1 Netudtulan is menge kuntada te menge tig-Juda wey menge tig-Benjamin he mid-uman benguna zuen te nemen-ulì puun te kegkevihag is baley te Nengazen he Megbevayà te Israel. 2 Ne midhendiyà sikandan te ki Zerubabel wey zuen te menge pengulu te menge pemilya, ne ke sikandan te, “Ed-uǥupan dey sikiyu te kebangun te valey te Nengazen su ed-ezapen dey man is Megbevayè niw iring te ed-ul-ulahan niw. Neuǥet en is kebpemuhata zey kandin te menge pemuhat, puun pa te timpu ni Hadì Esarhadon he hadì te Asiria he iyan mid-uwit kenami kayi.” 3 Piru iyan heini tavak eni Zerubabel, Jeshua, wey te menge pengulu te menge pemilya: “Midsuǥù key ni Hadì Cyrus he hadì te Persia he umana zey venguna is baley te Nengazen, piru wazè niw kayi lavet te kebangun kayi para te Megbevayè dey. Iyan key zà ebangun kayi para te Nengazen he Megbevayà te Israel.”

4 Umbe, mibpelihandek wey mibpeluyahan te menge etew he zaan he ebpemen-ubpà dutun he lugar is menge etew te Juda su wey zan kenà melaus is kedterebehuwa zuen te valey te Nengazen. 5 Midsuhulan dan is menge upisyal te ginhedian te Persia su wey zan belevaǥi is menge pelanu te menge etew te Juda. Mibpedayun sikandan te kebaal kayi puun te timpu ni Cyrus he hadì te Persia taman en te timpu he si Darius en is hadì diyà te Persia.

6 Hein mibpuun medhadì si Ahasuerus, is menge kuntada te menge meǥinged diyà te Juda wey Jerusalem midsurat te menge sumbung dan kuntra kayi he menge meǥinged. 7 Ne minsan hein si Artaserkses en is hadì diyà te Persia, mibpesuratan dan daan. Iyan sikandan ensi Bishlam, Mitredat, Tabeel, wey is duma pa he menge zuma zan. Insurat dan heini ziyà te kineǥiyan he Aramico ne midhuvad heini ziyà te kineǥiyan te menge tig-Persia.

8-11 Midsurat daan si Rehum he gubirnedur wey si Shimshai he sikritaryu ziyà te ki Hadì Artaserkses te igkuntra zan te menge tig-Jerusalem. Iyan heini taǥù te surat dan:

“Minahal he Hadì Artaserkses,

“Edhuna key ebpengemusta kenikew, is menge suluǥuen nu kayi te prubinsya he zini layun te Eufrates. Ragkes he nengemusta kenikew is menge zuma zey he menge pengulu wey menge upisyal, is menge etew te Tripolis, Persia, Erec, Babilonia, wey is menge etew ziyà te Susa he tanà diyà te Elam. Ebpengemusta zaan is menge etew he impaawà diyà te menge lugar zan ni Osnapar, kes nevantug wey mekeǥeǥehem he hadì diyà te Asiria. Heini he menge etew impeubpè din diyà te inged he Samaria wey ziyà te zuma pa he menge lugar he zini layun te Eufrates.

12 “Mahal he Hadì, egkesuat key he metueni nu he mid-umanan benguna te menge Judio is inged he Jerusalem, he ubpeey te menge lalung wey menge ribildi he menge etew. Heini sikandan nekeume kayi he inged he ebpuun diyà te menge lugar he nesakup nu. Ebpurungan dan en is menge verengbeng wey menge pundasyun kayi. 13 Mahal he Hadì, emun egkeuman egkevangun heini he inged wey egkepurungan en is menge verengbeng kayi, edribildi is menge meǥinged kayi ne kenè dan en ebayad te menge vuhis wey zuma pa he menge veleyazan. Ne edeisey is egketiǥeyunan te ginhedian nu.

14 “Ne ǥeina te zuen dey ketengdanan diyà te kenikew, Mahal he Hadì, wey kenè dey egkesuatan he mepeel-elezi ka, ibpehibelu zey heini ziyà te kenikew 15 su wey nu mesusi is menge surat he intaǥù te menge kepuun nu. Ne kayi egketuenan nu he is menge meǥinged diyà te Jerusalem menge ribildi puun pa te nehuna he timpu. Umbe midezeetan heini he inged su nehimu heini he prublima te menge hadì wey te menge lugar he egkesuat he edsakup kayi. 16 Ibpehibelu zey zà diyà te kenikew, Mahal he Hadì, he emun egkeuman egkevangun heini he inged wey egkepurungan is menge verengbeng kayi, ne egkaawà diyà te kenikew is prubinsya he zini layun te Eufrates.”

17 Iyan heini tavak he impeuwit duen te hadì:

“Ebpengemusta a kenikew Rehum he gubirnedur, wey ziyà te kenikew Shimshai he sikritaryu, wey te menge zuma niw he ed-ubpà diyà te Samaria wey is diyà te zuma pa he menge lugar he ziyan layun te Eufrates.

“Berakat he meupiya is kebpekesavuk niw.

18 “Is surat he impeuwit niw midhuvad diyà te kenami he kineǥiyan dutun te kebesaha zuen kayi te kedì. 19 Midsuǥù a he susiya is menge surat, ne naahà dutun he tutuu iyan he puun pa zengan is menge meǥinged diyà te Jerusalem ebpekigkuntada te menge hadì. Neleyaman dan en te ed-ula-ula keniyan he lugar is kedribildi kuntra te gubirnu. 20 Netuenan ku zaan pinaaǥi te menge surat he midumala is Jerusalem te mekeǥeǥehem he menge hadì he midhadì te tivuuk he prubinsya ziyan layun te Eufrates ne mibayad heini he prubinsya ziyà te kandan te vuhis wey zuma pa he menge veleyazan.

21 “Ne ǥuntaan mebmandù kew he ibpeengkezan keniyan he menge etew is ked-uman kebangun keniyan he inged taman te kenè e pa ebmandù te kebenguna zuen. 22 Kinahanglan he segugunè niw veeli heini su wey kenà mezeeti is ginhedian ku.”

23 Ne hein nepasad te ebasa eni Rehum, Shimshai, wey te menge zuma zan is surat ni Hadì Artaserkses, segugunè dan midhendiyà te Jerusalem ne midteǥel zan is menge Judio he engkezi zan is ked-uman kebangun duen te inged.

24 Neengked is kebenguna zuen te valey te Megbevayà diyà te Jerusalem taman te ikezuwa he tuig te kedhadì ni Darius diyà te Persia.

<- Ezra 3Ezra 5 ->