1 Migkaǥi is Nengazen kayi te kedì te, 2 “Sikew is etew, sinaru ka ziyà te menge vuvungan te Israel ne rewaki nu heini: 3 He menge vuvungan te Israel, menge zal-ug wey menge suǥud, pemineǥa niw is egkeǥiyen te Nengazen he MEGBEVAYÀ: Ebpeeǥiyan ku sikiyu te tebek, ne ebpemengkaǥen ku is menge simbahan niw ziyà te metikang he menge lugar. 4 Egkengevengkag is menge pemuhatè niw ragkes en is menge pemuhatà he edtutungan te menge veyewà, ne ebpenhimetayan ku is menge meǥinged diyà te keniyu diyà te etuvangan te menge ed-ezapen niw. 5 Ibpelastar ku sikiyu is ebpematey he menge Israilihanen diyà te etuvangan te menge ed-ezapen niw ne ibpeyapat ku is menge tulan niw ziyà te ebpekeliǥuy te menge pemuhatè niw. 6 Is kada inged niw ne edezeetan. Egkengerupet is menge simbahan niw ziyà te metikang he menge lugar, menge ed-ezapen, menge pemuhatà, ragkes is menge pemuhatà he edtutungan te menge veyewà, wey is duma pa he iring kayi te menge vineelan niw. 7 Ebpematey is menge meǥinged kayi, ne egketuenan niw he iyan a Nengazen.

8 “Piru kenè ku sikiyu ed-eminen te edhimatey. Is duma keniyu ebpekepelaǥuy te tebek ne ebpekepeyapat dan diyà te zuma he menge nasyun 9 su egkengevihag sikandan. Dutun egketenuzan e zan, ne egkeseǥipè dan he mibeǥayan e zan bes te seeng tenged te kedluivi zan kedì su iyan dan impelavi is duma he menge ed-ezapen. Edumutan dan is keugelingen dan tenged te mezaat wey utew mahawag he menge vaal zan. 10 Ne egketuenan dan he iyan a Nengazen, ne tinutuuwà is kegkaǥi ku he ibpaaǥi ku ziyà te kandan heini he menge kezeetan.”

11 Ne migkaǥi is Nengazen he MEGBEVAYÀ kayi te kedì te, “Sumbaǥa nu is palad nu, padewpadew ka, ne pemensag ka te, ‘Hanu ve!’ te kebpaahaa nu te kegkeseeng wey kegkepauk nu te menge etew te Israel, tenged te langun he mezaat wey utew mahawag he menge ulaula zan. Iyan heini hinungdan te kebpematey zan pinaaǥi te tebek, bitil, wey zaru. 12 Is diyà te meziyù ebpatey te zaru. Is diyà te uvey ebpatey te tebek. Ne is egkesamà ebpatey te vitil. Pinaaǥi kayi igkevuswang ku is rerangit ku. 13 Ne egketuenan dan he iyan a Nengazen emun is ebpematey he zuma zan he meǥinged ebpekepeyapat en duma te menge ed-ezapen dan diyà te peliǥuy te menge pemuhatè dan, diyà te menge vuvungan, diyà te puntur te menge vuntud, diyà te sihung te zezekelà he menge kayu, wey ziyà te sihung te merapung he menge kayu he ulayan, he zutun dan ebpemuhata te veyewà is langun he menge ed-ezapen dan. 14 Edsilutan ku sikandan minsan hendei zan ed-ubpà, ne egkehimu he mekevulungbulung is tanè dan puun te sibsivayan diyà te zivavà pehendiyà te Dibla ziyà te zizaya, ne zutun egketuenan dan he iyan a Nengazen.”

<- Ezekiel 5Ezekiel 7 ->