1 Dutun te ike-12 he andew te ikesepulù he vulan, duen te ikesepulù he tuig te kegkevihag dey, migkaǥi is Nengazen kayi te kedì te, 2 “Sikew is etew, sinaru ka ziyà te Ehipto ne weliyi nu is Faraon he hadì te Ehipto te ebpekesuǥat kandin wey te langun he menge etew zin. 3 Keǥiyi nu sikandin he iyan a is Nengazen he MEGBEVAYÀ migkaǥi te: Kuntada ku sikew, Faraon he hadì te Ehipto. Neiring ka te zekelà he vuaya he ed-ubpà diyà te menge wahig diyan te Ehipto. Migkaǥi ka te kenikew is Wahig he Nilo, ne mibeelan nu heini para mismu kenikew. 4 Piru egkew-itan ku te menge vunuwit is bakè nu, ne igaun ku sikew puun te menge wahig nu duma te menge isdà he ebpemekepikit diyà te menge hun-ap nu. 5 Ne idtimbag ku sikew wey is menge isdà diyà te disirtu, ne ebpekesesavuk ka ziyà te tanà he wazà egkuwa wey edleveng kenikew. Ne ibpekaan ku sikew te zumezaas he menge langgam wey menge tagbis. 6 Ne egketuenan te langun he meǥinged te Ehipto he iyan a Nengazen. Su iring ke zà te meǥevù he tuked he midseriǥan te menge Israilihanen. 7 Dutun te kegewezi zan kenikew nevagbag ka, ne nepelian sikandan diyà te menge vekelawan. Ne hein midtelumbeǥat dan diyà te kenikew ne nevadtì ka ne nepiley zan ne nelepù is tulan te seǥang dan. 8 Umbe siak, is Nengazen he MEGBEVAYÀ, migkaǥi a he ibpesurung ku sikew te menge etew he edhimatey te menge etew nu wey menge uyaǥen dan. 9 Egkehimu he mekevulungbulung is Ehipto. Ne egketuenan niw he iyan a Nengazen.

“Geina te migkaǥi ka he kenikew is Wahig he Nilo wey iyan ka mibaal kayi, 10 kuntada ku sikew wey is menge wahig nu. Edèdeetan ku is Ehipto ne egkehimu en heini he mekevulungbulung puun te Migdol pehendiyà te Aswan, taman te dulunà te Etiopia. 11 Wazè en etew wey langgam he ebayà kayi, ne wazè en ed-ubpà kayi seled te 40 he tuig. 12 Edhimuwen ku is Ehipto he utew mekevulungbulung kenà te zuma he menge nasyun. Seled te 40 he tuig, is menge inged kayi egkehimu he edhuna he mekevulungbulung te zuma he nevengkag he menge inged. Ne ibpeyapat ku is menge Ehiptohanen diyà te nekedseselekawà he menge nasyun.”

13 Piru migkaǥi zaan is Nengazen he MEGBEVAYÀ te, “Kedlavey te 40 he tuig, edtiǥumen ku is menge Ehiptohanen puun te menge nasyun he zutun sikandan mekepeyapat. 14 Idlikù ku sikandan diyà te Patros he divavà he vahin te Ehipto, he iyan kes tanà he mibpuunan dan. Ne zutun egkehimu zà sikandan he mevavà is kebpekesavuk din he ginhedian– 15 pinekemevavà heini te langun he menge ginhedian, ne kenè dan en ebpekeuman ebpekelavew te zuma he menge nasyun. Edhimuwen ku sikandan he meǥuyà utew he ginhedian, ne kenè en egkeuman egkezizalem te ǥehem din is duma he menge nasyun. 16 Ne kenè en ed-uman edsarig te Ehipto is menge etew te Israel. Is egkehitavù te Ehipto ebpekepetanudtanud te menge Israilihanen te menge salè dan, he iyan is kebuyù te tavang diyà te Ehipto. Ne egketuenan te menge Israilihanen he iyan a Nengazen he MEGBEVAYÀ.”

17 Hein nehuna he andew te nehuna he vulan, dutun te ike-27 he tuig te kegkevihaǥa kenami, migkaǥi is Nengazen kayi te kedì te, 18 “Sikew is etew, is menge sundaru ni Hadì Nebucadnezar he hadì te Babilonia mibpurung mebpekidtebek te menge sundaru te Tyre taman te nengeupew en sikandan wey mibpenlupangan en is menge pemenayen dan. Piru wazà nekuwa ni Nebucadnezar wey te menge sundaru zin diyà te menge tig-Tyre. 19 Umbe siak, is Nengazen he MEGBEVAYÀ, migkaǥi a he iyan ibeǥey ku is Ehipto ziyà te hadì te Babilonia he si Nebucadnezar. Egkaaǥew zin is langun he ketiǥeyunan diyà te Ehipto he iyan bayad diyà te menge sundaru zin. 20 Ibeǥey ku kandin is Ehipto he suhul te kedhaǥù din. Su para kediey is kedhimuwa zin kayi wey te menge sundaru zin. Iyan a, is Nengazen he MEGBEVAYÀ, is migkaǥi kayi.

21 “He Ezekiel, diyà te timpu te kegkeul-ulaha kayi, ed-umanan ku ed-enawa is Israel, ne egketuenan te menge Israilihanen he tutuu ves iyan is mibpengaǥi nu. Ne zutun egketuenan dan he iyan a Nengazen.”

<- Ezekiel 28Ezekiel 30 ->