1 Dutun te nehuna he andew te iketelu he vulan, duen te ike-11 he tuig te kegkevihaǥa kenami, migkaǥi is Nengazen kayi te kedì te, 2 “Sikew is etew, keǥiya nu heini ziyà te Faraon he hadì te Ehipto, wey te menge etew zin:

“Hentei is egkepetug-iringan ku te kegkemekeǥeǥehem nu? 3 Ibpetug-iring ku sikew te Asiria, kes nasyun he iring te kayu he sidru ziyà te Lebanon. Sikew Faraon, iring kew zaan te kayu he sidru. Heini he kayu zuen din mekempet wey merapung he edrerepa he menge subpang, ne nelapew kayi is duma he merapung he menge kayu. 4 Nekeuǥup te kebmehinuvù kayi is wahig he ebpuun diyà te mezalem he serebseb. (Midtudà daan heini ziyà te zuma he menge kayu ziyà te ketelunan.) 5 Mibmetawis heini he kayu lavew te zuma he menge kayu ziyà te ketelunan. Midezekelà wey mibmerapung is menge subpang kayi tenged duen te zekelà he wahig. 6 Is langun he menge tagbis midsesalag diyà te menge subpang din, wey is langun he leew he menge langgam mid-anak diyà te puun din. Is menge etew ziyà te langun he gemhanan he menge nasyun midhelung kayi. 7 Mekempet heini he kayu ne memelayat is menge subpang din, su is menge zalid din midtiusek diyà te zizalem tenged te zekelà he wahig. 8 Minsan is menge kayu he sidru ziyà te pemuleey te Megbevayà ne kenà ebpekerepeng te kekempet kayi he kayu. Minsan is menge kayu he abitu wey platanu kenà ebpekerepeng te kekempet te subpang kayi he kayu. 9 Mibpekekempet ku heini he kayu is merapung is menge subpang din. Umbe nesina kandin is langun he menge kayu ziyà te pemuleey te Megbevayà.”

10 Umbe ǥuntaan, migkaǥi is Nengazen he MEGBEVAYÀ te, “Tenged te impemetikang kayi he kayu is keugelingen din wey kerapung te menge subpang din, wey tenged te kebpegalbu zin, 11 ibeǥey ku heini ziyà te nasyun he lavew he mekeǥeǥehem te zuma he menge nasyun he siguradu he edsilut kandin te sungkad te kelelalung din. Uya, idselikwey ku sikandin; 12 ebpilayen sikandin te kinemepesipelahan te langun he menge nasyun wey ebey-anan en. Ne ebpekepeyapat is egkengevadtì he menge subpang din diyà te menge vuvungan, menge suǥud, wey menge beyeey te wahig. Ed-awà diyà te kandin is menge etew ziyà te menge nasyun he midhelung diyà te kandin. 13 Edlatun is langun he menge tagbis diyà te lawa kayi he nepiley, ne ebpemen-untud is leew he menge langgam diyà te menge subpang kayi. 14 Umbe puun guntaan, wazè en kayu he edlavew is ketawis din wey kerapung din te zuma he menge kayu, minsan wehiǥen pa is netuvuan din. Su egkepatey is langun he kayu iring te etew he ebpatey ne ebpehendiyà heini te dizalem te tanà.”

15 Mibpedayun megkaǥi is Nengazen he MEGBEVAYÀ te, “Dutun te andew te ked-uwita kayi te kayu ziyà te lugar te menge minatey, edtembunan ku is mezalem he menge serebseb, ne tuus heini te kegkeseeng. Ne kenè en edtudà is wahig diyà te menge wahig, ne kenè en dekelà is wahig. Tenged kayi ebmerusirem is Lebanon ne egkeǥangu is langun he menge kayu ziyà te menge vevesukà. 16 Egkerkeren tenged te kegkahandek is menge etew ziyà te menge nasyun emun egkezineg dan en is guǥumangkul te kegkezeeti zutun te kayu, emun ed-uwiten en diyà te lugar te menge minatey duma te nemematey he menge etew. Ne is langun he menge kayu ziyà te Eden wey is langun he meupiya wey mekempet he menge kayu ziyà te Lebanon he nekepurung mekesupsup te wahig, edlipey zan diyà te zizalem te tanà. 17 Is menge etew ziyà te menge nasyun he midhelung diyà te kandin wey nekidsevaha kandin ne ebpekezuma zaan kandin diyà te lugar te menge minatey duma te nematey te tebek.

18 “Sikew is hadì te Ehipto, wazà kayu ziyà te Eden he ebpekerepeng te kekempet nu wey kegkemekeǥeǥehem nu. Piru id-ulug ka zaan diyà te zizalem te tanà duma te menge kayu ziyà te Eden. Dutun egkezuma nu is menge etew he nemematey te tebek he wazà medtuu te Megbevayà.

“Iyan heini egkehitavù te hadì te Ehipto wey te menge etew zin. Iyan a, is Nengazen he MEGBEVAYÀ, is migkaǥi kayi.”

<- Ezekiel 30Ezekiel 32 ->