1 Ne miduma a zuen te etew ziyà te ǥawas he lama zuen te valey te Nengazen. Ne ziyè key mebayà te veyeey he zapit te edsilaan. Ne zutun impeehè din kedì is menge ruǥu he zapit te edsilaan duen te seled he lama wey te bilding diyà te zapit te edsenlepan. 2 Heini he menge ruǥu is ebpekesinaru ziyà te zizaya, 170 he ǥiek is keluǥayad ne 85 he ǥiek is keluag. 3 Heini he menge ruǥu, 34 he ǥiek is kebpekediyù dan duen te valey te Nengazen, ne ebpekesinaru heini zuen te simintadu he veyeey ziyà te gawas he lama. Heini he menge ruǥu, tetelu he endana 4 Ne ziyà te egkesineruwan kayi ne zuen beyeey he 17 he ǥiek is keluag din ne 170 he ǥiek is keluǥayad din. Is menge ǥemawan dutun te menge ruǥu, ne ebpekesinaru ziyà te zizaya. 5 Is menge ruǥu ziyà te iketelu he endana, ne meliǥet duen te ziyà te ikezuwa he endana, ne is menge ruǥu ziyà te ikezuwa he endana ne meliǥet duen te ziyà te egkehuna he endana, su egkinahanglan te veyeey is diyà te zivavew he endana. 6 Heini is tetelu he endana, ne wazè din menge tukud, kenà iring te menge bilding duen te menge lama. Ne geina te neked-uuntuzè dà heini, ne neriyus is kengezekelà te ruǥu. 7 Heini he vilding, nekesivey zuen te ǥawas he lama pinaaǥi te verengbeng he 85 he ǥiek is keluǥayad din. 8 Su emun wazà heini is berengbeng, is ketengà te bilding he 85 he ǥiek, egkaahà ke ziyè ki te ǥawas he lama. Is tivuuk he keluǥayad duen te bilding he 170 he ǥiek, egkaahà ke ziyè ki te valey te Nengazen.

9 Duen beyeey he para idseled diyà te zizalem he endana zutun he vilding he ebpuun te ǥawas he lama he zapit te edsilaan.

10 Duen daan menge ruǥu ziyà te egkezivavà he verengbeng duen te seled he lama. Heini he menge ruǥu is avey zuen te seled he lama uvey zaan duen te bilding he zapit te edsenlepan. 11 Duen daan beyeey ziyà te egkesineruwan kayi he menge ruǥu, iring te menge ruǥu he ziyà te zapit te zizaya. Is keluǥayad wey keluag kayi he menge ruǥu, ne neked-iring, ragkes en is menge veyeey kayi wey is sukud kayi. Is menge ǥemawan duen te menge ruǥu he zapit te zizaya 12 ne iring daan te menge ǥemawan duen te menge ruǥu he zapit te zivavà. Duen gemawan diyà te egkezungguan duen te veyeey he para te kedseled dutun te bilding. Duen berengbeng kayi te veyeey he para te edseled he ebpuun te dapit te edsilaan.

13 Migkaǥi sikan is etew kayi te kedì te, “Heini he menge ruǥu is dapit te zivavà wey zizaya he ebpekesinaru te lama kayi te valey te Nengazen, ne segradu heini he menge ruǥu. Su is menge memumuhat he ebpemuhat diyà te Nengazen ne kayi zan egkeena is utew segradu he menge pemuhat. Egemiten dan daan heini he menge ruǥu he para selevukà te menge pemuhat he para gasa, menge pemuhat he para idlumpiyu, wey menge pemuhat he vayad te salà. Su segradu heini he menge ruǥu. 14 Emun egawas en is menge memumuhat puun kayi te segradu he menge ruǥu, kinahanglan he kenè dan dèpa mediritsu megawas pehendiyà te ǥawas te lama. Kinahanglan he edluwasen dan dèpa is menge visti he imbivisti zan dutun te kebpemuhat dan, su segradu heini he menge visti. Kinahanglan he ed-ilis dèpa sikandan te selakew en he visti te kenè pa sikandan edhendiyà te vahin duen te simbahan he para te menge etew.”

15-16 Hein nepasad duen te etew te edsukud sikan is baley te Nengazen, ne midume e zin diyà te ǥawas. Diyè key mebayà te veyeey he zapit te edsilaan, ne midsukud din is tivuuk he keluag duen te valey te Nengazen. Midsukud din duen te kayu he sukud din is bahin dutun he ziyà mezapit te edsilaan, ne 850 he ǥiek is keleyatan kayi. 17-19 Ne midsukud din daan is bahin he ziyà te zizaya, divavà, wey edsenlepan, ne neked-iring is keleyatan kayi he pudu 850 he ǥiek. 20 Umbe, kuwedradu haazà is baley te Nengazen, ne neliǥuy heini te verengbeng he mibpedsivey zuen te Segradu he Lugar wey urdinaryu he lugar.

<- Ezekiel 41Ezekiel 43 ->