemiten diyà te valey te Megbevayà he mid-uwit ni Hadì Nebucadnezar ziyà te Babilonia, kinahanglan he idlikù diyà te teleǥuey zuen diyà te valey te Megbevayà diyà te Jerusalem.”

6 Ne heini he menge lalag impeuwit ni Hadì Darius diyà te ki Tatenai, he gubirnedur te prubinsya he zini layun te Eufrates, ki Shetar Bozenai, wey te zuma zan he menge upisyal keniyan he prubinsya:

“Pekeziyù kew keniyan te valey te Megbevayà. 7 Kenè niw semuka is kebenguna kayi. Bey-ani niw en is gubirnedur wey is duma he menge pengulu te menge Judio he mevangun dan heini ziyà te nehuna he mibengunan kayi.

8 “Edsuǥuen ku zaan sikiyu he uǥupi niw is menge pengulu te menge Judio pinaaǥi te kediritsuwa kebeyazi te langun he ǥastu su para kenà mesanggen is terebahu. Diyè niw kuwaa is bayad he selapì te ginhedian he ebpuun diyà te vuhis te prubinsya niw. 9 Kinahanglan he ebeǥayan niw kada andew is menge memumuhat diyà te Jerusalem te menge kinahanglan dan iring te turiti he vaka wey meǥurang wey menge nati he meemahan he menge kerehidu he edtutungen he ibpemuhat diyà te Megbevayà diyà te langit, ragkes daan is trigu, timus, binu, wey lana. Kinahanglan he kenà egkesalang is kebeǥaya niw kayi, 10 su wey zan mekepemuhat te menge pemuhat he ebpekepenunuat te Megbevayà diyà te langit, ne igkaampù e zan wey is menge anak ku.

11 “Ne elin daan suǥù ku he is minsan hentei he kenà edtuman kayi edtiyuken te kayu he edtengtangen puun te valey zin, ne edrundusen is baley zin taman te wazà kayi egkesamà he ebpekehitindeg. 12 Berakat he dezeeti te Megbevayà he mibpilì te Jerusalem he zutun sikandin ebeǥayi te zengeg is minsan hentei he hadì etawa nasyun he edsupak kayi he suǥù wey edrundus te valey te Megbevayà diyà te Jerusalem.

“Iyan a si Darius, is midsuǥù kayi. Ne ereg heini he edtumanen.”

13 Ne midtuman heini ni Tatenai he gubirnedur, ni Shetar Bozenai, wey te menge zuma zan is suǥù ni Hadì Darius. 14 Umbe, mibpedayun te kedterebahu is menge pengulu te menge Judio duma is kedlig-eni kandan te menge lalag te menge ebpeneuven he iyan si Haggai wey si Zacarias he menge apù ni Iddo. Nepasad dan te edterebahu is baley te Megbevayà sumalà te insuǥù te Megbevayà te Israel he impetuman eni Cyrus, Darius, wey Artaserkses, he nekesunud he menge hadì diyà te Persia. 15 Nepasad sikan is baley te Megbevayà hein iketelu he andew te ike-12 he vulan, he iyan kes bulan he Adar, dutun te ikeenem he tuig te kedhadì ni Darius.

16 Melipayen he midsilibra is kebpehinunguza zuen te valey te Megbevayà te menge etew te Israel–menge memumuhat, menge Levihanen, wey te zuma pa he nemen-ulì puun te kegkevihag. 17 Kayi te kebpehinunguza zuen te valey te Megbevayà nemuhat sikandan te 100 he tudu he vaka, 200 he meǥurang he meemahan he menge kerehidu, wey 400 he meemahan he nati he menge kerehidu. Nemuhat daan sikandan te 12 he meemahan he menge kambing he pemuhat he para idlumpiyu te kada tribu te Israel. 18 Insavuk dan is menge memumuhat wey menge Levihanen diyà te kada ketengdanan dan diyà te valey te Megbevayà diyà te Jerusalem sumalà te ingkesurat diyà te Libru ni Moises.

19 Dutun te ike-14 he andew te nehuna he vulan te midsunud he tuig, midsilibra te menge nemen-ulì puun te kegkevihag is Pista te Kedlavey te Belinsuǥuen. 20 Mibpekelumpiyu is menge memumuhat wey menge Levihanen su wey zan mehimu he zait he ebpengulu ziyà te menge tulumanen. Ne midlapà te menge Levihanen is menge kerehidu he pemuhat te kedsilibraha te Pista te Kedlavey te Belinsuǥuen. Mibeelan dan heini para te langun he nemen-ulì puun te kegkevihag, para te menge memumuhat he menge kezuzumahi zan, wey para te keugelingen dan. 21 Heini he menge pemuhat migkaan te langun he menge Israilihanen he nemen-ulì puun te kegkevihag wey te zuma he menge etew he mid-ubpà dutun he mid-engked en he ebaal te menge ebeelan te menge etew he wazà mekekilala te Megbevayà te Israel. 22 Seled te pitu he andew is melipayen he kedsilibraha zan te Pista te Supas he Wazè din Tapey. Su mibeǥayan dan te Nengazen te kelipey pinaaǥi te kedwelenga zin te ǥehinawa te hadì te Asiria para tevangi zin sikandan te kedterebehuwa zuen te valey te Megbevayà, sikan is Megbevayà te Israel.

<- Ezra 5Ezra 7 ->